「唔食煙咁嘥?食支煙感覺有啲經歷,型啲喎!」Coco 説罷將一口煙噴到我臉上。

「喂!如果冇乜嘢,我落番去先喇!」我開始感到無名火起,便站起身要離開。

「唔好走...」Coco 拉著我的手,「可唔可以,陪我傾吓計?」

我正想怪責她因這小事而打斷我與 Vicky 的談話,但當我看見她臉上期望的神情時,我便把説話呑回肚中。

「有咩幫倒妳?」我再坐下來跟她説話。



「今朝我哋同 Heidi 傾咗好耐,佢仲係好掛住 Johnson,想出去搵番佢。我哋都勸佢忘記個衰人,點知佢仲要生要死咁。我哋再追問佢,佢先話已經兩個月冇 M 嚟,可能有咗佢嘅 BB。」

Coco 抽了一口煙後説,「我哋問佢有冇搵醫生 check 吓,同有冇同 Johnson 講,佢就話當時佢唔知點算,又好驚,所以諗住遲啲同佢講先 check。點知呢幾日發生啲咁嘅事,佢怕 Johnson 會以為 BB 唔係佢嘅骨肉。」

Coco 説罷又是一口,「我同佢講,兩件事根本發生喺唔同嘅時間,有心計一計就知。但係佢都仲係怕 Johnson 唔信,況且依家咁嘅環境,要照顧大肚婆真係唔易。」

「但無論如何,Heidi 都想搵番佢親口同佢講,佢話好後悔琴日冇即刻跟佢走,而家想去搵番佢。」Coco 又是一口煙,「不過我同 Carey 都怕佢出到去會亂嚟,所以無奈應承咗佢出去搵,我叫你嚟就係想同你講,我哋晏啲就要出發喇!」

「好多謝你救咗我哋出嚟,可能你會覺得我哋好怕死,其實我真係唔怕。不過如果要留嚟琴日個地獄生不如死,我真係情願死咗佢。」她深呼了一口氣,「女人有啲嘢,係比自己條命仲緊要...」



「不過,你真係有女人緣。」我莫名奇妙的望著 Coco,「唔係咩?喺呢度,起碼有三個女仔對你有意思...」

我摸不著頭腦。

「Anyway,你之後打算點?」Coco 問。

「唔... 之後應該會同 Vicky 佢哋去搵屋企人,跟住試吓有冇機會離開啲度,或者有咩安全地方可以留低。」我思考著説。

「哦... 咁好啦!希望之後大家仲有機會見面啦...」她説罷便準備起身離去。



「其實,不如你同我哋一齊先去恆安搵屋企人,再沿路睇吓見唔見倒 Johnson 吖?」我提議著説。

「唔... 都好,始終多啲人,方便照認。」Coco 認同我的提議,「我番去同佢哋傾吓!」

我們一起返回一樓的母嬰診所,看見 Vicky 那一臉不悦的表情,我便知道有立刻去向她解釋的必要。

經過我詳述事情的始末後,Vicky 才肯回復她那開朗的神情。之後 Keith 和 Suki 亦已經從房間走出來,但他們的表情卻顯得十分古怪。

若要我去形容,我會説他們是一對曾經激烈爭吵的情侶,但又不想被其他人知道。女的雙眼通紅,男的面紅耳赤,離開房間後便各自走開。

Vicky 亦感覺到不妥,便立刻走往好姊妹旁邊安慰。Keith 則靜靜地坐在一旁,雙手掩面,狀甚痛苦。

我此時的心情十分複雜,觀乎他們的反應,剛才應該不是在做那回事,但看見他們不快的表情,我又於心不忍。

無論如何,我亦要安慰一下我的好弟弟,順便打探一下剛才發生的事。



「喺 Suki 暈咗嗰兩日,得番我同 Vicky 出去搵物資。我哋喺出面經歷過好多生死關頭,我先至覺得 Vicky 喺我一直要搵嘅人。」Keith 淡然地説道。

我感到憤怒,為何他會對我的心儀女孩打起主意來。但我還是強作鎮定地説,「吓,咁 Suki 點呀,你哋都好似拍咗拖冇耐咋喎!何況 Vicky 都未必會鐘意你啦,Suki 係佢好姊妹嚟。」

「所以我咪頭痛囉!不過我覺得 Vicky 都對我有啲意思,所以我諗咗好耐,先決定同 Suki 講清楚。」Keith 續説。

我對他那自我感覺良好的自信,感到十分可笑,更何況Vicky 曾向 Suki 表示對 Keith 沒有意思... 但想深一層,這真的是 Vicky 心裡面的説話嗎?若如 Keith 所説,他們真的經歷過生死關頭的話,也絕對有可能因此而萌生愛意,就像我跟 Suki 一樣。

相對我這個與她聚少離多的人,愛上 Keith 的機會確實也不少。

「我知道你都對 Vicky 有啲意思,所以我都想問清楚你,我哋可唔可以公平競爭?」Keith 見我沒有回應,便開口問道。

什麼公平競爭?我和 Vicky 根本是一對的,他這是橫刀奪愛!我憤怒地説,「你啱啱飛咗佢好姊妹,而家就去溝佢,我唔覺得 Vicky 真係會理你囉!你咁樣好唔負責任啫!」



「咁你又點呀?唔好唔記得你都有女友㗎,喺度見倒啲女就㗳曬糖,咪喺度扮正義 L 啦!」Keith 突然激動地反駁。

「總知你咁樣做就唔啱!」我指著他説,「我警告你,即刻同 Suki 道歉!」

「呵呵,你係咪同 Suki 有一手啊,咁幫住佢嘅?莫非你想享齊人之福?」Keith 亦不甘示弱。

「碰」憤怒的我,一拳便打到 Keith 的臉上,他受重擊後跌坐在地上。
已有 0 人追稿