[愛情無限loop] 就係咁，我做左女神一年既備胎: ２４１　能蟹與果個女人

係的士上面，除左司機開得好大聲既收音機，坐係後座既我同能蟹一粒聲都無，其實我都幾好奇，點解能蟹飲左咁多，行路都行得咁直，而又可以跟到個女人？

頭先同能蟹上車之前，佢都一直喊緊，話自己係個賤人，係佢害左果個女人，我問佢果個女人同佢係咩野關係，佢又無理，只係不停係度講。

直到落車，能蟹都無講過，我話要扶佢，但佢推開左我，「我識行！」咁我見到佢又真係識行，仲行到好直添。

我係佢身後面，望住佢既背影，無奈、自責，突然，佢行埋左一邊既石壆，好辛苦係度嘔緊。

行到佢既身邊，「兄弟，你唔講比我聽，我點幫你。」



能蟹一邊嘔，一邊好用力咁捉緊我隻手，望住佢好似嘔晒全部野出黎後，佢深呼吸一口氣，「你明唔明白點解我之前反對你追阿琪？」

我打左個突望住佢問：「做咩無啦啦講呢Ｄ野？」

能蟹佢坐左係石壆上面，當然個位係乾淨啦，佢休息左陣透順條他話：「好幾年前，我其實同Ｂ男好似，係一個四圍食女既賤男，當然Ｂ男係靠有錢，而我係靠自己既外貌啦，一直得天獨厚既我，可以話係溝親都中，不過自己送上面果Ｄ我就唔會睇得上眼。」

「咁關我追阿琪咩野事？」我問。

「唔關事。」能蟹好直接話：「你頭先唔係一直問我果個女人同我係咩野關係？」



我傻笑左一下，見到能蟹而家咁，都唔知佢直醉定假醉。

「果個女人以前好乖，好純，係有一次佢有個朋友去酒吧慶祝生日既時候，我地兩個識左，之後佢就不停搵我，但當時既我無睇上佢，因為好似頭先咁講，自己送上門既女人，我係唔會理，但係佢就一直搵我，仲開始為左我做左好多野，整飯盒比我、煲湯我飲、甚至佢知道我住邊後，佢會上黎我度打掃屋企，佢無怨言咁為我付出，未問我要度過任何回報。」能蟹話。

而我聽到佢講到呢個女人咁好，我都Ｏ晒咀話：「呢種女人香港應該絕種ＷＯ。」

佢嗤笑左一聲，「好多人都係咁講，但係我無咁諗過。」

下！？咁都無諗過？



「果陣時既我，覺我佢為我既好係理所當然，因為佢追緊我，我只要享受呢個過程就得，無需要對佢負責，而且我同佢無肉體上既關係，感情上更加只係朋友，甚至佢會睇到我同其他女人搞完野後既境況，我都同佢講到明我地無可能，但係佢好似點講都聽唔入耳，就係咁既相處再一段時間，都係果句，紙係包唔住火，等一個人既耐性總有一日會被一個唔值得既人磨滅，終於有一日……」能蟹講講下，嘆左一口氣。

「點啊？果個女人點啊？」我問。

「佢係我面前喊左一次，不停問我點解為我付出左咁多，我都係無動於衷，佢仲話我只會鍾意Ｄ壞女人，所以，佢係我面前將佢留左好耐既頭髮剪短左，我想阻止佢，但係佢用剪刀指住我唔比我行前，我眼白白見住佢將自己既頭髮剪短後，佢就衝左出門口，以後我都無再見過佢，就算我問佢Ｄ朋友，都無佢既消息，直到上次，Ｂ男既電話入面……」能蟹講到呢度，一拳打左落石壆上面。

我聽完佢所講既野，無言以對咁同佢一齊坐左係石壆上面，而佢就話：「你知唔知當七三廿一果陣叫我教佢做男神，因為佢想學壞，我就諗起呢個女人，所以我好想教七三廿一，唔係想教佢做男神同學壞，而係做返過有自信既自己。」

「我知啊，七三廿一同我講過。」我話。

「但你知唔知，我擔心你同阿琪，就好似我同果個女人咁，你而家就好似果個女人以前咁，而阿琪，就好似以前既我，我怕到最後，你會無故地被阿琪傷害。」能蟹呢一句話，好語重心詳，但無奈我聽落唔多開心。