陸行貓的毒撚溝女日記: 始亂

某一日藤子係朋友鼓勵下向我告白，我都無正面拒絕。
我明確話比自己知，我已經出左軌。比起背德快感，我首先感到既係自責。
據阿魚所講，當時我根本未同佢拍拖，自然談唔上出軌。
但我知道我當時正在同時向兩個女仔做曖昧行為。

始亂既結果係咩？

據藤子所講，佢係家庭唔係好感受到愛。
所以佢話當有人對佢好果陣，就會好容易鍾意人。



以我感覺判斷，佢應該講得無錯。
當佢鍾意人之後就會好癡身，癡到分分秒秒都想同你一齊。
而我同阿魚就相反，多數係我纏佢多過佢纏我。

犯賤呢回事男女都一樣。
覺得自己不被愛，所以人地稍微示好就訓身埋去，呢點男女無分別。
我明呢種感受。





我同藤子係online game入面好鍾意去一個景點拍拖。
果度叫光之塔。係古文明機械時代遺留落黎既一座高塔殘骸。
座落於一個島上面，被一潭死水包圍。
背景音樂我覺得非常好聽，我同藤子都好鍾意果度。
仲要無主動怪，簡直完美。

（本文落筆時阿魚堅稱果個景點有好多怪打柒佢，但我實驗結果指出，玩家唔做攻擊性行為根本無人會打你。）

我地一去通常都坐幾個鐘講心事。
我扮到好似大哥哥咁，有時分享，有時聆聽。


當時我甚至諗過，如果佢同阿魚都肯陪係我身邊就好。

於是我地曾經邀請過阿魚黎睇風景。
佢既回答係：「你兩個係咪傻撚左，想睇屎水做咩唔去城門河？」

有一日我忽然係藤子面前消失左。
果陣我幾乎隔日先上一次Game，因為藤子無時無刻想同我一齊玩。
無人係身邊佢會覺得好孤獨。

當時我大概中五，睇左陶傑某本文集講既理論：留信分手，對女仔傷害極深。反而無聲無息一片Black Out，會比較易接受。
當年我係隻小學雞，唔知凡事都要兩睇，更加唔知唔應該一本通書睇到老。
成件事只有我係需要負責任。

有時同阿魚提起呢件事，佢都會屌柒我係咪男人黎。
既然無信心一齊，做咩要應承人。


既然決心要離開，做咩唔講出黎。

我心裡面有答案。
我只想享受被愛既快樂，唔想付出愛人既負擔。

而家我或者係男人，但當時肯定唔係。
就算我係，都係因為覺得自己係呢件事上反省。
而造成既傷害我已經無法彌補。

過左幾個月，我偷偷上左線。
信箱塞左好多封藤子既留言。

有時我仲會好似癡線佬咁search 藤子既野，希望搵到佢既痕跡。
我搵到，但我唔敢道歉。
佢同另一個公會成員去左新團，畫下畫，同女仔朋友認下親，好似都幾開心。


我希望佢真係開心。



直到港台服埃米爾物語係2011年正式執柒，先至真正斷左聯繫。
藤子既故事仲有一小段，日後再講。

始亂，自然終棄。
生於貧瘠，最終亦會歸於貧瘠。