【小喬初嫁了】初戀女友結婚前的一場鴻門宴: 第十七章

「點解你會係度嘅？」她顯得很詫異。 




「因為妳電話......唔通......」我喘著氣說。 






「我係話，點解你會知我係度嘅？」 




「我都唔知.......我直覺。」 






「直覺？」她顯然不太相信。 




難怪的，問任何一個人也不會相信。 






「但我真係跑咗過嚟，最重要係我係度。」 




由旺角跑到尖沙咀。 




「點解妳電話.....妳唔係食飯咩？」我問。 






「係呀......」她的樣子看起快要哭出來似的「對唔住呀，我本身早走咗，諗住早啲嚟，但走咗先發現電話開唔到......」 




「無電？」 




她搖搖頭扁著嘴說：「但就係開唔到。」

我檢查一下後，發現好像真的壞了。 






敗給一部電話。 




「Sorry呀.....累你跑過嚟。」 




「唔緊要呀，最緊要妳無事。」我說。 






「你點解咁蠢呀。」她輕輕打我一拳，不痛不癢。 




「我覺得咁唔係蠢呀。」 




「不過，你真係無端端搵到我？」她又再問。 






「係呀，搵咗好耐架啦。」 




「無問我朋友？」 




「我都唔識妳啲朋友。」我笑說。 




「好神奇.....哈哈。」她說。 




我們並肩漫步海旁，張彩悠今天是清純的打扮，牛仔外套加白色長裙，戴著白色的冷帽。 




在維港燈飾的映照下，她精緻的輪廓顯得更美。 




特別是她水亮的眼睛，燦若星辰，從她眼中仿佛能看到世界的所有。 




深夜九時多，海旁仍有不少人群。

「都幾凍。」 




跑完步，流一身汗後，確實有點冷。 




她把自己紅色印有雪花圖案的左手手套脫了，遞給我。 




「同你一人一隻，等你無咁凍。」 




「唔該。」 




她遞上一份聖誕花紙包好的禮物給我。 




「聖誕快樂呀，阿鹿。」 






「多謝.....呀係啵。」 




我從袋中拿出聖誕鹿角，戴上頭上。 




「妳話我要扮鹿，如妳所願啦。」 




她笑得口不攏嘴：「哈哈哈，好似呀。」 




四周的人都注視著我。

「你係咪會戴住成晚？」 




「妳想我戴，我咪戴囉。」 




「低B。」她卻笑得很甜。 




「我都有禮物畀你。」我從袋中拿出一長板的東西。 




「係咩嚟架？」 




「妳之前咪問我，我日誌畫嗰個女仔係邊個嘅？」 




「係呀。」 




我把禮物拆下，是一副畫作。 




和往常的畫作一樣，只是這次不再是背影。 




畫裡畫了一朵朵菊花在籬笆下，背後是一座山。 




「我唔明.....」 




我指一指畫下的小句：「采菊東籬下，悠然見南山」 




「陶淵明將妳寫入詩裡面，而我好希望成為你嘅波納爾。」 


天氣很寒冷，冷風在呼呼而掃。 




我把她冰冷的左手緊握著，然後放在我的衣袋裡。 


「今日聽日以後都將每一刻嘅妳畫入畫裡面，可唔可以？」