【小喬初嫁了】初戀女友結婚前的一場鴻門宴: 第四章

我叫孫畢渝，不記得誰第一個說我的樣子像一隻聖誕鹿，叫著叫著，我的別名就順利成章叫阿鹿。 


每當認識新朋友時，他們總會對我的樣子仔細打量，然後苦惱一番，搔著頭說：「呀......你個樣.....你個樣好似......一種生物，但我一時間講唔出。」 


一臉大便拉不出來的樣子。 


直到我說：「係咪鹿呀？」他們才終於拉出來的樣子，抱歉有點粗俗，他們才茅塞頓開。 




大概這不是一句讚美，因此他們總會補一句：「似鹿好呀，夠溫順。」 


我是不是一個溫順的人？我不太知道，但好像真的很多事都不會反抗，不順意也算。 


每個故事的主角，通常都是普通人，我也不例外，比普通人更普通，更不起眼。 




運動不行，沒有專長，沒有任何技能。 


我所讀的學校也很普通，唯一特別是，身邊有一個奇怪的朋友。 


「哀吾校無芳草，羨鄰校之佳人。」是薯條的口頭蟬，每次遇上其他學校的女生時，他總要唸一篇，以作默哀。 




「阿鹿，你話點解個天咁唔公平，點解我地間學校會咁。正所謂：波、腳、樣、髮，國之四維，四維不張，男人乃滅亡！所以唔可以怪我地無心機讀書。」 


薯條最喜歡將歪理混入道理中。


當年的我們都深受王家衛的影響。特別是薯條，他最喜歡的就是阿飛正傳裡面，張國榮認識張曼玉那一幕。 



「十六日，四月十六日。一九六零年四月十六日，下晝三點之前嘅一分鐘，你同我係埋一齊。因為你我會記住嗰一分鐘。從而家開始，我地就係一分鐘嘅朋友，哩個係事實，你追唔返，因為已經過去咗。」 


薯條把整段台詞都背了，他總幻想有一日會大派用場。 




「你要記得改日期，如果唔係仲係一九六零年會嚇死人。」我說。 


我總是持相反的意見，現實生活哪能用得上，這是電影對白呀。 


可是對薯條來說，在他身上是沒有不可能的，他能竟出乎人的想像。在中四那年，他說在圖書館遇上一個很可愛的女生，然後他按耐不住竟然對她搭訕。 


「然後呢？」我問。 


「然後咩？」 




「不如你將成件事由頭講起。」 


「咁星期六，你都知我鍾意去樓下陳記嗰間魚蛋度食碗牛腩河架啦，咁我咪照常落去，咁落去嘅時候撞到四姑婆拖住架車......」 


「喂薯條，你咁樣唔得架，啲人又會係度鬧我呃字數。」 


「呃字數？」 


「無無無，你繼續。」 




「當我係圖書館見到個女仔，覺得好靚咪行過去，照版煮碗咁講台詞。」 


以下為當時實況，地點：圖書館成人圖書部　時間：5:30p.m. 


「小姐，你今日有啲唔同。」 

「吓？我地第一次見架咋啵。」那個女生說，眼神還閃露著出她的不安。 


遇上台詞不一樣，薯條當然有點錯愕，但他仍能接下去。 




「點解你隻耳仔咁紅嘅？」


「係........你可唔可以唔好再係我耳仔側邊講野。」女生扭捏地避開。 


「我只係想同你做朋友啫。」 


「但我對同陌生人做朋友無乜興趣......」 


「你睇下我隻錶。」 



滴嗒滴嗒...... 


大概到了三十秒左右時，那個女生終於忍不住說：「Sorry......我唔明你隻翻版Hello Kitty錶有咩好睇，我都係走先啦。」說罷，她就沖沖忙忙地走。 


薯條還是沒有機會說出那句對白。 


他最終只能望著女生的背影說：「哩隻係Miffy......」 



薯條不明白，因為他不是張國榮，如果你擁有張國榮的樣子，基本上你說粗口也能吸引女生。