我同金姐大既講左我同阿琪而家既情況,金姐聽完後,無表情,無表態,只係好靜咁望住我,我比佢咁樣望到好唔自在,問佢:「金姐,妳唔好粒聲都唔出望住我啦,我黎就係想聽下妳既意見咋。」

金姐企左係身,下左入廚房倒左杯水比我,「……金姐,我唔係要飲水啊,我係要聽下妳既意見。」

「飲左水先啦。」佢同我講,而我都聽佢話飲左啖水後又問:「金姐妳覺得點啊?」

「冷靜d未?」金姐問我。

我無奈咁望住佢:「我一直都好冷靜wo。」



「咁就得啦。」金姐既回答,令我都唔知佢想講咩,而佢見到我成個諗樣,就話:「如果你一直都好冷靜,其實你頭先所講既野已經成為左你既答案,做咩仲要我既意見?」

又係,金姐講既係岩,因為我已經決定左咁做,但係,點解我又要黎呢……

「你想聽我意見,只係有一個目的,就係想搵個人認同你既做法,令到你更有信心去做你所定下既決定。」金姐話,無錯,我想做既野就同金姐所講既一樣。

「咁妳既意思係……」「我係唔會對呢樣野作出任何評論。」金姐斬釘截鐵話。

我聽到佢咁講,真係呆左一呆,然後話:「就一句,支持同反對我都無所謂。」



「牛仔,而家最大問題唔係我既答案,而係你既人生係由你自己去選擇,唔應該交係別人既手上。」金姐呢一句後,我又進入左呆坐狀態。

「你要明白,愛一個人,係自己既選擇,為一個人放棄左某d野,都係自己既選擇,相對地,被一個人愛都係一樣,接受一個人為自己放棄都係一樣,所以你而家最緊要知道既人係,你對阿琪既付出,你選擇左點行就得,同埋要緊記,所有野都係你自己選擇,如果阿琪到最後真係唔接受你既受,要怪都只可以怪自己,知道未?」金姐呢一段說話,關心中帶有警告既意味。

我靜左一靜消化緊金姐既說話,然後向佢講左一句:「我明白我已經有左決定,但都係想聽下妳既意見。」

金姐嘆左口氣話:「唔支持,因為我唔知阿琪對你既意思係點,唔反對,係因為愛情呢樣野只可以自己去選擇,不過,牛仔你要記住,愛情係雙方,如果單方面付出到某個地步,小心適得其反。」

聽完金姐呢一個中立既意見後,我對佢點一點頭,「知道。」



我明白向我講咁多野,係因為擔心我做錯決定,不過佢已經知道我想點做,所以,講咁多野係因為想我……