這個 Aki,也真的礙事。

我想向她道明原委,Clara 卻已經快一步走向她。

Clara 在到 Aki 身旁,然後靜靜的與她交頭接耳。

而 Aki 聽罷,頓時滿臉通紅。

我想 Clara 是要她知難而退。



「Okay 㗎喇...」Clara 充滿信心地向我說道,「入嚟先啦!」

我往房間方向走去,當我回看 Aki 的時候,她好像有點失落。

「阿 Roy,你話會保護我㗎喎!」Aki 竟突然眼泛淚光的向我說道。

「喔?我有講過咩?」雖然有點不捨得,但我好像真的沒有答應過。

「咩... 咩冇吖?你而家係咪講過唔算數呀?」Aki 非常不滿,「總之我唔理,我要你保護我!」



「Okay... Okay...」我想令她乖乖地待著,「一係咁啦,妳一大聲喊,我就即刻飛撲出嚟,好冇?」

「嗯...」她亦終於妥協。

「行喇...」Clara 再次催促。

於是,我便跟她走進房中。

房門剛剛關上,Clara 便走到那小酒櫃面前,從裡面拿出了一枝紅酒。



之後還若無其事般,把紅酒倒在兩個酒杯裡面。

我看她神態自若,難道在這種環境下,她還認為我會天真得喝下這杯酒嗎?

「做咩呀?你驚我落藥呀?」Clara 竟也真的遞上了酒杯,還語氣親切地問道。

難道,她是在策劃著什麼的陰謀嗎?

但現在離開,豈不是功虧一簣?

反正已經來到了這裡,正所謂不入虎穴、焉得虎子?

這一次,我被她看透了。

「Okay...」原本不懂喝酒的我,為了不失霸氣,竟也把杯中物一飲而盡,「而家妳可以講啦!」



「好嘢!好嘢!」Clara 突然拍手叫好,然後也淡淡地把自己的那一杯清空。

「我鍾意爽快嘅人!我果然冇睇錯你...」Clara 的語氣突然改變。

「我唔係好明妳講乜...」我真的完全摸不到她的心意。

「我頭先同自己講,如果你唔肯飲呢杯酒,我就一定唔會同你再講啲乜嘢...」Clara 的眼神也變得溫和,「不過既然你肯成杯飲曬,咁我就唔理你背後有咩目的,我都會當正你係自己人...」

原來,她還是在說服我加入她們。

「唔好誤會...」她好像看穿了我的想法,「我做咁多嘢,絕對唔係想你要加入我哋...」

「相反,我係希望我可以幫到你手...」Clara 誠懇地說道。



自從進入了房間之後,她所說的話,已經令我越來越摸不着頭腦。

「睇你個樣,你都完全唔知我講緊乜㗎啦!」Clara 看着我那沒有焦點的雙眼說道,「其實由喪屍事件爆發到而家,你有冇諗過,你係為咗乜嘢而生?」

又是一個令我摸不着頭腦的問題。

「嘿嘿!我諗你完全都冇諗到,你有一個足以改變世界嘅能力。」

現在的我,只能靜靜地坐着,洗耳恭聽。

「係嘅,我知道呢樣嘢係好難令人相信,就好似當初我聽到呢個資訊,我都完全唔能夠相信,呢個世界嘅未來,就操控喺你呢個平平無奇嘅宅男手上...」

「但係咁唔係代表,你係唯一一個可以改變世界嘅人...」Clara 補充。

「即係點?又話我可以操控未來,但係又話我唔係唯一一個可以改變世界嘅人,我完全聽唔明囉!」我真的聽得一頭霧水。



「Okay... 或者咁講,你係決定世界未來命運嘅重要一員,但只不過係其中一員,因為有你同樣身份能力嘅,斷斷唔止你一個...」

「而且,由於已經越嚟越多人或組織,開始發現倒病毒嘅秘密,我諗你都開始見倒,有越嚟越多同你差唔多嘅怪物出現...」

「咩話?你話我係怪物?」我有點嬲怒。

「係?人唔似人、喪屍唔似喪屍,唔係怪物係乜嘢?」Clara 立刻回應。

我正想反駁,卻被她快一步搶答道。

「唔使咁嬲嘅!」Clara 悠然地答道,「係、你固然係怪物啦!」然後她深呼吸了一下後說道,「不過,我都係!」
已有 0 人追稿