陸行貓的毒撚溝女日記: 初會

呢幾年阿魚成日話，第一日同我見面果陣佢一早應該報警拉左我。
因為我第一次約佢出黎就嘴對嘴夾硬咀左佢。
而且係孤男寡女獨處一室。

係我識左阿魚接近兩年後，我地開始係網上愈行愈近。
雖然間唔中會因為我D毒撚脾氣搞到冷戰一兩個禮拜，但總體而言我地從未分開。
中間多少有人追過佢，不過俾佢一一回絕。
每次佢俾人追，我都癡住佢問長問短，有時仲開口建議佢唔好同第二個一齊。

阿魚並唔係性冷感。最近幾個月佢話，俾男仔追其實令自己感覺到自己有魅力。


應唔應承係另一回事，但一定會開心。

後來阿魚話，其他人俾唔到佢果種感覺。
阿魚聲稱，果種係有時聰明，有時自信，但大部分時候都蠢撚過隻豬既感覺。
除左頭兩點之外我完全同意。

我係MSN上面開始性騷擾阿魚。
由一開始攬攬錫錫，到開始一鍵舌吻一鍵渣波，不論我點試探，佢都無拒絕。當然，限於網上。
我問佢點解，佢話，我地都算咁親密，俾你性騷擾下有乜所謂。
我一直都話阿魚man過我不知幾多。


後來反而係阿魚玩我身體而我會驚青。

終於有一日，我話，不如傾個電話。
阿魚話好，然後佢打過黎。

「你好，香港守時協會。」

阿魚嚇到即刻收左線。
佢話電話一通就有個怪叔叔講埋D唔知乜野協會，幾驚打錯電話。



阿魚把聲其實幾好聽。
尤其係佢講粗口果陣，把聲特別甜。

當時我屋企換樓，搬左出去住，舊屋就咁空左係度。
我話，不如約出黎見下。
地點直接簡左果間轉左業主，但尚未有人搬入既舊屋。

非常標準既一次幽會。

果日約左係九龍灣地鐵站。
第一次見之前，我仲諗過如果阿魚係醜女 / 人妖會點。
我會唔會轉身就走？
我真係有諗過，不過應該諗下only。

係C出口（其實應該約係B出口），我見到阿魚。


我第一反應係，我呢D毒撚邊度會識到咁可愛既女仔。
佢當時戴住副眼鏡，個人好細粒，又白，雖然畢左業，但話係青靚白淨學生妹肯定有人信。
我記得佢張相明明有D baby fat，但真人唔多有果種感覺。

我為免柒爆仲特登打多次電話。
果個細粒女仔電話響起，然後佢接左。
我終於確定果個係阿魚。

我呆左係度，而佢行左埋黎。
「你張相好睇過本人喎。」