完美.情人?: 第九章:心跳.回憶

而家我全身好似散晒咁,完全發唔到力訓左係張床度。百無了賴,唯有合埋雙眼回想返一件往事...
「叮噹!叮噹!」我禁左兩下門鐘,過左一陣門先至打開...
「啊!老細,我請左病假個喎,你唔係唔信我要自己上來睇我呀?」June一臉倦容打開門,由於當時係冬天,佢著左件厚既衛衣加條長褲。見佢頭髮蓬鬆,可知佢啱啱先訓醒。
「無見你平時少請病假,咪上來睇下你囉...」依個係我其中一個理由。
「咁我仲未死既,感冒啫。入來坐,有位既話...」
「你食左野未?」我見佢屋企凌亂,書同雜誌通地放,而茶几上有個膠袋包住個外賣膠兜,仲有一個淨返啲湯既柸麵柸...
「吓?我朝早落街買左碗粥,訓左陣,跟住晏晝食左個柸麵,訓到而家,講開又少少肚餓,啊!你係度啱啦,幫我買碗粥返來丫,唔該!」
講完佢就返房訓覺,而我就攞佢條鎖匙落街買野...
「喂,起身食野喇!」
「吓?哦!」佢睡眼醒鬆咁起身,坐係櫈度雙眼仲合埋...


「喂,食野喇!」我將碗粥擺左係佢面前。
「唔?你煲既?」佢食左一口就對我問。
「係呀!我頭先買左啲野食,買左米煲粥,順手幫你執下間屋囉。」
「哦!啲粥...你無落鹽呀?」
「你病要食清淡啲...」其實係我唔記得落...
「咦?今日23號喎,你無約人咩?」
「我想約果個今日病左,所以我今日係度...」
「呢排係多人病...咪佢咁啱又病呀?」
我無講野淨係望住佢,而佢擰歪左塊面,塊面仲有少少紅。
「咁今晚既燭光晚餐唔係淨得依碗粥呀?」


「梗係唔會喇!」
我慢慢睜開眼,發現一個熟悉既身影企左係床尾,佢擰轉身...
「June!」我嗌左出聲...
「咩June呀?Judy!依度有個靚護士叫阿June咩?」係April,佢同Judy過來探我。
「Judy,你果頭?」
「佢啊,無啦啦今日話要剪短把頭髮,又話要剪依個髮型,我咪帶佢去剪囉!哎呀!唔記得開返單添,蝕左...」
開頭設計阿Judy時,都無留意個樣似June既(可能長髮既關係),而家佢剪左同June一模一樣既髮型,基本上同June一個餅印一樣。
「係喇,你地來探我咁好既。」
「係Judy話呢兩日唔見你,有啲掛住你先來探你。睇唔出你身體咁差,之前就暈船浪,而家就入醫院。」睇來阿Roy無將我啲野講俾佢地知...
我勉強撐起身,見到Judy攞緊碗粥過來。


「睇熱呀。你唔好聽佢講呀,只係唔見你有啲奇怪既感覺...」Judy溫柔咁遞碗粥俾我,依一刻我好想佢餵我,但疑於April係度費時尷尬...
「咚咚...」兩聲敲門聲後,門就打開,一個人就入左來...
「阿俊,你點呀?」
「阿爺?阿Roy話你知我入院嫁?」
「你個衰仔,你想瞞到阿爺幾時...」阿爺發覺有兩個女人係度,慢慢將音量收細,同時對住我陰陰咀咁笑,基本上我已知佢諗咩...
「依個我阿爺,依個Judy,依個April...」我介紹阿爺俾Judy同April,而阿爺亦展現佢久違左既紳士風度...
「叫我Matt得喇,nice to meet you!」阿爺同佢地握手,然而當阿爺同Judy握手時,阿爺皺一皺眉頭...
「仲等我煲粥左粥俾你,而家唔使啦!」
「梗係要喇,阿爺既粥喎!」其實阿爺煮野唔差,不過費時佢操勞先整Anna俾佢。
我地係病房傾計,知道我入院後阿Roy幫我處理公司啲野,而依兩日都無特別事。其實相對於公司,我比較在意Judy既系統發展。
「好喇,我都要返屋企!你好好休息喇!」阿爺起身就行左出去,但我好似見到佢撩緊護士傾計...
「咁我同Judy都唔阻你喇,聽日先再探你喇,拜拜!」
佢地走晒後,我落床去廁所,望住塊鏡,我除左件衫,望住被繃帶包紮住既胸口,再將手放在心口感受心跳。每一下心跳,就好似每一下活著既感覺,再回望依個本應十年前死去既身體,確實有說不出既感受。我以為我個心早係十年前已死,對四周既事物已無感覺,估唔卻因一連串回憶撼動著,每一下心跳,就好似喚醒返我既情感一樣...
突然我聽到開門聲,行出廁所,就見到April好驚訝咁望住我...
「我...我好似漏低左野...我搵下先...唔好意思...」


我仲聽到佢好細聲講「去廁所都唔關門既」,跟住搵返啲野就走。依個係佢第二次見我無著衫,其實佢係唔係特登嫁?