[愛情無限loop] 就係咁，我做左女神一年既備胎: ２３４　阿琪終於講

相信我，當你一心相信奇蹟就係眼前既話，你既跑速真係可以同奧運算手有返咁上下，我連升降機都唔搭，直奔樓梯街落樓，係路上，我不停覺得旁邊既視野都比一陣光包圍住。

係啊！呢Ｄ一定係希望之光！

我向住面前既目的地一步一步咁跑過去，去到茶餐廳門口既我，雖然不停喘氣但我毫無累既感覺，目光掃視現在每一個位，直到搵到發出最美麗既光輝既佢。

無錯，就係阿琪。

當然旁邊仲有能蟹佢地啦，但係呢一刻佢地對我黎講已經唔重要，我慢慢行去阿琪到，只見到佢一副扮晒嬲既樣，但佢又忍唔到自己既微笑。



「你又會咁快……」我直接ｋｅｅｐ左當面行緊過黎既能蟹。

「阿牛，頭先我地……」唔好意思阿珍，我而家唔想同你講野住。

「我……」七三廿一直頭理都唔想理。

而坐係阿琪旁邊既呂晨見到我咁，都好識趣咁話：「我地幾個坐去另一邊啦，由佢地兩個傾一陣。」

呂晨真係識做野。



而我行左過去後，坐左係阿琪既對面，本來我想先開口問阿琪果個男人既野，但估唔到比阿琪搶左個主動，「點解唔黎接我出院？」

「……我……」我一時之間諗唔到點答佢，用左本能既心情答：「我怕又見到果個男人。」

「果個男人？」阿琪問，但我由佢眼神睇得出佢呢個係明知故問。

「果個話係妳未婚夫既男人。」我答阿琪，而阿琪就笑左一下後，點一點頭：「係啊，無錯，果個男人係我未婚夫。」

同一個意思既說話，係阿琪既口中講出黎既衝擊仲大過果個男人講，如果話果個男人講既時候震憾已經係宇宙大爆炸既話，咁阿琪講出口一定連爆左十次。



我聽到後呆左，然後慢慢咁低下頭，因為我唔想阿琪見到我熱淚盈眶既樣，而我同阿琪講左句：「……咁……我祝福你地。」

唔知點解，我聽到阿琪係到笑，本身低頭既我抬高返個頭望住阿琪，而佢就話：「我都未講完，個男人可以話係我未婚夫，但又可以話唔係我未婚夫。」

「下？」呢下我就真係唔知點反應好，應該係話唔明佢講咩野，「咩野叫又可以話係，又可以話唔係？」

阿琪聽到我咁問就話：「仲記唔記得我講過，我有好多野煩既？」呢一句講完後，阿琪既笑容就全部收起晒。

「記得。」我好認真咁答佢，而阿琪又問我：「你係未真係想知？」

「想。」我諗都無諗就答左阿琪，而佢就倒抽一口涼氣話：「好啦，我就話你知。」