《廿一歲個年，我成為左隱世富豪》－大結局: 第二十一章：再次認識
黎到聖誕前夕，香港濃厚既聖誕氣氛已經遠去，漸漸剩下既只係一啲更誇張而無情既科技，聖誕卡，甚至聖誕禮物，已經一早唔存在，甚至街上唱聖詩既人，都消失無踪。
即使係節日，大家都只係對住部電話過，即使係街上既情侶，佢地都只攞住部電話，係街上木無目的咁遊蕩，直到電話既電量完全消耗，卻忘記了節日既本質同應有既氣氛。
「你有一項新信息來自Joyce。」咦？Joyce？係咪上次係酒吧撞返個個中學同學？
「誠翔，今個聖誕得唔得閒？」睇下佢個頭像，的確係Joyce，而且頭像入面既佢，好似顯得更靚。
但係，諗起約左藍心在先，無理由推走藍心。
「我夜晚之前都得閒。」
「好。」
「我想約你去...」
雖然Joyce約我有啲突然，亦唔知道佢點解有我電話，不過話晒佢都係我中學唯一既朋友，只可惜佢完全唔記得我係佢中學同學，我諗佢都係為左答謝我上次送佢返屋企先約我。
一日無聊咁過去，見到聽日即將黎臨，都不禁興奮起黎，雖然聖誕節唔年年都有，聖誕節獨有既浪漫氣氛，我就好喜歡。
「喂，係咪誠翔？」Joyce第二日一早打比我，係電話聽佢正常把聲，都好甜。
「係啊。」
「太好啦，等陣十二點半係中環等？」
「無問題。」
「等陣見。」
「Bye。」
唉，又要去中環，唔使返工既日子都要返中環，無形既壓逼感真係討厭。
「特別新聞報導，係今日上午，香港首長梁振英表示參選連任，而且中央表示歡迎。」
「我，梁振英，願意為香港服務多五年，我知道自己係呢五年黎有不足既地方，所以我會係當選後既五年盡我最大既努力作出改進，多謝大家。」
係中環既大屏幕上顯示出呢個新聞，唔少市民聽到之後都大聲喝罵梁振英，當中包括左唔少問候既字句。
見到呢個新聞出現，最開心，當然就係我地烽火聯盟，見到世界越亂，和平就會越遠，睇黎係時候煽動下市民。
「Hi。」
「我地行啦。」今日Joyce都著得幾保守，可能天氣都凍返，帶左條頸巾，冷帽，而上身只係著左見白T加大摟，下身就一條黑色緊身褲同高筒鞋，比人既感覺好樸素，但係我都幾鍾意。
「係呢，上次多謝你。」唔知係佢面紅定有化妝，講野都有少少怕羞。
「傻啦，見死不救，我仲係一個男人？」
「上次我無做啲咩失禮既野阿嘛？」
「無，不過你就飲得好誇張。」我記得，佢好似因為男朋友既咩事而借酒消愁。
「我記得啦，你上次係因為男朋友先飲成咁。」
「我同佢分左手啦。」
「噢，對唔住。」
「唔緊要，唉，都係自己唔夠好，輸左比個又靚又有身材既女仔。」
「係咪個個男人都咁敷衍？」其實我好想答佢係，如果答唔係個個應該係盲，又或者扮清高，為既咪又係想得到更高質既美食。
「唔係，我唔認為得到一個女仔既身體就等於完全制服左佢，我覺得你能夠攞到你另一半既心，先係真正既降伏。」
「不過，愛情係相對既，要大家都攞個心出黎，坦誠相對，唔係既話...」
「我明架啦，多謝你，估唔到世界上真係有啲咁好既男仔。」
去到一間西餐廳，望住維港景色，今日個天灰灰地，可能係因為梁振英宣布參選連任掛，不過點都好，今晚唔好落雨就得。
「係呢，其實我今日睇清楚你個樣，你好似好熟口面。」唔通，Joyce佢認得返我係佢中學同學？
「啊，我記得啦，你咪係天聲集團*既總裁！」（*請參考人物角色關係表）
「Shh...冷靜啲。」周圍既人都望過黎，更加係到討論住我，令我有啲尷尬。
「唔好意思啊，太興奮添，我都有用你地公司款耳機架。」佢講完之後，我靜左落黎，諗緊，如果我地啟動計劃既時候，Joyce咪會同樣受到遭害？唯有係我地集團既員工，家人同埋烽火聯盟入面既表面公司員工先唔會受到傷害。
「其實...我地啲耳機都唔係幾好啫，嗱，我介紹...」
「唔係喎，我用左幾年啦，音質又好，條線又耐用。」我未講完，Joyce已經打斷左我既說話，唯有...
「不如你加入我地公司啦。」
「咩話？！」
「冷靜啲...我真係誠邀你加入我地公司，不過你唔想既我都唔會逼你。」
「真係既？我有興趣啊。」
「咁就好啦，你一月一號去我地公司，我會揾人接待你。」
「好，多謝你先啊，誠翔，其實我都想轉工架啦，係地產公司都做到好悶。」
「哦，原來你做地產公司做，咁就啱啦，我地正需要啲識樓盤啊，識玩樓既人。」
「係呢，大膽問你一句，你有無女朋友架？」突如其來既一句說話，不過我好快就回應左佢。
「無。」
「嗯...」
「對我有興趣？」
「唔係啊，唔係啊...你唔好誤會啊，我只係好奇總裁級既人既女朋友係點樣既人咋。」哈，真係搞笑。
「咁總裁都係人，都要食飯，屙屎，何況係有女朋友？只係我無咁解。」
「你咁好人，又有才能，又有型，點會埋怨無女朋友啊，只係你太高要求啫。」睇黎Joyce都唔錯，講我有咩好，都係講我既性格，才能，最後先係外表，Joyce呢個女仔應該都幾有內涵。
「比你發現左添。」
「呼，香港真係好靚。」食完牛排，放低刀叉，望住出面個景。
「係啊，只可惜，維港越黎越細，啲樓又越黎越密集，亦啲美觀都無，仲話咩東方之珠喎，一早已經過氣啦，而家啲樓仲密集過啲蜘蛛絲添啊。」哇，Joyce無端端搞左個冷笑話，搞到我打左個冷陣，但係佢個樣依舊認真，真係有趣。
「先生，盛惠五百六十二蚊。」我攞左張證比佢睇。
「哦，唔好意思啊，原來係王生，失禮晒。」
「咦？做咩唔使比錢既？」
「哈，你知唔知我有時都會黎呢到食lunch，而且呢間餐廳我有份，所以咪唔使錢囉。」
「哇，咁犀利，不過點都好啦，多謝你。」
我地食完飯，去左中環個海旁行左陣，人來人往既街道，不過海上面既天星小輪已經唔存在，更加成為左更多往離島航線既碼頭，又一個香港特色被剝奪，梁振英呢個特首真係做得好，助我一把分化香港；無錯，我地成功計劃既第一個目標就係香港。
自己一個無無聊聊咁行，見到外國人帶住聖誕帽，攞住支啤酒周圍行，如果無佢地，我諗唯一既聖誕氣氛都會熄滅。
行到去一間商舖，入面主要係賣生活用品，時尚用品，玩具，飾品等等既野，索性入去睇下有咩啱藍心，就當係聖誕禮物送比佢。