[校園] 給我一個能留在你身邊的角色: 「一」
唔知呢個係咪因為我讀女校，我身邊嘅同學十個有八個都會有一個好感嘅女仔，有啲鐘意嘅係同班同學，有啲會係高form，有啲係偶像歌手。佢地迷戀起上黎聽情歌會諗起嗰個人，會係嗰個人生日用唒自己啲零用去買禮物，不知不覺間就邊咗隻兵仔。佢地可能有為自己取向困惑過，亦都可能知道呢啲不過係一種崇拜，而我一直都係側邊恥笑呢班傻仔，直到我識到佢。
我叫陳諾玲，今年中六，成績中等。雖然我讀咗六年女校又未拍過拖，但我一直都好清楚自己鐘意嘅係男人：我鐘意聽張敬軒啲歌，去聯校活動會因為有男仔同我傾計心動，搭地鐵巴士會偷偷地留意下同我差唔多大嘅男仔等等等。但係三年前有一個人侵入咗我個世界，佢係一個老師 — 陳雅渝。
我第一次識佢係係中三嘅一個camp，大家都係諗住無無聊聊入去挽通宵，但係唔知好彩定唔好彩我嗰日黎m，仲要係day2。
「喂你點呀，駛唔駛我留低陪你呀。」我同房兼老友蔡子稀講。
「唔駛啦，又唔係第一次黎m，佢地帶唒啤牌麻雀，你過去啦。」
於是間二人房就淨返我一個，因為真係好痛我就成個人趴咗係張床到，迷迷糊糊咁瞓着咗。瞓瞓下突然感覺到有人摸我嗰額頭，我一開眼見到嘅就係Miss Chan。
由於佢唔教低form我一直都唔識佢，淨係知佢同啲高form好似好close，成日見到佢同啲學生有講有笑。佢係女仔中算高，頭髮中長，平時學校見到佢化咗妝唔講嘢會覺得有啲難接近。而嗰日我打開眼見到嘅，係佢岩岩澡完涼帶住副眼鏡着住件hoodie嘅頹look。
「你地班主任叫我黎幫手巡房架，敲門見無人認諗住睇下你地瞓咗未，點知見到你燈都未熄就趴咗係到，無發燒，m痛呀？」
「嗯......」我嗰陣已經痛到飛起，加上俾嗰陌生人咁問有少少尷尬，又怕佢追問子稀係邊然後會記名，因為講咗十一點要返自己房。
「飲啲暖水啦，食唔食止痛藥呀？」
「無帶......」
佢出咗去一陣就返咗入黎，拎住杯水同粒藥。佢扶我坐起身，睇住我食完就幫我拎被，熄燈，臨走前講咗句：「叫你同房聽日唔好咁夜啦。」笑咗一下就出咗去。
出咗camp後係學校見到佢都會同佢打招呼，開始留意先發現其實佢好有氣質。佢皮膚偏白，對眼就算無畫眼線都好大。我好鐘意見到佢笑，佢每次同啲學生傾計我都會扮經過望下佢，佢笑起上黎左邊面會微微凹落去，對眼會向下微微彎，微曲嘅眼睫毛會隨住佢嘅笑聲一眨一眨。平時一個人嘅時候，佢就會唔講嘢唔笑，但唔係黑面嗰種，而係好似好多嘢諗，好多嘢煩。佢並唔係電視裏面嗰啲女神樣，但仔細留意嘅話會發現佢低調嘅完美。