到了下班的時間,德頌突然到訪 

本來準備好下班的同事都急忙假裝還在工作 

我也離開房間並走到外面 

「你地唔駛咁緊張喎,我嚟睇吓新同事咋喎」 

他看一下手錶 



「都就快收工喇,有事做嘅話就走先啦」 

其他人互相看對方眼色,然後一個一個的收拾東西 

「搞咩呀老細?」我這時走到他旁邊 

這時我看到她的女朋友兼秘書mimi,跟她打了個招呼 

「叫佢地收工咋嘛,唔得咩?」 



「平時你冇嚟嘅話,我諗佢地可能仲早收工呀」 

「哇,原來成班冗員嚟架?」 

「唔好講咁多喇,有咩事要麻煩你大駕光臨呀?」 

「睇吓我表妹做嘢做成點囉,同埋順便搵你」 

「表妹?」 



原來新同事是他的表妹,難怪她零工作經驗卻能來這家公司 

和我一樣,她也是靠人際關係的 

他們在外面聊天,我則回到房間看著文件等他們 

過了一會兒,德頌敲我的房門

「駛唔駛敲門呀,你係老闆嚟喎」我說 


「禮貌上敲吓啫,等你就算睇緊AV都知我要入嚟吖嘛」 

「咁你講得你嚟搵我做咩未呢大少?」我合起文件夾並放下 

「冇,諗住安慰吓你,陪你去飲酒啫」他坐在我對面的椅子 



「安咩慰呀?」 

「唔係吓話?你條女要返日本你都唔知?」 

「知,第一個知咁濟啦」 

「係咩,我都係聽班中學友講先知咋喎」 

「咁…咁佢返日本又點呀?」 

「你唔係應該好唔開心架咩?上次你又飲醉哂又盛喎」 

「以前嘅事,放低哂啦」 



「挑,懶係瀟灑咁,一定係有第二個先唔要佢啦,難得人地咁靚女,嘥哂」 

「邊嚟第二個,搞笑咩?」我笑著說 

「冇?一睇就知你中意樓下個女仔啦」 

「何出此言呢,呀哥仔?」 

「上次去你屋企慶生嗰陣,你話去拎嘢飲,拎咗成個鐘咁濟」 

「你吹得有啲大喎…」 

「咪扮啦,同人地傾計傾到嘻嘻哈哈咁,仲要上次去你屋企拎嘢比你嗰陣,你阿媽話你落去幫人補習」 

「幾時呀?拎咩比我呀?」



「我去日本嗰陣叫我幫你買嗰隻figure呀」 


「哦…」 

「Hi,一點幾都補緊,都唔知你補咩習」 

「Hi,我地補習係好正經架」 

「Hi Hi啦,邪骨會唔會喺外面放個招牌同人講話佢地自己係做邪骨吖?」 

雖然他說的是歪理,說得又好像很有道理… 

「唉,當我唔夠你講喇」 



「不過講真吖,你冇見李韻晴咁耐啦,變咗心都好正常啫,你地又成日一齊相處,始終都係近水樓台…」 

他未說完,便被敲門聲打斷 

「你女朋友搵你喇」我看一看門外面 

「弊,唔記得約咗佢屋企人食飯添」他看一看手錶 

「呵呵,你今次大獲喇」 

「走先喇,有咩事下次再講啦」 

說完他便急忙的飛奔出去 

因為和德頌聊天,所以我的工作也被拖後了一會 

幸好回家時還算早,終於能和他們坐在一起吃飯 

吃完飯後突然我哥跟我爸說從今天起要下去跑步 

平日他們都不會幹這種事,這令我有點意外 

原來他們已經準備好禮服,所以希望在我哥半年後結婚時還能合身

很快地便到了三月的最後一個星期 


在我上班的時候阿寧傳訊息給我 

這時我才意識到原來我沒幫她補習快兩星期了 

但要來的還是要來… 

我在facebook上看到阿晴回到日本了,而且還升職加薪 

看到下面的留言全都是恭喜她之類的說話 

但是我連讚好都不敢按下去… 

這天下班後,我如常回家的和家人吃飯 

我爸和我哥真的堅持了每天都認真的下去跑步 

而我這天開始又要重新的每天幫阿寧補習 

我洗了澡後穿了拖鞋準備下去 

「去邊呀?」我媽一邊洗碗一邊問 

「落去幫阿寧補習呀」 

「竟然?我仲以為已經冇補添」 

她還未說完我已經開了門走了出去 

如常的下了一層樓梯,接著按下門鈴 

「域仔?好耐冇見喇,咁夜落嚟做咩呀?」這次是姨姨開門 

「幫阿寧補習…」 

「係呀?我仲以為你已經冇幫佢補添」她說了和我媽一樣的說話

我走了進去,但是家中只有姨姨一個人 


「阿寧話要去7-11買嘢呀,你喺到坐陣先啦」姨姨對我說 

「哦…」 

但是我沒有乖乖的坐在客廳,而是偷偷的進了阿寧的房間 

我看一下書桌,沒有以前那麼亂,而且有兩本筆記放在桌上 

一本是她自己寫的,另一本則是我給她那本生物筆記 

沒想到她真的有認真地溫習呢… 

接著我便看到櫃子的一個抽屜沒關上 

我認出來那是她放日記的地方 

再一次受到好奇心的驅使下,我又拿起她的筆記來看 

我翻到最新一頁,發現上一次她寫日記的時候是我和她到7-11那天 

接著的頁數都是空白的 

  「今日又係溫書溫到悶嘅一日,本來諗住就咁就完喇,點知方哥哥拎本筆記落嚟,同埋話自己要去7-11食嘢,咁我就當然要跟埋去啦,臨行之前佢捉住我隻手,可惜好快就放開咗…」 

原來她的本意真的不是去吃宵夜,只是想跟著我… 

  「一路同佢傾計,原來佢仲掛住個姐姐,搞到我有少少呷醋,不過呢啲都唔緊要。一路行嗰陣其實我有不斷行近佢嗰邊,不過佢好似feel唔到咁,靜係一味同我傾計,好快行到7-11,其實我唔多肚餓,不過都想搵吓飯後甜品食吓,所以揀咗雪糕。不過過咗一陣我就後悔喇,因為雪糕可以食得好快,搞到我同佢嘅相處時間會短咗,」 

這丫頭真的想得周到…

「同埋最感動係佢用紙巾幫我抺嘴呀,不過又係好快就比返張紙巾我自己抺,其實我覺得佢好似有少少避開我咁,唔通佢feel到我中意佢?不過諗諗吓又覺得係自己多疑…不過佢知道都唔係咩問題嘅,佢冇拒絕我就得喇。」 

那麼現在是提醒我要拒絕她嗎? 

算了還是先假裝不知道比較好 

讓她把這個文憑試考完才跟她說清楚吧 

這樣我相信她會專心一些… 

  「本身我以為我地好快就食完走人啦,但係好彩方哥哥佢食嘢食得好慢,所以我地先傾咗好耐計,」 

原來是我給了她一次助攻… 

但事實好像是因為跟她聊天所以才吃得慢,所以她反過來說了… 

 「返去嗰陣,佢有不停強調要我考好個試佢,同埋要比心機溫書,咁我就緊係唔可以辜負佢嘅期望啦,所以日記等到我再見到方哥哥嗰陣再寫啦,哈哈」 

那就是說今天開始她會重新開始寫日記的意思嗎? 

但是有一點令我在意的是她把看更跟我說話那部分跳過了 

應該是對她而言那個看更並不是甚麼重要角色吧… 

正當我想翻到前一頁繼續看的時候 

門鐘響起了,我也急忙的把日記放回原位 

再坐在書桌前假裝看她的筆記 

然後我聽到外面傳來阿寧和姨姨的對話 

過了幾秒阿寧便走了進來

「咁快到嘅?」她問 


「食完飯咪落嚟囉」 

「咁你等咗好耐呀?」 

「一陣啦」 

她看一眼自己放日記的抽屜,確定我沒有拿過出來看 

「咁你喺我間房做咩呀?」 

「睇吓你溫書溫成點囉」 

「好比心機咁溫架」 

「我知,見你做哂筆記咁」 

「有時我都覺得自己專心到有啲離譜」 

「係喇,冇人知你喺秀做咩,你點講都得架啦」 

「我講真架」 

「如果你係講假嘅話就慘喇,下個星期五就要考」 

「唔緊要啦,中文啫」 

「中文先易死呀,如果你有做開卷嘅話我就放心啲喇」 

「有嘅,同埋我都有啲信心」 

「係就好喇,咁開始喇喎」 

「咁快開始教嘢?我地傾陣計先啦...」 

「小姐,頭先咪話你下個星期五就開始考囉,仲傾計?」

「一陣啫…」她用哀求的眼神看著我 

「唉,好喇好喇」 

「話說我頭先喺樓下見到你阿哥同阿爸跑緊步喎」 

「我知吖」 

「你又唔跟佢地一齊跑嘅?」 

「唔啦,應付你已經好忙喇」 

「哦…原來你幫我補習只係應付我…」 

「講吓笑啫」 

「哼,唔理你喇,開始啦」 

「係咪咁小氣呀…」我開始有點慌張起來 

「哈哈,玩吓你咋」她笑著看著我 

「唓,唔傾計喇,真係要開始認真喇」 

「哦…」 

接著下來便是補習時間,而她還是一直想跟我聊別的 

所以到了後來又變成了聊天時間… 

「唉,傾吓傾吓又到十二點半喇…」 

「唔好咩?一邊傾一邊溫」 

「你就緊係覺得好啦」 

「考嗰個係我,又唔係你」

「如果可以嘅話,我都想代你去考呀…」 

「對我冇信心咁話喇喎?」 

「都幾冇信心吓架」 

「哼,我就考好佢比你睇」她拿起筆看著題目 

看著她深深不忿的樣子真是好笑 

「仲溫呀?」我問 

「要考好比你睇吖嘛」她繼續看著題目沒理會我 

我站了起來,準備離開 

「哈哈,咁你要比心機呀」我摸摸她的頭 

然後又是我自行離開的時候 

想她這麼勤奮的樣子,我便決定送她一份禮物鼓勵她 

但也是我第一次送禮物給女生 

所以我對送甚麼東西毫無頭緒 

正好在我上班時對這問題有所煩惱時 

德頌的表妹,那個新員工走了進來 

「哇,你嚟得啱喇」我跟她說 

「我?」 

「係呀你坐低先啦」 

她坐在我對面,樣子好像十分不知所措

「Er…」我忘記了她的名字甚麼 

「我叫王樂宜呀」 

「唔好意思呀,樂宜,我咁樣叫你得唔得呀?」 

「哦…冇問題,係咪有咩事搵我…」 

「少少私人嘢啫…」 

「私人嘢?」 

「係呀,我見你咁後生,所以我…」 

「經理唔好意思呀,我唔係啲咁嘅人」她打斷我的說話 

「你誤會咗喇,其實我係想問吓你地女仔中意啲咩禮物啫…」 

她和上次進來那個Judy一樣誤會我 

難道我的樣子像這樣的人嗎… 

「如果係我男朋友嘅話…應該會送花之類掛」 

沒想到剛畢業的大學生都會的對禮物的要求這麼低… 

「不過咁樣好冇誠意囉,買花行街嗰陣拎住又比人望,又易謝,唔襟擺」她接著說 

原來是我想多了… 

「咁…有咩係會得你地中意架?」我問 

「名牌袋囉,或者送條鏈都好」 

我真的替她的男朋友感到有點可憐 

「咁如果係細過你少少嘅女仔呢?」我又問

「吓?應該所有年紀嘅女人都中意呢啲架啦…」 


「哦…咁好啦,你出返去做嘢啦」 

「哦…」她站起來走到門口 
「不過呢,送禮物最重要都係份心意啫,所以我男朋友就算送花比我都好冧」 

「哦,唔該哂你」 

沒想到她最後說的那句話才是最有用的 

但是上了一整天的班,所以都沒空想送甚麼 

臨近下班的時候,我打算走到茶水間倒水 

正好有Mary姐和另一個女同事在聊天 

她們好像沒察覺到我路過了 

「點呀覺得靚唔靚呀?」Mary姐問那個女同事 

「如果少隻藍色會靚啲囉」 

「我覺得有隻藍色喺上面都幾好睇喎」 

「係咩?我反正覺得有少少唔夾喎…」 

於是我在離開前偷看一下她們在看甚麼 

「哇」那女同事一轉頭便看到我 
「嚇死人咩經理…你行路冇聲嘅…」 

「唔好意思呀…」我也被她的反應嚇到 

「你幾時喺到架?係呢你覺得靚唔靚呀?」Mary姐問 

「我都覺得藍色太多餘」我說完便離開了

於是下班後我便到了旺角一個人漫無目的地走 


「先生,隨便睇吓喎」那店員看到我把鞋拿了起來才走過來 

Mary姐和那女同事就是在說鞋的樣式 

也是令我想到要送甚麼給阿寧的原因 

我看了好一陣子,因為我沒買過女裝鞋,也不知道她喜歡甚麼顏色 

接著又到了好幾間鞋店,但都沒有看得上眼的 

這時我看到一個大陸女人把一隻粉紅色的鞋放回鞋架上 

我覺得應該適合她穿,所以看了好一會兒 

我把那隻鞋走到一個店員面前 

「唔該我想睇吓呢隻鞋呀」 

「好呀,你著幾多號鞋架?」店員問我 

「呢隻唔係女裝鞋咩...」 

「呢隻鞋係男女裝都有」 

「哦…」 

「咁先生請問你著幾多號鞋呢?」 

「唔係我著…」 

「哦,咁你係咪買比女朋友架?」 

「買比女性朋友…」 

「哦,咁你女朋友著幾多號鞋呀?」他好像聽不出分別…

「我都唔係好知喎…」 


「咁一係你打個電話比佢問問吖,轉頭我再過嚟幫幫你呀」 

說完他便走到其他客人面前,而我便拿起電話打給阿寧 

「喂?打比我做咩呀?」她接了電話 

「冇,我想問啲嘢啫」 

「咁到底係冇,定你想問啲嘢呀?」 

「冇,我想問啲嘢啫」 

「九唔搭八,想問咩呀?」 

我突然想起要是我現在問了,那麼便不算驚喜了 

「你做緊咩呀?」我問 

「溫書囉,仲可以做咩呀?」 

「哦…」 

「吓?你打過嚟靜係問呢啲無聊嘢咋?」 

「我…我check吓你有冇認真溫書啫」 

「唓,咁我就算講大話你都唔知啦」 

「即係你講緊大話?」 

「咁又唔係…我全日都好比心機溫書架」 

「我信你喎」我一邊看別的鞋款一邊說 

「又會咁好死今次唔窒我嘅」

「你好想我窒你咩?」 


「咁又唔係喎,係有啲唔慣啫」 

「哦」 

「點解你嗰邊咁嘈嘅?乜你收咗工喇?」 

「Er…係呀,喺旺角…」糟了,不小心說了出來 

「喺旺角?」 

「係呀…喺無印良品買緊文具」 

「奢侈」 

「你都係用緊無印啦…」 

「點同,你返工公司有比文具你,我啲筆用自己錢架」 

「係咩?咁我得閒送幾枝筆比你囉」 

「就而家順便買啦」 

「下次先啦」我不想從波鞋街走到朗豪坊… 

「唔準走數架」 

「我似啲咁嘅人咩?」 

「唔似,你的確係」 

「唔同你拗喇,收線喇」 

「哦,bye…」 

她沒說完便自己掛了電話…

我準備離開店舖,反正又問不到她的鞋號是甚麼 

「先生,走喇?」剛剛那店員看到我 

「係呀...我問到佢著幾多號鞋先啦...」 

「哦,好啦,歡迎下次光臨」 

他說完又去找其他的客人 

接著當然又是回家的時候 

這天他們吃飽後忙著婚禮的其他細節 

我也照樣的置諸不理,反正又不是我結婚 

然後我洗好澡便下去了 

「其實我有諗過比條鎖匙你」阿寧打開門說 

「吓?」我有點搞不清狀況 

「因為我覺得日日都開門比你好麻煩...」她轉身走回房間 

「係咪開個門都懶呀...」我說 

接著我便把鞋放好,這時剛好看到鞋架 

我看到一雙護士鞋,應是阿寧上學時穿的 

正當我打算把鞋反到裡面看一下是多少號的鞋時,她從房間裡叫我 

「你喺外面搞咩呀?」她從房間向外說 

「放好對鞋啫...」我也回話