完美.情人?: 第十六章:「我想成為你」

依個警報聲係代表有人入侵公司中央網絡系統而引發,同我頭先入侵「服務員」系統有分別,因為一旦入侵成功,不單只公司內既「服務員」受控制,甚至全國家既「服務員」都可以控制。因為咁,公司既網絡係獨立既,要入侵一定係公司範圍內進行。我攞出平板想睇下對方入侵到咩地步,然而我已經入唔到公司系統,速度之快超乎常人,而咁既情況只出現過一次,就係十年前...
「究竟發生咩事呀?」女軍人大聲疾呼(我真係唔記得佢姓咩)...
「系統被人入侵左!」我盡力想盡辦法入去系統,但都唔成功...
「咁而家點?會發生咩事?」女軍人雖然有啲驚慌,但仍然擺出領袖既鎮定。
「我地一路行一路講喇!」我已經唔理佢,順手示意April跟住我行出去,「而家系統被人入侵左,而我又入唔到去,咁而家唯一既辦法就係去伺服器房度將成個系統關機,之後再重設...」
「你仲未答我會發生咩事呀!」女軍人打斷我既說話,從佢既眼神已看出佢正在慌張緊。
「系統被入侵,即係代表可以控制所有野,包括...」我未講完,身邊既守衛已經出手想襲擊我,好彩龍哥手快制服左佢,再順手補一槍(子彈係針對機械而造既)。
「你身邊有幾多真人?」龍哥問女軍人,睇來佢地既地位應該差唔多...
「大約有十個左右,但依度大約有二三十個守衛。」女軍人係腰度攞出手槍,佢都知道而家事態嚴重...
「其實唔止...」我真係唔想講出來打擊士氣,但呢個係事實,「唔好唔記得我地身處工場,仲有啲未用同未入系統既「服務員」係度,仲有可以控制工場整新既出來...」


「伺服器房係第幾層?」龍哥直接問我。
「三樓。」
「好,咁我地兵分兩路,我同兩個部下護送你去三樓,其餘既就離開依度。」
「我想跟你一齊,我可以幫你手...」April突然有咁既要求...
「唔使喇,你同佢地一齊出去喇,我一個搞得掂。」我唔想再失去身邊任何一個人,尤其係你...
於是我地就分開走,由於龍哥要補充彈藥武器,就來到武器屋。然而龍哥卻俾左支槍我同埋對我講:「俾你防身既...你真係認為入侵既,係果個Danny所為?」
「係,以而家咁既狀況,無疑同十年前一樣,可以做到咁既只有Danny...」
「佢點做到嫁?」
「依樣係我既錯,係我令佢既智能系統可以隨意連上互聯網甚至與其他系統連線,果時未預計出現咁既情況...」
「咁而家去到三樓,重設個伺服器就可以解決佢?」


「唔肯定,但至少攞返個系統先。」
「多口問句,其實佢有咩目的?」
依一刻,我真係答唔到,無論十年前定今日,事情來得快,去得快,根本無時間搞清楚。然而印象中Danny曾經對我講:「我想成為你。」
由始至終我都唔明白呢句係想表示啲咩,想成為我?係想取代我?想殺左我?定係想成為「人」?
我地裝備好就向樓梯方向出發。奇怪既係,雖然途中遇到不少受控制既「服務員」,但攻擊我地既少之又少,終於我地來到伺服器室門面。
「果然佢用系統鎖左道門...」我嘗試繞過系統入侵門鎖部分,但都唔成功...
「咁有無其他通道入到去?」
「由於伺服器非常重要,所以唔會有窗入到去,就算通風槽都有阻隔,基本上除左呢道鋼門以外就無其他入口...」
「所以你係須要我係度囉!」我回頭望,原來係April,係佢身後仲有阿Roy。
「佢始終唔放心你地,所以護送左周中士出去後就返來。」阿Roy同我解釋返佢地既出現,「但奇怪既係無人襲擊我地。」


「有無刀仔?」接過龍哥既刀仔,April好純熟咁撬開密碼鎖,跟住駁上平板,唔使十秒,道門就開左,我不禁懷疑佢點樣學到依啲技能...
「唔使估嘞,依啲係我以前既專業...」April好平淡咁回答,但我感到佢唔想提起佢以前既事...
入到伺服器室,卻發現無人看守,反而令我產生疑惑,但而家最重要既係重設返系統先,其他疑問先擺埋一邊...
「首先,關左電源先,之後後備電源會開啟,大約分零鐘左右,我地就襯依段時間聯繫返個系統,重點係要快過Danny連線,連到之後再開返電源。假如唔成功既,就俾熄左伺服器,等解決左Danny之後先再重設返。」
由於伺服器室面積頗大,所以我地分頭行動。阿Roy負責關電源,我同April負責系統聯繫及重設,龍哥同佢部下就守住門口。一切準備就緒,電源關閉,成間房進入黑暗,我地等待後備電源開啟就進入系統,但時間比我預計既耐。當房間回復光明,代表後備電源開啟,我就爭分奪秒咁重新連繫返系統再重設,過程沒有阻礙。
「Roy,可以開返電源!」
當我望向前方,詭異既事情係我面前發生。我見到「我」係我自己面前,就好似將一塊全身鏡擺左係面前咁。「我想成為你。」,依一刻,我終於明白佢既意思...