「我仲以為王銘然呃我添,你得咗米啦咩?」張家樂問。

「得鬼得馬咩......希望考試排名高過佢啦......」我説。

「咁點解你會同曉琳行街?」張家樂問。

「曉琳話佢同佢老豆鬧交,然後離家出走,然後就嚟咗我屋企住咗兩日。」我説。

「一齊住?」張家樂淫笑。



佢好似將重點擺錯位......

「ff夠未呀?分房瞓㗎!」我説。

「sor囉。」張家樂道歉。

上到班房,平時早過我返學嘅曉琳到而家都未返,到打咗上堂鐘之後,我先確認曉琳冇返。

「咦?曉琳bb今日冇返學喎。」身後一位狗公説。



「切......人地冇返關你Q事咩!」佢隔離一個女仔説。

佢叫張瑜,花名係章魚,佢係曉琳嘅好朋友。

「關心下佢啫,唔洗咁嘅!」狗公説。

「邊位呀你!洗鬼你關心咩!」張瑜説。

「章魚,曉琳今日做乜唔返學呀?」我問。



「佢發高燒呀!」張瑜説。

「喂喂喂!點解你對我同呢條仆街嘅態度咁唔同嘅?」狗公不滿地説。

「狗公咪撘爹啦!」我和張瑜同時説。

「超!」狗公説完就伏喺張枱度休息。

「所以佢老豆照顧佢?」我問。

「佢老豆要返工,夜晚先返,得曉琳喺屋企。」張瑜説。

我就好似聽到一啲驚天大秘密,講唔到野。

「咳!你去過曉琳屋企㗎可?可唔可以俾曉琳住址我呀?」我細細聲對張瑜説。



「你都on99,做乜要俾你呀?」張瑜説。

講真果句,其實張瑜都係一個靚女,如果唔係佢成日粗口横飛,我相信會有好多人追佢。

「我想去佢屋企照顧佢啫。」我繼續細細聲説。

「你知唔知道,你係自曉琳轉學以嚟第四百一十七個問我曉琳地址嘅人。」張瑜説。

仆你個街!講真嫁?

「有冇呀......」我説。

「咁都信,枉你係全級第三名,我太高估你啦......」張瑜説出真相。



「......」

佢俾咗張紙我,上面寫住一個地址,説:「好啦唔玩你啦!呢個係佢地址,但係佢俾唔俾你入嚟就係另一回事。」

「你唔係玩我㗎可?」我問。

「今次係真㗎,信不信由你。」張瑜説。

我收好張紙,準備放學之後去曉琳屋企探病。

成日嘅堂,我都冇留意老師講乜。

快啲放學啦!

放學之後,我去咗附近嘅粥鋪買咗碗皮蛋瘦肉粥,然後就行去曉琳屋企。



行到去曉琳屋企門口,映入眼簾嘅係一間同我屋企差唔多大細嘅獨立屋。

死章魚唔係呃我掛?

我打俾曉琳。

「嘟嘟......嘟嘟......」

「咳咳......喂?」曉琳沙啞的聲音響起。

「曉琳,我可唔可以嚟你屋企?」我問。

「你都傻嘅.....」曉琳氣絲若浮地説。



「點解咁講?」我問。

「邊有女仔會隨便俾男仔去佢屋企㗎。」曉琳説。

「所以唔得?」我問。

「係呀。」曉琳説。

「老實講,我而家就喺你屋企門口。」我説。

「咩話?」曉琳説。

跟住間屋傳嚟跌跌撞撞嘅聲音。

「喀嚓」一聲,門開了。

「你......你點知我住呢到?」曉琳沙啞地説。

「章魚同我講嘅。」我説。

「死章魚......唉,既然你都嚟咗,就入嚟坐下啦!」曉琳説。

「買咗粥俾你呀,趁熱食啦!」我説。

曉琳即刻將我手上裝住皮蛋瘦肉粥嘅膠袋搶走。

「算你啦,有買粥上嚟。」曉琳説。

「病嘅人唔係冇食欲㗎咩......」我問。

「「冇食欲」呢三個字唔存在於我嘅字典入面!」曉琳淘氣地説。

曉琳用咗大約三分鐘就將碗皮蛋瘦肉粥食哂。

「你冇食午餐咩?」我問。

「有呀。」曉琳説。

「有嘅話點解你仲食得哂?」我問。

「我鐘意食野囉。」曉琳答。

點解佢食咁多野都唔會肥......

「食完就返房休息啦!」我説。

「係......你快啲走啦,我呀爸返到屋企見到你實打死你。」曉琳説。

「......」

我再喺曉琳屋企坐多兩分鐘,就返咗屋企。

「叮」手機響了。

我攞起部手機,原來係曉琳whatsapp我。

曉琳:多謝你碗粥呀XD

我:快啲休息啦!快啲病好快啲返學呀!

曉琳:知啦知啦!

我:希望聽日可以見到你返嚟啦!

曉琳:講到我好似就嚟死......

我:XD

曉琳:唔理你啦衰人!

跟住曉琳就下咗綫。

「浩雪!食得飯啦!落嚟食啦!」門外傳嚟雪彤嘅聲音。

「係~」我説。