「Henry,好耐無見。」連聲音都一樣,「差唔多十年喇,別來無恙嗎?」
此刻Danny講野好平靜,但咁樣反而令我覺得佢更詭異。環顧四周,而家只有我同佢係一條一米闊長既走廊,兩旁都係伺服器,要逃走只有佢身後既路,即係我而家無路可逃...
「點解?」我而家只有一個問題...
「點解?你指點解我要入侵系統?因為我要控制機器製造依個身體。」
唔係...
「點解我要控制啲服務員襲擊你?因為要爭取時間造依個身體。」
唔係...
「點解我要引導你來依度?因為我想同你單獨見面。」
唔係...
「點解你要殺阿June啊?」


「因為我鍾意阿June...」依個答案霎時令我困擾,「就因為我鍾意佢,而我知道我係個機械人,同佢係無可能,所以我想成為你,咁我就可以同佢一齊。但不久之後,我發現缺少左一樣野,係靈魂。」
震驚既唔係佢話鍾意阿June,而係佢扭曲既思想,「所以當日你就...」
「無錯,當日我一心打算搵靈魂既構造,但失敗左,更令June死亡,之後...」
聽住佢自白,我個頓時產生複雜既感情,一方面佢係殺阿June既兇手,一方面佢又係我同June既心血結晶,就好似當年我唔忍心將佢刪除一樣,但我而家明白,我有一樣野非做不可!
「點解你想成為我?」我偷偷攞出手槍...
「唔知,或者係阿June既關係,或者係你造我出來既關係,又或者你同我好似人類父子關係咁,我都唔可以俾個正確答案你,總之我一路學習,漸漸將你成為左目標咁...」
「咁之後你打算點?」
「過去,我只會服從你地既指示,努力學做人類,但而家我反而有第二種想法,我唔一定須要成為人,我只希望可以一直活下去...」
槍已經指住Danny,只要手指拉一下,所有事情就會結束...
「我唔會反抗,我體諒你,始終我係殺June既兇手,而且只要你開槍,所有野都會煙消雲散,對你來講可以話係一種解脫。」


解脫對我來講太奢侈...
「可以問你一個問題嗎?」Danny突然提出。
我點頭...
「當初點解要創造我出來?」
我反思自己創造佢既目的,的確當時我同阿June只係單純咁想提升人工智能既功能,但漸漸我地便迷失,單純既想法已不再...創造人類既想法營運而生,一樣神先可以做既事情,我地妄想擁有,懲罰,或者係我地應得...
我答唔出答案,握槍既手漸漸放低,而Danny亦行近。同時,我留意到Danny身後出現一個人影,係龍哥,佢正舉起手槍準備射出致命一發,此時我搶前為Danny擋上依一槍,劇痛攻心,我再次置身於次元空間...
「喂!起身食早餐啦!」一把甜美既聲音係耳邊傳來...
「放假呀!訓多陣啦...」
「我整左早餐呀,起身食呀!懶訓豬!」
「你拉我起身丫...」


「懶豬!喂...」我將阿June拉過來並攬住佢,「攬夠喇,起身喇!」
我刷完牙洗完面,早餐已經放左係枱上,而佢亦坐係對面。碟上放左隻穿左黃有啲蛋白仲係生既太陽蛋,煎燶左既火腿同腸仔,唯一可以食既就只有未烘過既白麵包(之後係垃圾桶見到五六塊燶左既多士)。
「你...你食左野未?」
「你食啦,唔使理我嫁...」佢係度微笑緊,原來隻蛋已經係最後一隻...
「你食啦...你唔食呀?」
我心寒左一寒,我立即攞柸咖啡喝,我諗咖啡應該係安全既...結果,苦夾酸既味道沖入口中,我無力咁叭左係枱度...
「喂,起身喇,要醒啦!」
「吓?我咪醒左起左身囉...」
「我唔係講依度呀,我係講出面呀...」
「出面?」我一面迷惘望住阿June,然而佢個樣漸漸變得糢糊...
「係時候要醒喇,仲有好多野等住你做嫁!仲有,唔好成日掛住我呀,俾你一年掛住我兩三次啦,仲有人要你掛住嫁...」
四周已變得白茫茫,而阿June既身影亦漸漸飄遠,佢最後講左一句:「I love you!」