菜老闆肯教我地當然好,而且菜老闆平時都有同佢果兩個囡囡去游水,我諗佢教我地一定教我好好。

佢講左D佢既心得之後,就開始分拆左兩個部份教我地,第一部份係上身,姐係手,而第二部份係下身,就係腳。

我同阿琪企左係水度,而佢就好細心咁教我地,老實講,呢個時光真係好愉快,其間同阿琪有講有笑,打打鬧鬧不知幾開心,就好似,呢個係我地兩個既小天地一樣。

但係,我忘記左今日係有好多狗公既出現,佢地望晒黎呢邊,望阿琪時當然係笑笑口啦,望我?就緊係想殺我滅口一樣。

而阿富,佢好似一直都不是味兒咁係旁邊游下又停下,心不在焉。



我都無理佢地咁多,菜老闆教得咁有心機,點可以浪費架,所以我同阿琪玩之餘都好認真咁學,我本身就學識,所以好快就上手,而阿琪都唔差,都游到少少,不過佢就唔識換氣。

教到差唔多,因為菜老闆趕時間接佢既囡囡,所以要提早走,我地兩個多謝左呢個游水教練後,就繼續練水。

而當菜老闆一走,其他狗公就即刻過黎話,「不如我地教妳啦阿琪。」

阿琪一臉難色,所以我就同佢地講:「我地自己練下水得拿,你地自己游啦。」

阿琪聽到我咁講後,就附和話:「係囉,你地今日難得出黎游水,就去游下啦,我自己同阿牛練下水就得架拿。」



係遠方既JUDY同金姐終於見到我地比緊D狗公圍緊,所以都行左過黎話:「你地咁想教人游水,不如教我地兩個啦。」

班狗公聽到後,就散晒。

「唔該你地。」阿琪話,但金姐同JUDY就唔係幾好氣講:「佢地駛唔駛咁啊,教下我地唔得咩……」

我聽到佢地兩個咁講後,笑左出黎。

而呢個時候,仲有一個一直虎視眈眈既人,就係阿富。



佢慢慢游過黎,然後同我地講:「不如我陪妳練水?」應該唔係同我地講,因為佢只係望住阿琪一個講。

阿琪見到佢咁樣,就講左句:「唔駛。」然後就自己踢水出去。

而我見到阿琪都出左去,我都跟左上去,不過都係頭先講咁,阿琪佢唔識換氣,所以到個池一半距離都唔到就要停係度,如是者幾次之後,佢就同我講:「我換唔到氣啊。」

我就同佢講:「其實我見妳都差唔多換到氣,但唔知點解妳每次一伸個頭上水就會企左係度。」

阿琪聽到我咁講佢後都笑左出黎,「係啊,我都覺得係。」佢諗左一諗然後話:「可能,係因為知道前面無野我扶,所以驚,驚就想用腳企係度。」

「咁……要諗下有咩方法。」我同佢企伙係水中央諗左諗,而佢就忽然游開,當我想跟過去果陣,佢就停低叫我企果度唔好郁,咁佢咁講,我就照做啦。

阿琪游返埋池邊,我地兩個隔左段距離面對面,我望住佢,不解地望住佢,然後佢笑左我一笑後,同我講:「我要你做我既臨時岸邊,等我可以係水中心,都有個地方扶一扶。」

聽到阿琪咁講後,唔知點解,我個心悸動左一下。



「哎呀……今次差少少。」我用手伸出去扶起游向我既阿琪,然後佢由返到池邊。

水中心既岸邊,如果妳想的話,我做妳一生人既岸邊,無時無刻扶持住妳都仲得。

「就得拿。」佢好開心咁同我講,而我還以一個微笑,而家先發覺,頭先我地兩個雙手都捉實左。

如果,我真係可以幫到阿琪既話,就好拿,不過,都要佢肯比我幫佢先我。

「得左……」差少少得左既阿琪,因為太過心急,飲左啖水後沉左落水,而我,就一手扶起佢。

當一個就快浸親既人,都會有個反射動作,手會向上不停搵野捉住,而阿琪今次因為有我係水中心做佢既岸邊,佢一手搭住我既膀頭,我感受到佢向我所施既力,我望住佢由水底上黎果一陣子既驚慌,然後我同佢講:「有我係度就唔會比妳有事。」

佢望住我,水由佢既臉滑落,開心到喘晒氣既佢同我講:「我差D咋。」



我好感受到佢喘既氣,因為我地兩個而家面對面既距離好近,近到,就好似我眼中只有佢,佢眼中只有我一樣。

「唔緊要,試到妳得為止,我會一直係水中心到準備就緒。」我對住阿琪講,而阿琪望住我,流露出一個對我好信任既眼神。