「哈……」就係馬高既討厭笑聲之下,宣怖左我地第一場既遊戲輸左比佢,SUNNY、七三廿一、阿珍同拾拾即刻衝左出去扶返JUDY同COW過黎,扶左佢地返黎後,見到佢地兩個依然微笑緊,不過我地點叫佢地,佢地都無醒。

可能,係因為佢地一直以後咁辛苦行到而家,太累,所以想休息下。

而馬高,佢就好得戚咁話:「飲左咁多我都有少少便意,去個廁所先,我就比你地係呢個時候休息下,等我返黎,我就話比你地知一陣既遊戲係d咩。」

然後,佢就攬左兩條女行左去廁所,而兩條女其中一個係阿銀。

將一切見在眼內既金姐,愈睇愈嬲,佢咬牙切齒咁望住馬高既背影,好似想即刻衝上去打佢一鑊,不過果d大隻佬好似見到金姐咁,即刻行左黎我地既前面,擋住左我地既視線。



「金姐……對唔住……」我同金姐講:「第一場就輸左,唔好意思。」

「傻啦,係佢地出左術,你都唔好自責,而且仲有兩場,我地贏返就得。」SUNNY話,然後就捉緊金隻既手,「放心,今晚之後,我地一定可以將阿銀帶返自己既身邊,跟住以後既事,以後先算。」

金姐聽到SUNNY既說話後,點一點頭。

「……唔知,一陣既遊戲係d咩呢?」呢個時候,拾拾就好擔心咁話:「第一場既比賽佢已經出術,跟住既比賽……」拾拾無講晒佢想講既野,因為佢擦覺到,佢所講既野,已經影響緊我地既心情。

「就算佢點出術都好,我地都要贏。」呂晨話:「JUDY同COW已經駁晒老命,我地唔可以浪費左佢地既努力,就好似JUDY頭先咁講,我地輸咩都好,唔可以連自己既尊嚴都輸。」



「我……我都知……不過……」拾拾慾言又止,而七三廿一就行到佢旁邊,向佢搖一搖頭示意叫佢唔好再講落去。

我明白,我明白拾拾擔心d咩野,一開始馬高開出左果個條件,如果我地一陣果場真係輸左既話,佢地幾個女仔都有危險。

本身好多野講既能利,到而家呢一刻都無講過咩野,佢目無表情咁,唔知佢係緊張定係驚到唔敢出聲?而我再望一望遠處既能蟹,佢都一樣,仲帶有一副想幫我地手但自己無能為力既表情。

睇黎我地呢邊既士氣真係好低落。

「不如我地問下阿塔知唔知一陣會玩d咩?」阿珍話,然後佢就係個GROUP度問,而我本身都想開一開個GROUP睇,不過個頭仲痛緊,真係無咩力去拎部電話出黎。



而阿珍問完阿塔,阿塔就好快答返得地,仲影左幾張相,阿珍一見到果幾張相就話:「唔係掛,第二場唔通都係鬥飲?」

阿珍講完後,將佢部手機比我地睇,見到既,又係一車又一車既酒。

如果真係又鬥飲既話,我地真係無咩把握可以贏到。