紙言

〔100%FF〕我愛上樓下個女仔: 七



她的想法和我的想法大致相同 

「有啲事，未必要個個都了解，清者自清咪得囉」我說 

「可惜有啲人中意用無理取鬧，屈人地嚟掩飾自己嘅過錯呢」 

雖說人經歷過一些事後會變得成熟了 

但是她過於理性分析這件事令我不禁有點擔心 



我再也沒說話，讓她好好地想 

這時候，作為一個聆聽者，總比對她說教好 

我看著天空，在市區一顆星都不見 

甚至連街上都沒有人 

這一晚，特別的寧靜 



我們兩人只坐了一個晚上 

在回家時，我都只是跟在她後面 

「方哥哥」她在升降機中說 

「嗯？」 

「以後，可唔可以每晚都陪我坐吓呀？」 



「都唔係話唔得嘅」我撓一撓頭 

「做咩呀？唔想呀？」 

「唔係嘅，坐喺到又唔同我講吓嘢咁好冇癮」 

「嘻嘻，你肯聽我呻咪得囉」

「不過如果有咩心事，不妨講哂出嚟，千祈唔好做傻事呀」 

「傻架咩，我好珍惜生命架」 

「係至好講呀」 

「嗯，咁聽日見啦」她步出升降機 



這樣下去，不知道要等到她走出這次的陰霾還是找到下一個才能離開了 


又過了一天，下班時依舊要找阿晴吃飯 

相信不久後，她的心便屬於我了 

這天我和她去了吃烏冬 

「點解明明你喺日本返嚟，都咁中意食日本嘢食嘅？」我很好奇 

「可能係食慣咗掛」 

「咁怪嘅你」 



「唔緊要啦，你會陪我食嘅，係咪」 

「係係係」 

其實我不太喜歡日本的食物 

但是對面的女生喜歡，那我也沒有選擇的餘地 

食物到後，我便開始進食 

她埋怨沒有味道，於是加了一些辣椒油 

但是加了又說太辣，所以要喝水 



我們兩人都點了飲品

只是上餐的速度太慢了 

她一邊和我聊天一邊喝著可樂 

結果食物未到已經喝完了 

「比你杯檸檬茶我飲啖」她焦急的說 

然後便一手拿去放在我面前的飲品 

當我以為她會把吸管反轉的時候，她沒有這樣做 

害我看到這情景時噴了部分在嘴內的烏冬出來 



「哇你冇事吖嘛？」她問 

「咳咳…冇事，冇事」 

「洗唔洗飲啖嘢呀？」她把檸檬茶遞過來 

「咳，唔洗喇，哽親啫」 

天呀，我竟然錯失了一次和女神間接kiss的機會呀 

「又會食得咁急都有嘅，好肚餓咩你？」 

「唔係，見到你都飽啦，啲嘢飽到上心口落唔到去先出返嚟啫」 

「哈哈，口甜舌滑」 

「嘻嘻」我對她笑 

沒想到這些招數她居然也受落 

吃到一半時，我的電話收到了訊息 

阿寧：「你而家喺屋企？」２０：４４

「做咩呀，邊個搵你呀？」阿晴說 

「我阿媽啫」我不想她誤會 

「我仲以為你喺出面識女仔添」 

「你好想我喺出面識女仔咩？」我試探她 

她明顯沒想到我會問這問題 

「咁…咁如果你喺出面識到女仔，我都會鄧你開心嘅」她停頓了一會說 

「哈，咁到時你唔好後悔喎」 

「食嘢啦」她不知如何反應 

我笑了一笑，也沒回覆阿寧 

當我要回家時，原來已經十一時了 

步出了地鐵站，我想起阿寧可能還在公園 

所以便繞一圈去看看 

果然不出我所料的，她還坐在鞦韆上 

「咁夜仲唔返屋企？」我坐下來問她 

「返到去咪又係瞓唔著」 

「咁你聽日唔返學呀？」 

「都最後一個星期就唔駛返學喇喇，仲有得話唔返架咩」 

原來不知不覺地已經到了畢業的時候 

「咁咪好囉，唔駛再見到阿俊」

她沒說話，我也知道我說錯話了 

「Sorry呀，我唔應該提起佢…」 

「唔緊要啦」她對我笑一笑 

「你唔嬲佢喇？」 

「嬲，不過諗到以後都見唔到佢都算幾開心吓」 

「識咁諗就好喇」 

「係呢，做咩頭先唔覆我呀？」 

「電話冇電…」我對她說謊 

而事實上只是忘記了 

「咁你又知我喺到嘅？」 

「我怕你夜媽媽仲留緊喺到嘛，點知真係比我估中」 

「咁關心我呀」 

「咪係囉，咁為你著想仲要成日窒我」 

「對唔住囉」 

「知錯能改就最好喇」 

「鬼叫你唔識發脾氣咩」 

「我唔發咋」 

「發嚟睇吓」 

我拿出一張紙巾，然後用一陽指貫穿了它

「哈哈，咁都得呀？」我逗笑了她 

「識得咁樣笑吓咪好囉」 

「哈哈，笑緊你個表演弱智咋」 

「吖，你又窒我」我作勢衝過去追她 

她馬上走開了，我便和她在公園中追逐著 

這感覺有點像回到小時候 

追逐了一會兒，我便投降了 

「唔同你玩喇，成日喱喺啲設施後面」我說 

「細細個玩捉衣因都係咁啦，係你自己年紀大咗啫」她不再躲藏並走了過來 

我趁她鬆懈，便踏前捉住她 

她轉身要走，結果我絆到自己的背包 

在我意識到時，已變成了從後抱著她的姿勢 

「你…做咩攬住我呀」阿寧說 

「Sorry…失平衡」我馬上鬆開手 

這令我們兩人之間尷尬起來 

「吖…時候都唔早喇喎，你聽日都要返學」我用一句話打破這尷尬的場面 

「聽日係星期六喎…」她說了一句又令場面尷尬的話 

「吖…好似係…不過我都要返工，不如今日就咁先啦」 

「嗯…」

「你行先啦」我讓她走在前面 

在一路上，我都不敢對她搭話 

因為剛剛的情景在我腦海中一直重覆 

她走在前面也沒說話，只是不時看一下電話 

在升降機到她那層時她也只是跟我道別 

希望她明天一覺睡醒就不記得這件事吧 


星期六的晚上，又是和阿晴一起渡過 

「咁快就過咗一個星期喇原來」她說 

「係囉，聽日終於叫做有得放假」 

「嗯…」 

「做咩呀？你返工返上癮呀？」 

「唔係呀，你唔知我想講咩呀？」 

「你…想講咩呀？」 

「算啦，冇嘢喇」 

她到底想說甚麼又不直接跟我說呢？ 

「他聽日得唔得閒呀？」她問我 

「做咩呀？想約我？」 

「嗯，仲記唔記得上次海洋公園呀？」 

怎會不記得，還十分刻骨銘心呢

「記得…」 

「上次你話唔舒服，所以我地早走咗，咁我咪諗住問吓你今次會唔會再去囉」 

「我地兩個？」 

「唔通你仲想有第三個？」 

「咁又唔想，不過你知啦，我又唔玩機動遊戲」 

「咁呀，咁我地聽日去邊呀？」 

「不如聽日留喺屋企啦」 

「吓…邊個屋企呀？」 

「各自屋企囉，我呢排做嘢好攰，有時返到屋企都要做嘢唔夠訓」 

「哦…咁好啦」 

「下次再約過啦好冇」 

「唯有係咁啦…」 

這時剛好到了地鐵站，她跟我道別了便走了 

這天正好在太子吃飯，和家不算遠 

為了節省車資我便徒步回家 

經過那個公園時，卻見不到阿寧 

我看一下手錶，才十時多 

她沒理由這麼早就回家了，不像她呀 

於是我便傳訊息給她

「你做咩唔喺公園嘅？」我問 

「溫緊書吖嘛」 

「咁勤力？」 

「不嬲都咁勤力架啦」 

「係喇係喇，咁即係我唔駛留喺公園食風啦」 

「你中意坐天光都得嘅，不過我唔會落嚟囉」 

「哦，咁我返去先喇」 

我正想把電話收回褲袋時，我的電話響起 

阿寧那丫頭又無故打電話給我 

「做咩呀，有咩事要特登打比我呀？」我沒她好氣 

「嘻嘻，我怕你已經返到屋企吖嘛」 

「仲有一段路程呀，唔好兜圈喇，有咩快講」 

「嘻嘻，我未食飯呀」 

「吓？」 

我到附近的老麥買了一個餐給她 

原來她家中兩老趁有空回鄉探親了 

「你自己唔識煮飯架咩」她打開門給我時我問 

「唔想煮吖嘛」 

「哈，定係唔識煮咋」

「邊…邊個話我唔識架，我識煮公仔麵架」 

「哈，好叻喎」 

「唔理你喇，你走就自己閂門啦」她走回房間 

我走到她的房間外面，看到她正在玩電話 

「唓，又話溫緊書嘅，原來篤手機」我逆 

「咩呀，我有溫囉好唔好」 

我看到她書桌上放滿了筆記，原來她沒騙我 

「食嘢就收返埋啲書啦，一陣又整污糟」我叮囑她 

「係喇，收埋囉，長氣」她瞪了我一眼 

「咁先乖架嘛」我摸一摸她的頭 

她轉過頭，雙眼合得只得一條縫的瞪著我 

我看到了立刻鬆開了手 

「仲留喺到做咩呀你」她問我 

「監督住你溫書囉，你屋企人唔喺到就交呢個任務比我喇」 

「唓，又冇人叫你咁做」她轉回書桌前 

「咁我走喇，你有咩唔識再打比我問啦」 

「得喇長氣鬼，記得閂門呀」 

「你就長氣」 

「吹咩」她對我做了一下鬼臉

雖然她和我整天在鬥嘴，但是作弄她也成為了我的樂趣 

回到家後我又一次沒洗澡就躺在床上 

這星期要和阿晴出去吃飯也算是一種折磨 

下班後已經很累了，在平時家中開飯前還能睡一會兒 

現在連這權利都沒有，幸好明天不用和她去海洋公園 

腦中默默無想，我就不知不覺進了夢鄉 


翌日，我竟然是被那可惡的鬧鐘吵醒 

醒來的時候才早上九時 

天呀！而今天是星期天呀，怎麼不讓我好好的睡一覺呀！ 

而事實是因為我調好每個星期日九時的鬧鐘 

好讓我約阿晴時不會遲到，但我卻忘記關掉 

醒來後，我便再也睡不著了，只能看著天花板 

「唉，Hi，嬲，打舖機先」我起床開了電腦電源 

正好我哥剛經過我的房間 

「細佬咁早呀？」他穿好了衣服，是要出門的樣子 

「哇，世界變喇，你竟然叫我做細佬，平時我唔係傻仔咩？」 

「今日心情好，唔鬼想同你嘈」他向大門的方向走 

「叫雞呀？」我用腳推著椅子，把頭伸出房門問 

「搵你阿嫂呀」他穿著鞋回答

他說的「阿嫂」共不是她妻子 

只是和他拍拖了快十年的女朋友 

好像我們兩家人已經到了談婚論嫁的地步 

所以叫嫂子也不足為過 

星期天我很罕有的留在家 

我哥和爸媽又各自兩人世界，只剩我一個人在一人世界 

老實說，不出外也不知道能幹甚麼 

過了一會兒，一個訊息傳了過來 

阿寧：「可唔可以落嚟教吓我做數呀」０９：５８ 

總算是找到些事幹一下了 

我走了下樓，她開門給我 

「哇，你做咩著外套呀？」我問 

「有啲凍啫，入嚟啦」 

她先回到房間，我也熟練地順便拿著摺凳進她房間 

「點呀，有邊到唔識呀？」我拿起題目看 

「呢到有幾題我昨晚諗極都唔明，咳咳」她指給我 

「嗯，唔係好難啫」 

我像之前那樣坐在她旁邊教 

但是她好像有點不太能集中精神聽我說

「你有冇專心聽緊架」我看到她聽的時候都只是托著頭 

「吓，有呀」她看著我說 

「哇你塊面做咩咁紅嘅？」 

「係咩」她用手摸一摸自己的臉頰 

我伸手撥開她的瀏海，然後把手放在她的額頭 

「你發燒喎」我說 

「係咩」 

「乜嘢係咩呀，唔好溫住喇，我陪你落去睇醫生啦」 

「唔駛啦，我抖陣就冇事」 

「唔得呀，一陣你暈咗點算呀，又冇人睇住你」 

「咁好啦」她拿著了電話，鑰匙和身份證便和我下樓了 

幸好她常去診所不算遠，所以她不用走太遠的路 

我叫她坐在一邊後，便幫她跟護士登記 

護士給她口探的探熱針來量體溫 

當登記完後，我看到她坐著玩手機 

「病就唔好玩手機啦」我搶了她的電話 

「冇嘢做吖嘛…」 

「訓陣教囉，反正仲有幾個先到你」 

「哦…」
她很快睡著了，而且不知不覺地把頭靠著我 

「黃思寧，請入醫生房」等了好幾個病人進出後醫生才用廣播說 

「到你喇」我拍醒了她 

她睡眼惺忪的，好像睡得很深 

我站了起來，對她伸手 

「行啦，我陪你入去」我把她拉了起來 

「唔駛啦」 

她拒絕我的好意，但是我還是強行跟了她進去 

「請坐吖，黃思寧下話？」女醫生問 

那個女醫生戴著眼鏡和口罩，頭髮有點斑白，看起來好像很有經驗 

阿寧坐在椅子上，我則站在一角 

「係呀」阿寧說 

「你有邊到覺得唔舒服呀？」女醫生問 

「有少少發燒囉」 

「嗯，呢個我知，你頭先差唔多去到39度」 

竟然燒得這麼高溫，到底她是怎樣撐到我發現的呢 

「咁你擘大個口等我睇吓呀」 

醫生用雪條那種棒和電筒不知道在看甚麼 

「嗯，冇乜嘢嘅，不過你仲有少少咳咁啦」

醫生一邊在紙上寫著我看不懂的字一邊說 

「而家你拉高件衫到心口到呀」醫生又說 

這時阿寧看了我一眼，我也很識趣地轉過身 

在差不多一分鐘的時間內，除了醫生叫她呼氣吸氣和阿寧的呼吸聲外 

房間靜得連我抓癢都聽得見 

「好喇，冇乜嘢嘅，係發燒同埋有兩聲咳啫，咁我開返兩隻藥比你食，咁仲有冇咩問題呢？」醫生說 

我轉了身回來 

「冇喇」阿寧說 

「咁你出去等護士叫你名啦」 

我們兩人走了出去，阿寧坐在沙發上 

「你喺到等我一陣，我一陣返」我說 

然後我便到了兩舖之隔的麵包店給她買了一個雞尾包 

回去時正好護士叫了她的名字 

我叫她坐著，然後便去了拿藥 

護士跟我說了哪種藥飯前吃哪種飯後吃 

我付了錢後便帶她出了診所 

「返屋企喇喎而家」我說 

「嗯」 

「駛唔駛我孭你呀？」

「唔駛啦，好近啫」 

「咁你一陣暈喺街我唔負責架」 

「咁…咁好啦」 

最後還是被我背到了家樓下 

我拿著鑰匙幫她開了門，她馬上回到自己的房間 

「食藥呀」我站在客廳說 

然後她又走出來 

「食邊隻呀？」她問 

「燈色就飯前，跟住食咗個麵包佢，再食白色同埋飲一格藥水」 

「哦…」 

我坐在沙發上，她則坐在飯桌吃藥 

「雞尾包嚟嘅？」她說 

「唔中意呀？」 

「唔係呀，你點知我中意架？」 

「沙加係最接近神嘅男人，我咪係最接近沙加嘅男人，所以我咪知囉」 

「邊個係沙加呀？都唔知你講乜…」 

算了，反正現在的人都不看我那年代的作品 

「啲藥應該會有睡意，咁你一陣…」 

「唔駛喇，我而家已經有睡意」她打斷我的說話