陸行貓的毒撚溝女日記: 相識

由小學到初中為止，同齡女仔係我既生活入面從來都係路過，時有出現，但從來唔係生活一部分。
直到差唔多中二，我開始睇一套日本卡通公仔動畫，叫做＂薔薇少女＂。

係。烏大龜cosplay翠星石果套動漫。
假如我從來無接觸呢套野，恐怕我而家都會同烏sir一樣，溝唔到女，日日渾渾噩噩咁渡過，雙目無神，口齒不清，口中時不時彈一句「XX is MK beha唔識串」。
雖然事實上除左溝到女，其他幾項都完全符合我既現狀。

睇左呢套野之後…………其實我都係無溝到女。
果陣我日日上堂就同同學提呢套野，提到個個都煩撚左我。
當然，無同女同學提，我敢聊女就唔係毒撚啦。


我既社交圈無因為睇呢套野而擴闊。

但係，我開始為左呢套薔薇少女寫同人文post上網。
當然同係膠登寫既故一樣，無乜人睇。
不過寫到第廿四章，差唔多十五萬字果陣，有個性別係女既會員留左個GP俾我。就同每一個發情毒撚一樣，一見係女會員留名，即刻就鏟左上人地profile page 查家宅。
係內心掙扎左一陣之後，我決定留句言騷擾人地。
點知佢好快就回左我，並且表示佢都係香港人。

我出同人文果個網站係台灣網，我估佢答果陣唔知我都係香港人。
我興奮到即刻影左張深水埗 西九龍中心九樓遊戲天地 既薔薇少女展品俾佢，曲線表明我都係香港人。


之後我一路寫，一路騷擾果個女會員。

其實我都諗過，話係性別女姐，容乜易係教皇鴨呀，大吉嶺果班網上人妖？
但係我都忍唔住同佢係網上係咁傾係咁傾。
有一次佢差唔多半個月至一個月無回我，我都打定輸數既時候，佢又回返我喇。
我為左唔俾人當做兵，於是好柒咁樣回應：我就黎考試，要封機一段時間。
其實我巴不得好似隻狗咁奶埋去。

總之我同佢就好似普通網友咁傾落去。
果陣差唔多七月一號，話題講起七一遊行。


當時左膠呢個term仲未流行，我同佢相繼扮關心香港，兩個都話我會去。
我呢D鍵盤抗爭者當然無去，而以我而家對佢既了解，佢恐怕都係吹水了事。

薔薇少女篇同人寫到大概三十六章左右就正式絕後。
不過我同佢既溝通就依然未斷。我開始重新寫一篇原創同人，而佢都依然受落。
我地傾到果年既11月，果陣我係中學合唱團遇到D阻滯，開始同佢呻。
夾埋夾埋呻左兩個鐘。其實邊有咁傷心，係我D演藝天賦令我講到好似好傷心咁樣。

之後我覺得同佢關係好似拉近左。
我從佢口中得知，佢大我三日，所以佢要我嗌佢姐姐。
有D女仔其實只係想你嗌佢一聲，而唔係嗌佢一世。
而家我叫佢姐姐既話佢肯定西口西面。

果年既12月，佢問我鍾唔鍾意佢。