能擁有你嗎？哪怕只有一天: 六 心動？

係陸運會完左之後，放完假返黎，miss ho又話要調我位，原因係覺得我同小欣太多野講，要調開我地兩個，而我個新位正正就係何逸霖隔離，由於我仲處於失戀既狀態，我都唔係好想同佢講野，話哂佢都係林維軒好兄弟。

霖：你仲唔開心呀？我幫你鬧左佢嫁喇，佢依家都有女朋友啦，放低佢啦。

我係咪聽錯？女朋友？我同佢散左個幾日，咁快有女朋友？何逸霖意識到自己講錯野，即刻掩住自己個嘴，可惜已經收唔返，我聽到哂。

我：我同佢好似散左幾日姐，咁快有新女既？邊個黎？我識唔識？

何逸霖一直唔肯講，最後係我威脅下佢先講左話佢新女唔係我地學校既。





聽完之後我打擊好大，我跟住既幾日都無講過野，日日返到去趴係張枱度，何逸霖見到我咁樣，日日不斷唱歌講笑話氹我開心，我個時唔明佢點解要咁做，後來我終於明喇。

有一日，黃俊突然whatsapp我話要搵我幫佢補數，其實我個下覺得好奇怪，印象中佢係無我電話，我都無比過佢，不過個時都無諗咁多，我應承左佢，話哂我都係班入面既標準答案，每次做功課就會炸爆我whatsapp，個個問我攞功課抄答案。

到左約好個日，佢whatsapp我話會遲啲到，叫我上starbucks搵左林維軒先，我個下呆左，黃俊同我講林維軒知道我要幫佢補數又話要黎。我到左見到林維軒，其實我個下真係好尷尬，始於係分左手之後第一次單獨一齊，我地不斷搵唔同話題講，用黎掩蓋大家既尷尬。十五分鐘後，黃俊終於到左，不過名義上係補數，實質上只係大家係度吹水，三個人係條街周圍行，後來林維軒有事走先，得返我同黃俊。

俊：不如上去何逸霖屋企玩啦，好無？

我：無所謂呀，反正依家又無野做。





黃俊打左幾次比何逸霖都無人聽。

俊：算喇，佢唔聽電話，我陪你搭地鐵返屋企啦好無？

我：好啦。

係地鐵度，我同黃俊傾左好多野，佢既感情事，我既感情事，咩都傾一餐。

俊：你知唔知我幾難先攞到你電話號碼，何逸霖係咁問長問短問左成個鐘先比你電話號碼我。





我:咁奇怪既佢。

俊：其實你覺得何逸霖點？點解你唔考慮下佢？

我：一直以黎，我都當佢係朋友，無諗咁多呀，加上我又岩岩分左手。

黃俊點一點頭，無講任何野。只怪我個時太遲鈍，後來我先諗到當時點解黃俊會咁問我，因為佢係為何逸霖問，並唔係岀於好奇。

到之後個日返到學校，一坐低何逸霖就問我。

霖：黃俊攞你電話號碼做咩？

我：佢問我可唔可以幫佢補數姐。

我講完，何逸霖既表情就好似放下心頭大石咁。





之後既幾日，我既'親戚'到訪，每到依個時候我就會痛不欲生咁，又會亂發脾氣，上堂就因為太痛，堂堂就只係趴左係張枱度，因為學校既醫療室係無任何通風既設施，去到焗死都似，所以我寧願留係課室算。而偏偏老師就不斷叫我起身，坐係隔離既何逸霖就留意到我既情況，就叫老師同周圍既人唔好嘈我，由得我休息。

至此之後，何逸霖就每次都會係我每個月既呢幾日咁樣默默地照顧我。有一次，係上堂時候傾開計，我同佢講我係唔開心既時候就會不斷食野，估唔到就咁佢就記住左，唔止呢樣，係我講過既所有野佢都會記住。

有一次，我因爲朝早遲左岀門食唔切早餐，返到學校就不斷係度食野，佢就好擔心咁問我係咪唔開心，其實我只係太肚餓姐。其實係呢個時候，我已經開始感覺到佢對自己既關心，只不過係我仲未察覺到自己對佢既感覺。

其實最令我感動既係，佢會記住連我自己都唔會記住既野，就係我黎m既日期，佢每次都會係之前既幾日提我唔好飲凍野，會突然望手錶日期知道我係唔舒服。佢會係我唔開心既時候，係我耳邊唱歌，個時我嫌佢唱歌好難聽，其實只係講笑，我依家好想同佢講，其實佢唱歌好好聽，我好中意佢唱歌。

係佢發燒個日，唯一一次係我照顧返佢轉頭，我幫佢抄哂上堂既筆記，不過由於已經係最後一堂，佢無得早退，係量完體溫返黎，佢就挨左係我膊頭瞓著左，睇得岀佢已經撐左成日好辛苦，所以去到放學我先敢叫醒佢。自此之後，愈來愈多人問我地係咪情侶，每次佢都答係呀，我地係情侶，我都只可以笑一笑。就連小欣都話我地兩個其實好襯，我開始唔通我真係開始對佢心動？我中意左何逸霖？