女神話我考試排名高過佢 就滿足我一個願望: 第二十三章-----交涉

「林浩雪，放學落一落嚟小食部，我有啲野想同你講。」岳希晨説。

有啲乜樣想同我講呀，咪又係關於雪彤......

唉直接返屋企算。

一打放學鐘，岳希晨就走咗，佢唔係落咗去小食部等我掛。

我落咗小食部睇，但係見唔到岳希晨。



要同我講野又早走......

快啲返屋企打機算。

返到屋企，我竟然見到岳希晨坐喺張櫈到飲紅茶，而雪彤就企喺佢後面。

「返嚟啦？」雪彤説。

「點解岳希晨喺到？」我問。



「冇，佢話有啲野想同你講，我咪叫佢嚟屋企等囉。」雪彤説。

「雪彤，你返房休息下先啦。」岳希晨説。

「喔！」雪彤蹦蹦跳跳咁行返上房。

「你有啲乜野想同我講？」我問。

岳希晨飲咗啖紅茶，然後好簡單咁講咗兩隻字：「曉琳。」



「你想講啲咩。」我冷淡地説。

「你地兩個本身係天作之合，可惜.......」岳希晨仲未講完，就被我打斷咗。

「我同佢已經分咗手。」

「我知。」岳希晨説。

「但係如果我同你講，同你分手嘅唔係曉琳呢？」岳希晨繼續説。

「你......咩意思？」我問。

「字面上嘅意思。」岳希晨説。

唔係曉琳？



「你記唔記得，曉琳變得奇怪係幾時開始。」岳希晨問。

「我同佢表白之後果日。」我答。

「事實上，當時曉琳返到屋企之後，佢呀爸用咗某啲途徑得知你同曉琳拍咗拖。於是曉琳呀爸就鎖咗曉琳喺房。而同你分手嗰個，叫做陳曉晴，係曉琳個妹。」岳希晨説。

「所以話......曉琳真係俾人掉包？」我問。

「喺某種程度嚟講，曉琳係俾人非法禁錮。」岳希晨説。

「唔會犯法咩？」我問。

「佢呀爸可以話曉琳有病需要靜養。」岳希晨説。



「咁我仲點救佢出嚟呀？」我失望地問。

「我地可以試下同佢交涉嘅。」岳希晨説。

「我之前探病嗰陣去過佢屋企，我可以帶你去。」我説。

「我冇必要要去，呢樣係你嘅事，由你自己去解決。」岳希晨説。

嘖，真係無情。

「你唔可以咁樣話我，如果唔係我同你講，你連曉琳俾人非法禁錮都唔知。」岳希晨説。

ok you win.

但係我可以點同佢交涉......



「直接同佢講囉，如果唔係點呀？」岳希晨説。

邊有咁易呀......

「唔試又點知呢。」岳希晨説。

我恨讀心術。

「我都唔識讀心術。」岳希晨説。

咁都叫唔識？

「真係唔識。」岳希晨説。



「屌。」我説。

「快啲去啦，曉琳都俾人禁錮咗三個月啦。」岳希晨説。

屌你咁遲先講......

「我啱啱先查到。」岳希晨説。

一定係咁啦。

岳希晨點一點頭。

我直接走人，飛的去曉琳屋企。

「叮咚叮咚叮咚......」我瘋狂咁按門鈴。

一個着住女僕裝嘅人開咗門。

「你想揾邊個呀？」佢問。

「唔該我想揾陳曉琳。」我説。

佢目無表情咁關門，好快佢就開返門。

「老爺叫你入嚟。」佢説。

入到客廳，見唔到曉晴，亦都見唔到曉琳，除咗工人之外，就淨係見到一個着住西裝嘅男人坐喺梳化。

「你就係林浩雪/曉琳呀爸？」我同佢同時説。

「我係，我叫陳桂方，你可以叫我做方爺。」方爺自我介紹。

「切。廢話少講，叫曉琳出嚟。」我説。

「冇問題，曉琳！」方爺笑説。

曉琳喺樓梯上面行咗落嚟，面帶不屑。

就因為佢呢個樣，我肯定佢係曉晴。

「林浩雪，我同你已經分咗手，你做乜仲嚟揾我？」曉晴説。

「方爺，我要揾嘅係曉琳呀！」我説。

方爺同曉晴面色一變。

方爺最先反應過嚟，笑笑口咁講：「你咪講笑啦，呢個唔係曉琳會喺邊個呀？」

「唔洗再講大話，岳希晨講哂所有野俾我知。」我説。

「即係你知道哂所有野啦。」方爺説。

我沉默。

「既然你知道哂所有野......開個價，離開我個女。」方爺説。

「你當你個女係乜野，貨品？定係雞呀？」我怒道。

方爺不屑地笑咗一下，然後説：「個女係我生嘅，我想佢點就點。仲有你當你係邊個呀？想同我個女拍拖？下世先啦！一百萬，離開我個女。」

「我要同你個女拍拖又關你咩事呀？你又奈得我地咩河呀？」我説。

「你唔肯離開我個女，我咪一直鎖佢喺間房到直到中學畢業囉！」方爺説。

「你！」

「想溝我個女？除非你俾三百萬我啦！睇你個撚樣都知你冇錢啦！」方爺説。

「真係三百萬就得？」我問。

「係呀，如果你有錢。」方爺笑説。

「十六歲。」我説。

「咩話？」方爺問。

「十六歲果陣我會俾三百萬你。」我冷冷地説。

方爺呆咗一呆，然後不受控咁大笑。

「你會俾三百萬我？你當我傻㗎？我一早叫私家偵探起咗你底啦！」方爺説。

「唔好逼到我咁盡。」我説。

「挑！講到自己好撚勁咁。」方爺説。

我認真俾佢激嬲，攞起電話打咗俾一個我一生人之中唔多個五次通話嘅人。
-------------------
太多功課啦，根本就寫唔到文
嗯......我遲啲應該會開個fb帳嚟回應fb留言
感覺離一日一更嘅夢想又遠咗一步。