[突發][唔係蛋黃哥]大撚鑊_我一起身發現變左做粒蛋黃: （十四）
「坤叔，一碟……」我剛踏進茶餐廳，正準備點菜的時候，卻發現所有人的目光都集中在旁邊的桌子。
「小明，呢邊呀！」原來于珊已經來到茶餐廳，亦預先拿了位子，難怪所有人像著了魔般看著這一桌！
「哇，你咁快手嘅？」我急忙坐下來，然後感受到一眾憤怒的視線。
「係呀，約人點可以自己遲到架！呢間茶餐廳好有特色呀，我真係好鍾意香港D茶餐廳！」啊，于珊還真是一位天使，不像港女般遲到，還能充份欣賞茶餐廳的美好，這樣的好女人在和我吃飯，我是在發夢嗎？
「小明！小明！你做咩呆左咁呀？」她輕輕在我面前揮了揮手，把我拉回了現實中。
「哦，無呀，諗緊頭先王馬門講嘅野者！」我回過神來對她說。
「我都好想快D知發生咩事！不過做野之前都要食飽先得架嘛！嗌野食先啦！係呢，呢度有咩好食呀？」于珊說。
「吓，呢度呀？我黎親都係男人的浪漫，都唔知有咩岩你食！」完了，不小心把平常的高登用語說了出來。
「哈哈，咩男人的浪漫呀？咁搞笑嘅，咩黎架？
」天使，這真的是一位天使。
「喂，小明，今日同女朋友仔黎拍拖呀？」坤叔不知趣的來打擾我們。
「唔係呀大哥，我同佢係朋友黎，無特別關係架！」于珊一臉認真的回答，我的心就像被利劍貫穿了一樣。
「哈哈，唔緊要啦，都係一句者！係啦，妹妹你想食咩呀？」坤叔果然厲害，一句說話便轉換了話題。
「我唔知有咩好食呀？頭先小明話男人的浪漫，我想問係咩黎架？幾得意咁！」她笑問。
「哦，咪豆腐火腩飯囉！通常會加多支青島添嘅！不過妹妹，呢D男人碟頭飯，你未必岩食喎！」坤叔帶點傲氣的說，充份展現出男人味和何為男人的浪漫！
「唔會啦，咁要兩份豆腐火腩飯啦！我要凍奶茶，小明你飲咩呀？」我完全插不進他們的對話中，想不到轉眼間連飯也點好了。
「呀，我要凍檸茶啦！」我說。
「收到，兩份火腩飯！」坤叔轉身走向廚房。
「你成日黎呢度食架？果個阿叔同你好似好熟咁？」于珊問。
「係呀，我係便利店返工，基本上返之前都會黎呢度食！」我答。
兩碟火腩飯和凍飲也送上來了！
然後轉眼間，我和于珊把眼前的飯都全吃光了！
想不到她這位身材纖瘦的女子，竟能跟上我吃飯的速度，更把整碟飯都吃光了！
「碟飯好好食！快餐店D醬真係好正！」她抹了抹嘴，然後笑著對我說。
「吓？係咩，我貪方便Ja！哈哈！」我實在不想說，自己是受那潮文影響而開始吃這飯的。
「哇，妹妹仔，估唔到你咁好食量喎！」坤叔把空了的碟都拿走，于珊只是微笑的對他點了點頭。
「係呢，于珊，你話你記起返你細佬嘅野，究竟係咩一回事？」我問。
「其實係咁嘅，我走左之後就返左去酒店！我係咁諗你同我講嘅野，亦都不斷諗究竟細佬係邊個！之後我就摷自己個行李箱，居然發現我將一D舊嘅相簿同筆記簿帶左返黎香港！果下我更加肯定自己嘅記憶有問題，如果我黎香港玩，點會帶埋D咁嘅野！之後我睇左D野好耐，亦都打左返倫敦問返我養父母一D問題，我知道自己細個住係邊間孤兒院之後，就繼續搵相關資料！結果，我居然發現到一樣野！」于珊凝重地說。
「發現到咩？」我問。
「我發現，我上網搵呢間孤兒院嘅資料，居然係乜都搵唔到！但我好肯定，我養父母上年都仲捐緊錢俾呢間孤兒院，無可能會無晒資料！之後，我睇返自己帶黎嘅相同日記，發現一D相嘅位置，好明顯咁好似無左某個人存在咁！再加上我日記寫嘅，字裏行間隱約顯示到我係同某個人玩，同某個人好熟！而相片入面居然完全搵唔到呢個人！果一刻，我只係覺得好嬲好嬲好嬲！曾經存在過，對我咁重要嘅人，咁重要嘅回憶，我居然乜都唔記得！」于珊說著的同時，眼淚慢慢從她的眼眶流到她美麗的臉上。
「妳妳妳妳妳無事嘛！」我緊張得不知說些甚麼才好，然後我感受到店內其它人的淩厲視線，仿佛一把又一把的利刃架在我的頸上。
「我……我無事！」她慢慢拿出一塊印有小熊的手帕，擦掉臉上的淚痕。
「就係我覺得好嬲嘅時候，我從日記簿的封面紙皮中，我找到一張手寫的紙張！上面寫著『Love You Forever, My Dearest Sister』！突然，我對細佬嘅記憶返晒黎，就連我黎香港嘅目的，我都記返起！」她說。
「太好啦！咁你係咪都記返起呢兩日發生嘅事啦？
」我高興的問。
「呢層就無……基本上，我連點樣搵到黎深水埗都唔記得！」她搖著頭說。
「雖……雖然係可惜，但都叫做記得返你細佬，話唔定遲下真係會記得返晒所有野呢！」我對她說，然後她笑著對我點了點頭。
「咁你呢，頭先王馬門去你度，佢有無講D咩？」于珊問。
我簡單的向她交代了所有事情，包括高登巴打，我的夢境和王馬門的事情！
「咁聽落真係好古怪！不過，我覺得你調查嘅野真係威脅到佢，如果唔係，唔會咁急想你搬走！」于珊說。
「我都係咁諗，所以我已經清楚咁講左，唔會離開呢間屋！不過唔知點解佢唔令我被消失者！」我說。
「哇，乜你兩個講嘅野咁奇幻，奇幻過幻海奇情喎！」坤叔不知道何時站在我背後，突然插嘴進來。
「哇，頂你咩坤叔，人嚇人嚇死人架！你果D咩幻海奇情乜鬼野黎，咩年代呀！呀，唔係，最重要係你幾時企係我後面，聽我地講野講左幾耐呀？」我可不想讓坤叔認為我是瘋子，禁止我來這裏吃飯！
「幾時開始？咪由『妳記返起妳細佬嘅野』果度開始聽囉！」坤叔說。
「搞錯呀，偷聽我地講野！」即是說坤叔把全部內容都聽到了，怎麼辨啊？附近沒有其他餐廳可以吃這麼便宜的豆腐火腩飯啊！
「咩偷聽者，唔好講得咁難聽啦！妹妹仔佢一路都知我係度架，唔信你問下佢！」坤叔說。
我偷偷看了于珊一眼，只見她微微點頭，以示知情！
啊！為甚麼這樣重要的對話要讓其它人知道啊？
「小明，我一早都話你烏雲蓋頂架啦！你又唔信，依家出事啦！你仲要咁硬頸唔搬走，你都係凶多吉少架啦！呢餐等坤叔請，當係你最後的晚餐啦！」坤叔拍了拍我的肩膊，用悲哀的口吻對我說。
「哇，坤叔，我話晒都幫襯左你咁多年，你咁講野都得嘅！」我說。
「咁你有問題又唔解決，咁我實係咁講架喎！」坤叔不以為意的說。
「呢位哥哥，你咁講，係咪你知道有咩解決方法呢？」于珊禮貌地說。
「妹妹仔，解決方法呢，就唔係無嘅！其實果個人都俾晒機會小明架啦，係佢自已拒絕左者！」坤叔說。
「咩意思？」我問。
「個經紀咪話叫你搬嘅，你搬左，咪一天都光晒，唔會再搞到你囉！」坤叔說。
「你又知搬左唔搞我？佢依家搞得我，第時都搞得我嘅者！同埋，我走左咪無辨法查落去？」我帶點激動地說。
「我話你會無事Ja，無話你可以繼續查落去喎！同埋，如果你應承得佢，肯撕爛份約，佢唔會再搞你架啦！佢地唔可以做出一D承諾以外嘅事，畢竟，魔鬼即使作惡，都要係神嘅監視下偷偷摸摸咁進行！所以話，機會佢真係有俾你架！」坤叔說。
「咩話？魔鬼？」我和于珊同時說話。
「唉，仆街！講多左添！你地繼續飲野，當我無講過。」坤叔神情閃縮，想躲進廚房裏。
我馬上拉著坤叔的手，于珊也幫忙捉著他。
「你兩個搞咩呀？我仲要做野架！」食客們也走得七七八八，而且也沒有新的客人進來，那來的工作啊？
「坤叔！你上次都話有野你會幫我架喎，仲話會俾你師傅張卡片我！你唔係縮沙呀？」我說。
「上次唔知呢壇野咁大鑊呀嘛，我就退休架啦，俾我安享晚年啦！」坤叔說。
「坤哥，你幫幫我地啦！我細佬已經唔見左，小明佢又好大機會有危險，唔該你幫幫手啦！」于珊也忍不住說。
「你細佬消失左無辨法架啦！魔鬼拎走左嘅野係無辨法拎返黎架！」坤叔說。
「喂，坤叔，我幫襯左你成年！你講呢D？依家唔係我會唔會消失嘅問題，而係已經有好多人被人洗腦，又有好多人消失左！你住呢區架，你唔好話我知無感覺呀！」我說。
「唉……有感覺又點，我唔知咁大件事架嘛！呢單野真係唔係我可以處理到！」坤叔繼續拒絕我們的請求。
「咁……坤哥你最少話我地知，你點解會知果D係魔鬼？你一定知道D野架？求下你話我地知啦！」于珊說。
「喂，阿坤，你幾個係度嘈完未呀？快D帶佢地走！仲有，你今日請假，陣間唔駛返黎啦！聽日再返工啦！」老闆突然說。
「吓，老闆，你唔係咁對我呀？」坤叔說。
「你咪當幫下D後生囉！之前我老婆單野，你最後咪又係幫到我！」老闆說，然後把我們三人都趕出店外。
我們站在街上，你眼望我眼，完全不知要做些甚麼！
「唉，好啦，我帶你地去搵師傅啦！但我只可以做到咁，其它野，我幫你地唔到！」坤叔可能見我們實在太可憐，態度軟化並帶我們去找他的師傅！
太好了，總算看到一點生機了！