〔100%FF〕我愛上樓下個女仔: 十二

「咁但係唔識就係唔識喇嘛…」 

「咁你自己喺屋企都要溫吓架，次次見你都係我到先拎書出嚟，再唔係就係合埋」 

「我已經好比心機溫架喇」 

「我返去再睇吓搵唔搵到啲以前嘅筆記比你喇」 

「哦…」 



我站了起來 

「走喇？唔走呀？十二點幾喇，我要返工呀聽日…」我指著手錶說 

「諗住同你傾陣計啫，算啦」 

我看著她，然後坐了下來 

「好喇，陪你傾陣喇，一陣咋」我說 



「哦…」 

「咁你想傾咩呀？」 

「你講吓你同個姐姐都得掛」 

「又講佢呀？講到悶喇喎…」 

「做咩呀？你地鬧交呀？」 



「冇呀…」 

「咁你好似唔想提咁嘅？」 

「因為佢要返去日本，而且我地亦都唔會一齊喇」 

「點解呀…」

「可能係因為你之前講得啱啦，我根本就唔了解佢…」 
「所以我坦白同佢講咗我嘅諗法」 
「不過做唔到情侶，做普通朋友都得啫」 

最後那句某程度上也是跟阿寧說的 

「即係，我拆散你地呀…？」她好像有點內疚 



「咁又唔係…」 

「你又會捨得比佢走都有嘅…」 

其實這樣豈不是讓她少了一個情敵嗎… 

「唔同你講喇，今次真係要走喇」我再次站了起來 

「哦…」 

「記得自己溫書呀」 

「知喇…」 



「係喎，我記得你好似講過話你會自己溫，等到三月尾先叫我幫你補習，但係而家好似冇咗件事喎」 

我突然想起她說過這樣的話，那麼我就有藉口可以不來了 

「有咩？」她自己則不記得了 

「好似有」 

「定係其實你唔想幫我咋…」被她說穿了 

「點會呢，就算我唔嚟，我都可以比啲筆記你溫書啫」 

「咁好啦，我自己努力吓啦」她被我說服了

「同埋我公司嗰邊少咗個人，會好忙，可能好似今日咁遲收工，未必日日幫到你補習」我走到外面 



「知你忙喎，咁你搵到就比啲筆記我，我自己睇吓可唔可以無師自通啦…」她也跟了出來 

「哦，咁你自己要加油呀」我在她關上門前說 


早上起床，又是去工作的時候 

這天還是要等到會計的同事走了才可以回家 

這晚我回家的時候已經是十時 

以前在中環上班或是跟阿晴吃飯後回家才會是這個時間 

沒想到現在工作的地方近了但卻這麼晚才下班 



幸好的是，明天一個新的會計員工會過來直至找到其他人代替 

害我還以為晚下班的情況會持續 

我在自己的抽屜翻了一會兒，才找到當時的生物筆記 

不知為何即使很多東西舊了我卻不捨得丟去 

當然連感情也是一樣… 

我一邊下樓梯，一邊打電話給阿寧 

「喂？」這次是她先說話 

「開門吖」在電話接通的過程我已經下了一層樓 

然後掛上電話在她家外面等了不用十秒，她便開門 

「入嚟吖」阿寧說

「唔駛喇，我嚟比本筆記你咋」 

我遞了那本筆記給她 

「你啱啱先放工呀？」 

「係呀，忙吖嘛」我回到家換了衣服才下來 

「咁晏嘅…你比本筆記我，咁今日開始直到三月尾都唔幫我補習喇喎？」 

「好快啫，而家都已經三月啦，不過你有咩都可以搵我，唔好咁頻就得喇…」 

「咁你而家返上去喇？」 

「唔係呀，屋企啲飯餸入哂雪櫃，要落街醫吓肚」 

「咁一齊啦」 

「唔好喇掛，你唔係要溫書咩？」 

「咁可以一陣先溫啫，落去食吓嘢有精神啲呀」 

「你都講到咁喇，我冇理由趕你返入去溫書架」 

「嘻嘻，等我攞銀包先」她想回到裡面 

「唔駛啦，我請你食嘢咪得囉」我拉住她的手 

她回頭看著我，我過了一秒才意識到，然後馬上鬆開手 

「sorry…」我說 

「唔緊要…我入去拎返條鎖匙」 

「哦…」 

我站在她家門外面等著，也在想剛剛是否又做錯了甚麼會令她誤會的事

「行得喇」她拿完鑰匙後順手關上門 

我聽到她這樣說便走向後樓梯的方向 

「有『車立』都唔搭呀？」 

然後我便用倒退的方式走回來 

「哈哈，傻仔」她笑著說 

很快升降機便從下面一層上來了 

進入升降機我反而感到更尷尬，可能是因為空間太小了吧 

可能她也感到尷尬，所以我們兩人沒說話 

因為不少的茶餐廳都差不多要關門了 

所以我們決定到7-11買東西 

但是路上我們都沒有對話 

「係呢，你溫咗成日溫成點呀？」我打破沉默 

「OK啦，算係明你尋日講嗰幾部分啦」 

「不過生物應該唔係太早考，我覺得你應該溫哂其他科先囉」 

「一早識哂啦」 

「咁犀利？咁睇嚟唔駛我幫你補啦」 

「咁緊係唔得啦」她突然大聲的說，並停了下來 

「噓，夜媽媽仲咁大聲」我作出一個叫她安靜的動作 

「對唔住囉」她用手掩著口說

「不過你都識哂，咁你自己溫咪得囉，生物等你考完主科之後再教你都得啦」 

「咁…咁你都要幫我復習吓架…」 

「咁算啦，呢啲之後再傾啦」我手插回褲袋再次走了起來 

她也追上我和我並肩而行 

「唔好講溫書，我地又講吓感情嘢啦」阿寧看著我說 

「你有感情問題咩？」我把頭望回前方 

「Er…」 

「咁你都冇感情嘢又點同你傾喎」 

「咁你想點先」 

「鋼之鍊金術師你知咩喇掛」我說了一個較接近她年代的動畫 

「唔識」 

她一臉疑問的樣子，我真是拿她沒辦法 

「等價交換呀…」這四字詞她應該聽懂了吧 

「嗯…咁你同我講我再同返你講囉…」 

我突然想起她喜歡的是我 

如果我問她的感情問題不就弄到自己了嗎？ 

「算喇，我好人啲，唔駛你講，你問我問題我答喇」幸好我聰明 

「哦…你畢業到未見佢之前，有冇掛住嗰個姐姐呀？」 

這個問題讓我有點煩惱

「有就緊係有，不過一時時囉」我說 

「咁多年都只係一時時咋？」 

「我中五完咗讀一年半書，四年大學，出嚟做咗兩年幾嘢，就算有間唔中掛住都正常啫」 
「更何況我呢兩年瘋狂做嘢，日日都咁忙，又邊會得閒成日掛住佢喎」 

「咁你又會咁長情都有嘅…」 

「我個年代嘅小學生又點會識咩叫拍拖呀，去到中學青春期先知咩係女」 
「佢又咁啱係我第一個中意嘅女仔，而且追極都追唔到，咁我又點會唔長情呢？」 

「咁純嘅你…」 

「pure and ture」 

「呢句唔係形容女仔架咩？」 

「你識咩吖」 

一邊走一邊聊著天，很快便到了7-11 

我幫她拉著門，她也跟我道謝 

雖說我不想令她誤會，但必要的禮儀我還是有的 

「你想食咩就自己去拎啦」我說 

「你請？」 

「係呀…」 

然後我便走到急凍食品那邊 

選了一會兒才選擇揚州炒飯 

而平時到茶餐廳我也多數是吃這樣

「駛唔駛睇咁耐呀？」我走到雪糕櫃那邊找她 

「隻隻都好似好好食咁…」她目不轉睛的看著 

「我連嘢飲都揀好喇…」 

「咁你咪比住錢先囉」 

「又話食宵夜，邊有人食雪糕當宵夜架…」 

「我囉，哈哈」她笑著看著我 

「哼，真係冇你扶」我也發自內心的笑了 

都不知道她是可愛還是弱智 

選了一會兒後，她選了kit-kat那種甜筒 

「好食咩？」我和她一起去付錢 

「唔知呀，我都未食過」 

「咁你又揀？」 

「我見有舊朱古力喺上面咪試吓囉」 

付了錢後，我便拿了飯盒到微波爐 

調好時間後，我便扭開那支『張學友』奶茶來喝 

我眼角看一下阿寧，她打開包裝後咬了一口 

「好好食呀」她的演技比食神的味公主家燕姐還誇張 

害我差點笑得把口中的奶茶噴了出來 

就像第二次見她那時候被她開噴一樣

「咁大個仲中意食雪糕…」我看看到她吃得津津有味 

「做咩呀，你羨慕呀？」 

「我似咁小學雞咩」 

「最多比你咬啖喇」她把甜筒遞到我面前 

「唔食，一陣又凍又熱食落肚會肚痛」我別過面 

「咁你又飲凍嘢」 

無法反駁… 

剛好我的飯盒叮好了，我把它拿了出來，然後開吃 

「講返頭先吖，你同個姐姐都冇見咁耐，你冇中意過第二個女仔咩？」她吃一口雪糕 

「冇喎，我咁多年嚟識啲女多數都唔掂」 

「你奄尖咋掛」 

「你覺得係咪係囉」我吃一口炒飯 

「唓，講吓笑啫，駛唔駛咁呀…」 

她把底部的尖也吃了，然後拍拍雙手 

「食到咁污糟架…」我看到她嘴角有些朱古力 

便從褲袋拿出衛生紙幫她擦嘴 

但下一秒我就醒過來，捉著她的手把衛生紙交給她 

「好少見有男仔會帶紙巾出街喎…」她拿著衛生紙擦著說 

「呢幾日有少少流鼻水，所以先隨身帶住啫」

「等我仲以為你係個細心嘅男仔添」 

「其實我一啲都唔好，所以第時我女朋友應該會好慘」 

這句話我是對她說的 

「算啦，你識到其他女仔先諗女朋友呢樣嘢啦」 

但她好像聽不出來，接著還跟我繼續說其他的話題 

因為一邊吃一邊聊天，所以吃得很慢 

「食飽，我地返去囉」我一邊扭開奶茶的蓋一邊說 

「哦」 

然後我們便走出7-11 

「好凍喎出面」我說 

「係囉，頭先都冇咁凍」 

「咁你仲食雪糕…」 

「唔得咩？」 

「咁又冇話唔得…」 

「有童真，唔好咩？」 

「係好…不過你食到成個細佬女咁成個嘴都污糟哂，我諗唔關童真事喇掛…」 

這次輪到她無話可說 

「記得返屋企要溫書呀」我叮囑她 

「長氣鬼，而家都仲未返到去」

「怕你太懶成日唔溫書咋」 

「日日溫書已經好辛苦喇…」 

「第日你出嚟做嘢就知咩係真正辛苦喇」 

「講到好似自己返過好多工咁…」 

「我起碼都叫讀緊書嗰陣有做過幾年兼職吖，不過我諗你就未返過喇」 

「考完試之後咪開始返parttime囉」 

「唔好講到咁長遠喇，你考好個試先啦」我看著她說 

「其實你點解要咁緊張我啲成績呢？」 

「咁話哂幫你補習，你考得差咪搞到好似我教得差咁囉」 

「不過你又冇收錢，呢排又成日都咁認真咁教我…」 

「唔好咩？」 

「唔係，好似有啲唔妥咁囉…」 

她這樣懷疑也是正常的，畢竟我近來都只是專心教她 

反而跟她說少了閒話，因為我只想快快教完就回家 

不想和她有太多交流… 

「如果你考得好我就好欣慰喇，唔好諗咁多啦」 

「哦…」 

一路上聊著天，很快地便回到家樓下 

剛好看更也換班了

又是那個每次阿寧喝醉都碰到的看更 

「方生」他向我打招呼 

然後阿寧按了升降機的按鈕 

突然那看更走了過來 

「今日你兩個冇人飲醉嘅？」看更走到我另一邊低聲問 

「做咩咁問？」我反問他 

「冇，八掛吓啫，平時多數你兩個出現都係其中一個醉啫」 

「冇飲酒咪唔飲醉囉」 

「不過呢，你地咩關係架？」 

「朋友囉…」 

「其實我覺得你地幾襯喎，可以考慮吓發展…」 

他突然停止說話，是因為我用凶狠的眼神看著他 

「我…我…我去巡樓先喇」 

他說完便回到座位拿出電筒 

也順便把牌子由當值中改為巡邏中 

然後便走到後樓梯的方向 

正好升降機也到了，我和阿寧便進去 

她按了自己的樓層後，我也伸手去按 

但是她還順道幫我按了

因此情景就變成我的手指壓在她的手指上 

「Sorry…」我馬上縮開手 

「唔緊要…」她說 
「係呢，個看更頭先同你講咩呀？」 

「啲無謂嘢啫…」 

「係咩？我見你地細細聲，好似傾緊大事喎…」 

「有咩，你誤會咋掛…」 

「你同佢好熟架？」 

「緊係唔係啦，我同佢見得幾次面咋喎…」 

「咁又會咁好傾嘅？」 

我頓時不知如何回答，幸好升降機到了她那一層 

「到喇」我推著她出去 

我把半個身子露出升降機，把門卡住 

「做咩呀你？」 

「睇住你入去囉，一陣你唔見咗你屋企人又打比我架喇」 

「點會唔見呀…」 

「唔知架，可能你會比人捉走掛」 

「我地入咗大廈喇喎…」 

「唔同你拗喇，快啲開門入去啦」 

她拿出鑰匙插進門內

然後我還看著她開了門 

「咁而家你走得啦？」她回頭看著我說 

「記得溫書呀」我臨回到升降機對她說 

「得喇，長氣鬼」 

接著聽到關上門的聲音後，我才關上升降機門 

其實我只要走一層便可以回到自己家 

但是又怕碰到那看更… 


第二天早上，我又是早了回到公司 

因為新的同事要來，我也要看一下她的資料 

原來是個女生，而且還是大學畢業剛出來工作不久 

加上清早還要找所有人到會議室自我介紹 

做這麼多事就是為了給新同事一個好印象… 

雖然說這邊請到新的員工的話，她便要回到原本的地方 

但是找了這麼久還是一點回音都沒有，看來她要在公司待一段時間 

而那個舊的會計同事也用感激的眼神看著我 

在大家離開會議室後，他站在外面把我叫停了 

「經理，經理…」他截停了我 

「做咩呀…」 

「唔該哂你呀，我終於唔駛咁晏收工喇」

「其實都係幫我自己啫…」 

「總之點都好，今次唔該哂你，一陣食飯，我請」 

「唔係掛，我咁啱想話有新同事，所以請大家食飯喎」 

接著我看到他面有難色 

「Er…咁呀，一係有咩吩咐都得架，買嘢飲，嘢食」 
「怎至你叫我帶你去叫雞都得架」他後面那句是貼近我耳邊說的 

「叫雞？」我嚇了一跳 

「噓…唔好咁大聲呀」他十分緊張，幾乎想把我的口掩著 

「你唔係有老婆，又有個女咩？仲叫雞？」 

「男人叫雞好平常啫」 

他說的這句令我回想到阿婆報警那個笑話 

「呢啲嘢都係唔好搞我好啲喇」我馬上走開 

「唔係呢，經理呀…」他繼續跟著我 

我叫他先回座位工作，其他的事以後再說 

接著大家中午到茶樓吃飯時，他還是坐在我旁邊煩著我 

我也轉移話題跟他聊了好一會兒天 

還拜託他好好教一下新同事 

結果他回到公司還是煩著我 

我便隨便打發他叫他去買咖啡給大家喝 

這樣也算是他還了我一個人情