「你覺得我得唔得?」一個黑色爆炸頭、戴著一副金絲眼鏡、左臉上還有三道刀痕的人拍我的背面。 


「嘩!你邊個!?」我禁不住大叫起來。 


「薯條呀。」他用手把假髮脫下,我才認出是薯條。 


「你痴咩線呀?」 




「我個造型點,係咪好吸引?」 



「吸引,好吸引人打你。」 





「挑,唔識欣賞。」 



「你搞咩呀?」 



「我今日約咗劉嘉彤。」他一臉得意洋洋。 





「所以你諗住去嚇佢?」 



「我諗住去同佢出街。」 



「你確定哩個真係出街裝?」 



是不是潮流走得太快。 





我實在跟不上。

「做咩啫,人哋搞咗好耐架啦。」 



「你可唔可以講下你哩身......造型係點嚟?」 



「佢話佢鍾意架。」 





「佢話佢鍾意?」 



我有沒有聽錯? 



任何一個對美學有半點要求的人,也不致於偏差到這個地步吧? 



除非,她的口味真的...... 





「真架,我問佢嘅。」 



「咁你係點問佢架?」 



薯條模擬當時的情景。 





「喂,唔該劉嘉彤呀。」 



「佢而家唔係屋......」 



「劉嘉彤!係妳啦!」 




「哈哈......」

「我想問妳星期一得唔得閒?」 



「要返學。」 



「即係放學得閒啦。咁約妳放學等。」 



「......拜拜。」 



「喂咪住,我仲想問妳多條問題。」 



「咩問題呀?」 



「你覺得男仔咩髮型好睇?」 



「光頭掛。」 



「光頭都唔係髮型,有無另一個呀?」 



「......爆炸頭掛。」 



「好好好。」薯條馬上在電話另一邊抄筆記。 



「......拜拜。」 



「咪住先!仲有,妳鍾唔鍾意男仔戴眼鏡?」 



「唔鍾意,除非金絲眼鏡。」

他馬上又抄下。 



「咁.....妳覺得點樣嘅男仔先有男人味?」 



「臉上有刀疤掛。」 



「喔.....刀疤......」 



「所以你真係幫自己整咗刀疤呀?」我問。 



「當然唔係啦,痴上去啫。」他說。 



明顯地,劉嘉彤是玩弄他。 



到底是真不知還是假不知,我都分不清。 



「我對今日嘅約會好有信心。」薯條說。 



我心裡實在為這個兄弟擔心。 



為此,我決定跟蹤他們約會! 






「咁妳覺得我似邊個明星?」 




「海綿寶寶。」