[愛情無限loop] 就係咁，我做左女神一年既備胎: １７３　一齊飲野

自從上次七三廿一叫能蟹做師傅後，佢真係日日都會ＭＳＧ能蟹問佢點樣處理感情問題，但大多數都係要點樣先可以結識都識既女仔，點樣先可以同新識既女仔打破沉默。

能蟹日日都係到呻佢被七三廿一煩，但我地幾個就當佢地兩個笑話咁笑。

「果條友成日都會要約我出黎飲野，要我教佢點解溝女，點樣先可以令Ｄ女人著緊佢多Ｄ，唔駛自己主動哄，果Ｄ女人都會自己埋身ＷＯ。」能蟹露出左一個極痛苦既表情話，而我同阿琪就笑得勁開心，因為好難我見到佢咁既樣。

而ＪＵＤＹ就話：「咁你未教下佢囉，人地當你係『男神』啊！！！」ＪＵＤＹ好強調男神呢兩個未。

「如果我係男神引到Ｄ女埋身就話好姐，而家引左一個毒男返黎，真係唔知點算。」能蟹佢抱頭已經想痛哭。



「咁你未順下佢意，搵日約佢出黎飲野，睇下佢點解咁想做男神囉。」我話，然後能蟹即刻擰晒頭話：「唔係掛，約佢出黎都無野講。」

「你自己一個人驚，未叫埋我地去囉。」阿琪話，然後佢搭一搭我膀頭講：「我去，所以阿牛都會去。」

「喂，妳咁算係幫我拿主意啊。」我同阿琪話，然後阿琪好得戚咁話：「你要絕對服從。」真係比佢打敗。

「去飲野我無所謂啊，到時你地招呼七三廿一，我唔理佢架。」ＪＵＤＹ話。

所以，我地決定約七三廿一出黎飲野，想知到點解佢咁想做男神。



而佢一知道我地約佢，佢不知幾開心咁唔諗下就答應左。

當晚，我地幾個係尖沙咀度，一間阿琪以前成日去既酒吧度飲野。

果間係一間清吧，定時有Ｄ人去唱下歌，人唔算好多，可以傾下心事果種地方。

我地一坐低，七三廿一就好主動咁問：「你地想飲Ｄ咩野啊？想飲ＣＯＣＫＴＡＬＬ？紅酒？白酒？定係……」佢咁熱情唔係唔好，但係佢只係對ＪＵＤＹ同阿琪係咁，應該係話，佢只會對女人咁熱情。

而阿琪同ＪＵＤＹ見到佢咁，就無理到佢講咩野，只係兩個睇個酒單，一眼都無望過七三廿一。



而我，就同能蟹話：「人地師傅，好心你睇一睇你個徒弟啦。」能蟹一聽到我咁講，就呆左望住我，好似一副死仔出賣我既表情。

七三廿一聽到我咁講，就話：「係囉，今日都出到黎師傅可唔可以示範下點樣認識新既異性啊？」

呢條友仔又幾醒目架ＷＯ，出到黎都把握機會問能蟹教佢野。

而能蟹初時都好抗拒，但之後七三廿一又話：「師傅呢Ｄ男神，唔會無一招半式既，如果無，唔通師傅佢回塘？」佢根本有心咁講，而能蟹都因為聽到佢咁講，就話：「好，我就示範一招比你睇。」

能蟹講完，就叫左個女侍應過黎：「唔該，可唔可以比一支紅酒同兩隻杯我。」

個女侍應聽到之後，就拎左一支能蟹點既紅酒，然後再比左其中一隻杯個女侍應話：「妳可唔可以幫我拎住呢隻杯？」如果你面前既客咁同你講，你緊係會咁做啦，呢個女侍應都唔例外。

而當個女侍應一拎住個杯，能蟹就開左支酒，慢慢倒入女侍應個杯入面，就一邊倒一邊話：「其實我好想請妳飲一杯，但又唔知點開口好，如果妳唔介意，可唔可以同我飲返一杯，做個朋友？」

個女侍應呢一刻先醒覺自己中左能蟹既招數，而七三廿一係旁邊，露出左一個技驚四座既表情，完住係佩服既眼神望住能蟹。



個女侍應就咁同能蟹飲左杯酒，然後能蟹就話：「可唔可以比你既電話號碼我啊？」

女侍應笑左笑後話：「我而家唔太方便啊，一陣放工先比你ＯＫ？」

能蟹好瀟灑咁比左個ＯＫ既手勢後，個女侍應就走開左。

然後，就係七三廿一既拍掌聲，「師傅果然係師傅，我今日學到野拿，搵機會要試下先。」

能蟹而家一副比七三廿一捧左上天既感覺，而阿琪同ＪＵＤＹ就為之則目咁望住能蟹同七三廿一，唔多想理佢地。

不過……我都覺得頭先能蟹果招都咁好用，學左佢先，雖然唔知以後有無機會用。