［人性/有甜］- 屍•家•馬鞍山（隔日更新）: Chapter 486 - 濟州島事件

「哈哈！怪物...」我冷笑著說，「咁妳又係幾時變成，同我一樣嘅怪物㗎？」

「真係說來話長...」Clara 似要把一切娓娓道來，「我同一班同僚，原本係隸屬 CIA 亞太分部，係負責亞太一帶嘅情報搜集。」

「之後我哋負責調查，韓國發生嘅疑似喪屍事件...」

「韓國嘅喪屍事件？妳意思係，喪屍事件除咗喺香港爆發，喺韓國都有？」我忍不住插口問道。

「唔係，我嘅意思係，四年前發生喺韓國濟州島嘅喪屍事件...」Clara 急忙糾正。



四年前？

濟州島？

潛藏在腦海深處的回憶再次浮現，父母的輪廓，我們在那最後家族旅行的光影，都一一出現在眼前。

那，是巧合嗎？

「嗰年我哋收到消息，喺韓國濟州島發生咗一件喪屍病毒泄漏，同小型爆發事件。由於事件疑似涉及北韓政府，同埋南韓本土嘅邪教組織，所以消息好快比人完全封鎖咗...」Clara 續說。



「照妳咁講，即係香港發生嘅事，已經唔係第一次？」我忍不住再問。

「係！而且香港發生嘅事，只可以算係韓國事件嘅後續，背後仲有好大嘅陰謀...」Clara 的表情變得陰沉。

「我都曾經聽人講過，背後策劃嘅係一間生物科技公司，研發同策劃一連串嘅事...」我亦想分享一下自己所知。

「唔洗講，一定係素恩同你講㗎啦！」Clara 看得通透。

「其實我真係諗唔倒，你究竟有乜嘢吸引力，可以令到久經訓練嘅間諜，都咩都話曬比你知...」Clara 打量著我說。



「嘿嘿...」這一刻我只能苦笑，因為正質疑著我的 Clara，現在也不是急不及待的要與我分享資訊嗎？

更何況，連我也不知道背後是出於什麼原因。

「咁之後呢？」我不想在這話題周旋，「個陰謀又係乜？」

「如果素恩有同你講，你應該知道，原本呢間生物科技公司，係韓國一啲極端份子開嘅...」

「四年前嘅濟州島事件，可以話係佢哋小試牛刀嘅襲擊。雖然好快比南韓政府平息，表面上好似失敗咗...」

「但亦因為咁，令組織得到唔少病毒嘅數據，而佢哋就趁亂，捉咗一啲人去做進一步嘅研究...」

「而呢啲人，亦都唔係漫無目的咁搵，而係為佢哋嘅下一步舖路...」Clara 續說。

從我依稀的記憶中，素恩亦曾經說過，我應該是這些 "被研究" 的人裡面的其中一員。



「你話佢哋捉咗一啲人做研究，咁佢哋嘅下場係點？」我打算試探一下，她掌握真相的程度。

Clara 聽後突然用凌厲的眼神看著我，使我感到渾身不自在。

「呢層我都唔太清楚...」她的視線慢慢地從我身上移開，「我哋只係知道，佢哋有人選擇留喺呢個左派組織，而有人就選擇咗自立門戶...」

我回想素恩之前說過的話，她也曾經提及過孝信是一個雙重間諜，他一邊聽命於那個極端組織，卻又同時效忠另一個集團。

異生教？

這一刻，我腦海突然浮現出這一個名字。

「阿 Roy？你係咪諗倒啲咩？」可能我的表情變化太大，使 Clara 突然向我追問。



「啊冇... 只不過我忽然間諗起，素恩曾經講過孝信係一個雙重間諜。」要從 Clara 口中得知多一點真相，我亦只好拋磚引玉，「孝信除左係嗰個左翼組織嘅人，亦同時係另一個秘密集團嘅成員...」

「但係，而家我哋都冇辦法印證...」我深呼吸一下後說，「因為孝信，已經比我殺死咗...」

「嘿嘿，有意思... 有意思...」Clara 忽然冷笑道，「最令我估唔倒嘅係，素恩連呢樣嘢都話你知...」

「我之前睇少咗佢，佢先係一個出色嘅間諜...」她說出一句耐人尋味的話。

她的話，好像正帶領我步向一個殘酷的真相。

真相離得越近，卻令人感到越不安。

「妳... 咁講係咩意思...」我帶點戰兢的語氣問道。

「我諗... 佢有兩樣嘢一定冇同你講到...」Clara 準備要揭開真相。



「第一，孝信肯定未死...」Clara 淡淡的說道，「因為我冇幾耐之前先見過佢...」

「而且，你個素恩一直有同佢聯絡...」Clara 看著我的雙眼道，「佢哋嘅關係，斷斷唔係你想像中咁簡單...」

「第二，素恩口中所講嘅雙重間諜，亦唔只孝信一個...」

「除咗孝信之外，佢自己都係一個雙重間諜。」Clara 又再把臉貼近我，「甚至，佢比孝信做得更出色...」