今日照常同阿琪一齊去買野,但唔同既係,今日我地兩個做左一件事。

「不如我地伸請返張易賞錢卡好唔好啊,橫店我地兩個成日都黎買野?」阿琪問我,而我就點頭話好。

填完FORM,好快就拎到張易賞錢卡,有一張大卡同三張細卡,阿琪拎左一張細卡走,然後掛左係個鎖匙度話:「大卡擺係你度,費事我大頭蝦唔見左。」佢係度向我傻笑緊。

而我就將大卡放落銀包度。

我地伸請完後先去買野,阿琪係後面行,而我就係後面推車,有時,阿琪會行係我旁邊撓住我隻手,又或者行勢咁揉我隻手,我見到佢咁做,就問佢:「仲咩事?」



「無啊,你咁多手毛,咁樣揉你隻手好滑。」佢笑住咁講。

同阿琪行左咁多次超級市場,唔多唔少都知道佢會買咩,佢每次會先去買生果,睇係有咩生果平,然後就會去睇菜,跟住經過冰櫃時,就會睇下有無佢媽媽鍾意食果種椰果,如果有,佢通常會買三包。

跟住就會繼續行,到冰鮮櫃果陣,會睇下D雞柳有無特價,仲有魚都係,如果有,佢先會放人架車仔度。

然後,就到飲品,佢會買左佢媽媽鍾意飲果D先,然後先睇仲有無其他特價品,之後就會睇下D罐頭,然後就到花生,佢有時先會買比佢爸爸食,因為佢怕爸爸食得多熱器。

買到咁上下就會買日用品,到最後,就到佢既至愛,零食,個為食豬好最鍾意買零食,但次次佢都會一路買,一路話佢媽媽實鬧死佢,而我就係旁邊笑佢。



仲有啊!仲有最重要既野,就係一大堆既「叮叮」,咩野係「叮叮」?就係果D微波爐點心,每次佢都買好多,因為佢阿爸會清我好快,而且佢自己都會清得好快。

到最後排隊既時候,我就會提佢有無野買漏,個大頭蝦真係可以似似都買漏野。

最後,到比錢,然後用我地剛剛伸請既易賞錢貯分。

「我將你D錢轉成分,可以慳D。」佢笑住話。

我地,就好似一對年輕既夫婦係度買緊日常用品,為生活精打細算。



每次同阿琪買野,我都覺得好開心,因為,我可以幫到佢。

就算,只係呢D微不足道既野,我已經好心滿意足。

每次買完野,推住架車返到佢屋企門口,幫佢將D野搬入屋,我都好開心,雖然我無正式踏入過佢屋企,每次都只係佢屋企門口前面。

咁樣,已經好足夠。

「一陣我地去食下午茶好唔好啊?」阿琪搬完D野食問我。

「緊係好。」我答佢。

「我仲想食雪糕啊。」阿琪露出左一副請求既扮可憐樣。

「知拿,傻豬。」呢一刻,我真係覺得,我同阿琪既關係行多左一大步。



但係,呢個情況可以維持到幾耐呢。