一次無心嘅表白，竟然令到佢同咗我一齊: 第四十八章

「咁就睇你啦！我對住條咁乞情侶憎嘅分離徑發誓，只要你一日唔離開我，我都一定唔會放手！」就算…離開咗…我都可能唔識放手……

「係咩！咁如果chloe突然間鍾意咗你呢？」

頂…我都話老母同老婆跌咗落水救邊個先唔係世紀難題嚟架啦……

「就算全世界嘅女人都鍾意我，但如果要我冇咗你，咁我寧願永遠只得你一個！」嗱，我都覺得假咗啲…但係其實又假唔哂，至少今次唔係經過男性思考系統去諗嘢，而係真真正正咁因為阿靜係我心目中嘅地位已經變得好重要。

或者呢個世界有好多人各方面嘅條件都比阿靜好，但係只有阿靜咁了解我，只有佢嘅時而聰明絕頂，時而野蠻驕縱，時而溫柔可愛…不多不少，恰到好處咁表現係我面前，我好難想像如果有一日，佢嘅一切都已經唔再屬於我嘅時候，我嘅人生會突然變得幾冇意義……



「唓，你真係死剩把口架咋！」阿靜一邊講一邊搣我雙頰。

「係囉，多得個天待我不薄，啱啱好俾我死剩把口嚟取悅我嘅小公主~」

「呵，本公主要起駕。」

「咁請問我嘅公主，你想去邊咁呢？」

「想上返天台睇夜景！」



不過上到山頂廣場嗰天台，唔好話維港兩岸嘅夜景，連最低層嘅人都見唔到。一班自由行完全將可以睇到景色嘅位置全部用身軀封住，不留一點空隙。

雖然睇唔到風景，但係係山頂呢個冇任何遮擋嘅地方下，即使天氣依然係頗熱，但夜晚嘅微風輕撫住我同阿靜，感覺就好似突然一切都變後好輕咁。

係返去嗰陣，阿靜突然問咗條好奇怪嘅問題：「你覺得呢，拍拖係咪兩個人嘅事呀？」

聽到呢句，我個腦第一時間浮現出tvb嘅師奶劇嘅劇情：阿靜原來係有錢女，但扮窮家女搵真愛，遇到個又窮又樣衰嘅毒撚之後唔小心愛上佢，但俾阿靜嘅屋企人發現，然後出盡各種陰招務求要令到我阿靜分手為止……

其實我都唔想諗到啲咁唔合邏輯嘅劇情架，但俾tvb荼毒得太耐有乜計？所以話有多個台揀係幾重要呢！



「直到結婚前，都係嘅。」

之後阿靜望出窗外，貌似若有所思。

「係呢阿恆，你估我哋將來會點吖嗱？」

「我哋呀，會住係碧堤半島嘅一個高層海景單位到，跟住係附近開間蛋糕鋪，你整蛋糕我收錢，哈哈…」

「攪錯呀，咁虐待我架！！梗係你去整蛋糕我收錢啦！！」

「好好好，將來一定有呢一日！」

「但你而家成日掛住陪我，咁你啲功課呢！又成日得閒無事就走堂！」

我苦笑咗一下，話：「冇嘢比你更重要架！！」說罷我就攪住阿靜。



阿靜只係向我微笑咗一下當作回應。

係往後嘅幾個星期，我哋都係重複又重複咁做相同嘅事，直到11月24日……

嗰日係星期3，平時我哋閒日只會落咗堂先出街，但呢日，阿靜朝早send咗條sms嚟：

「阿恆，今日我想上你屋企，得唔得呀？」

雖然奇怪，但又唔係啲咩特別要求，所以我都不以為然。

「好呀，放學上？」

「而家。」



一個鐘頭後，阿靜上到嚟，我問佢：「做咩咁突然想上嚟？」

「掛住你……張床，同你……隻公仔囉！」

我笑咗笑，就將阿靜推上張床，同平一樣，我哋都只係做到除哂對方啲衫，最後乜都冇發生咁攬住係張床到。不過唔同嘅係，平時我係從後攬住阿靜，但今日，阿靜正面咁攬住咗我。

我哋雙擁入睡，直到屋企門鐘響起。

我同阿靜係久經訓練嘅情況低下，已經由開頭差啲著錯對方啲衫到而家可以以3秒3嘅速度換好哂衫，面不改容咁去開門。

對於阿靜嘅出現，父母都已經習以為常，阿靜就好似已經屬於呢個家嘅一份子咁。

食完飯，我同阿靜又返返入房，玩好公平嘅大富翁。不過今次，真係好公平，阿靜踩中我啲地真係會俾錢…拎銀行啲錢嚟俾……

終於，門聲又響起，我又係時候送阿靜返屋企。係送阿靜返屋企呢程車入面，雖然同平時一樣，一齊講下日常趣事，但心頭總係有種失落感係到…



到咗阿靜屋企樓下，輕吻咗一下佢額頭之後，佢就轉身行返入去。

唔知點解，總覺得呢次分開嘅感覺有種講唔出嘅難受…

於是我係阿靜行咗幾步之後，我衝上前，將阿靜緊緊咁攬入懷中…

過咗陣，我哋再一次分別，就係阿靜入門口前嘅一刻，我用咗一把頗大嘅聲線叫：

「阿靜…我愛你呀~~」阿靜…我真係好愛你…

《分手並唔可怕，可怕嘅係昔日甜蜜嘅回憶會化成利刃，刺下永不磨滅嘅傷口……》