一次無心嘅表白，竟然令到佢同咗我一齊: 第四十七章

記得當初我之所以同阿靜一齊，只係為咗想證明俾chloe睇，係有人會鍾意我。甚至拖住阿靜之前嘅一刻，我都冇相信過阿靜真係肯同我一齊，到後來拖住佢見chloe我都仍然有種想報復嘅心態。

但慢慢，佢真正咁存在咗係我心入面，雖然比唔上對chloe五年嘅感情，但已經足夠我想一世陪係佢身邊。

記得當年10月15號係嗰套傳說中嘅神戲<那些年>係香港上映，我同阿靜諗住當日去睇，而跟據ua東薈城嘅慣例，我係應該可以以兩張飛嘅價錢包場架麻，點知…

星期六嘅朝早，阿靜同之前一樣，一早過咗嚟我到。為免太遲買飛冇位，我同阿靜諗住買完飛先返屋企。點知去到已經排隊排到出門口，唔講真係以為今日戲院特價。

住咗東涌咁耐，真係第一次要排成半粒鐘去買飛。



排咗咁耐，終於第一次享受到拖住條女，向周圍嘅毒撚顯示出勝利者嘅語調同個售票員講：「唔該，那些年，跟住個場，兩張吖。」嘅感覺。

點知知售票員下一秒就秒殺咗我：「唔好意思呀，今日全日嘅飛都賣哂啦，唔知聽日o唔ok呢？」

我望一望阿靜，佢點一點頭，跟住我話：「咁聽日啦。」

買完飛之後，又係返我屋企繼續過啲老夫老妻嘅生活。而家嘅阿靜，已經唔似當日第一次入我屋企嘅傻瓜咁，剩係企係到。而家每當我開完門，佢就即刻變咗個奧運跳水選手咁，飛咗上我張梳化或者張床到。

我唔知係所有女仔都會咁吖，定我屋企特別好玩。無論係chloe，hailey，阿靜定係其他fd，上到我屋企見係軟嘅嘢就會跳上去，我總係覺得啲傢俬成日暗地裡悲鳴咒罵呢班仆街（我相信阿靜除外）。



其實時間呢樣嘢好有趣，隨住陪係身邊嘅人同事嘅唔同，速度都會過得唔同。話咁快，我哋又係屋企好溫馨咁過咗日。

第二日，入到戲院嗰陣，我呆咗呆，全院滿座嘅情景竟然可以出現係東薈城。當時都市傳說話最後10分鐘好催淚，本來都不以為然，但當睇到嗰陣，我嘅眼淚就好似壞咗嘅水喉咁，不自覺咁流出嚟。

「傻瓜，你喊呀！」阿靜笑住咁問我。

我望一望佢之後話：「你咪又係！！」

最尾十分鐘嘅都市傳說原來係真，而且仲攪到我同阿靜搶紙巾。



我唔知阿靜係因為被劇情感動定咩原因所以流眼淚，至於我…

我不得不承認，我呢刻係諗起chloe…睇住自己鍾愛咗咁多年嘅人，今日真正咁屬於另一個男人，男主角對新郎嘅嗰一吻，當中帶有幾大嘅遺憾同埋愛……我好怕…好怕有一日都要面對chloe同另一個男人走入教堂……

睇完套戲之後，總坐有種好失落嘅感覺，而阿靜就不停咁恥笑我灰到完場。不過亦都因為阿靜不停咁笑我，令到我開始有返生氣。

由於睇完戲都不過係1點幾，我突然間想同阿靜去一個地方，於是拖咗佢去地鐵站。

「唔係返屋企咩，而家去邊呀？」

「跟住我就得啦！」

我哋搭到香港站，行到去荃灣線，出皇后像廣場，經過埋長江中心…

到咗山頂纜車嘅售票處。



「下，上山頂？」阿靜好驚訝咁問。

「係呀，做咩呀？你唔想？」

「唔係呀，只係太突然啫。」

「咁我成日咁悶，唔係行海邊就係屋企發霉，我都怕悶親你架麻！」

「傻瓜，我不知幾鍾意一齊係屋企呀！」

呢次係我第二次嚟山頂，第一次係八歲嗰陣。當時上纜車唔洗同人推撞，唔洗用盡18般武藝，無論係外國人定香港人都好禮讓。但今次同阿靜搭車，真係明明等咗3班，諗住排咗頭位可以上得輕鬆啲，點知都要葉問上身咁先可以保護阿靜上車。

雖然係我帶阿靜嚟，但其實都唔知有咩好做，夜晚未到，睇風景又冇乜feel，於是唯有上天台到坐低傾計。對我同阿靜嚟講，身處係邊唔重要，重要嘅係只要有對方係身邊已經足夠。



坐咗唔知幾耐，阿靜又話想周圍行下，結果行咗去個小公園到。係呢個公園入面，我終於見返啲真正嘅童年。一大班小朋友係公園到走嚟走去，呢啲場面，睇怕市區嘅公園真係冇乜可能發生。

跟住行行下，又行咗出去外面。有去過山頂嘅人應該都記得，有條情侶禁路。一個可以望住纜車到達嘅位置，隔離就係一條<芬梨徑>。真係講都已經覺得好危險，行埋可能半路已經分離咗。

「個名叫芬梨徑咁得意嘅！」

「係囉，改呢個名條友幾陰毒吖！」

「嘻…係阿恆，你估我哋會唔會咁吖嗱？」

《時間在你離開以後，已經停止向前……》