【小喬初嫁了】初戀女友結婚前的一場鴻門宴: 第三十六章

「竟然係嗰一次？」咖啡的苦澀味停留在嘴裡，久久不散開。


「嗰時覺得你好型......可能我嗰時病到暈暈地，視覺有問題掛。」她笑說。


「我本來就真係型，好唔好？」我說。


「係呀，你真係好毑型。」她開玩笑說。




「嘩好衰，妳幾時變到咁。」


「可能係以前跟得你太多。」


「都無變得咁壞架。」




「我不嬲變咗好多，係你唔知啫。」


「覺唔覺，其實以前好好。係人未改變長大之前。」我說。


我是回想起一幕幕以往的片段，感觸而說的。




「無憂無慮，唔洗負咁多人生責任，當然好。」


「而係夠純真，未變質。又或者......因為有人陪。」我盯著她說。


「唔......人總係會變。」


她有細微的抱一抱雙臂的動作，我看見就把自己的外套脫下遞給她。


「妳凍嘛。」




她笑了，笑容還是跟以前一樣。


唯一一樣跟以前相同，讓人消除陌生感的，就是她的笑容。


不變的，是陽光笑容。


「你都變咗好多，變得細心咗好多。」


「咁妳就錯啦。」




「錯？」她疑惑地問。


「係因為我無變過，先會咁樣。」


她好像似懂非懂。


「你講咩呀？」


「我係話......其實......你係咪一定會結婚？」




這時候，她的電話響起來。


應該又是Terry。


「對唔住呀。」


「唔緊要，你聽啦。」


她接上電話後，甜蜜蜜地細聊幾句後，就掛上電話。




「我哋都差唔多囉可？」她問。


這是結束今晚的暗示嗎？


「差唔多啦。」


「阿鹿，多謝你。今晚見返你，我覺得好開心，好似又返返去以前咁傾計。」


「唔洗，我都覺得好開心呀。」


「仲要咁有心思。」


「心思？」


「你記得我講過，我好鍾意迪士尼，想開一間同哩間差唔多嘅餐廳。證明你真係有用心揀過。」


「哈哈，小兒科啦。」


她起身，意味著這頓晚飯已經結束。


不久，她就會成為別人的妻子。


我們也越來越遠。


「埋單呀唔該。」


「我嚟啦。」負責結帳是常識吧。


走出餐廳，天氣有點寒冷，街道上的行人也不多。


「多謝你。拿，可以畀你啦。」她終於把紙袋遞給我，裡面的東西不太重。


「可以而家開？」


「可以......」她呆滯幾秒後又說：「啊，都係唔好啦，你返到屋企先啦。」


「好......」


「我送妳返去？」


「唔好啦，好麻煩你。」


「最後一程，反正我無野做。」我說畢才意識自己講錯話。


「唔係呀，我唔係咁嘅意思.....」


「哈哈，我無怪過你。」她又問：「係呢，薯條佢近排點？」


「都係係德國好地地，無穿無爛。」


「其實她岩岩聽唔聽到我條問題？」


「問題？邊條？」


就是妳聽電話前的一條呀。


「無......無野啦。」


我從袋中拿出用藍色花紙包著的禮物給她。


「唔止妳有禮物架，我都有準備架。」


「咩嚟架？」她伸手想接時，我縮回：「咪住先。」


「做咩？喔，想小氣啦哈哈。」


「我可唔可以問妳最後一條問題先？」


「可以。」






最後的一程路，很寒冷。