女神話我考試排名高過佢 就滿足我一個願望: 外傳《雪彤嘅婚禮》

今年係曉琳走咗之後嘅第四年。

而今日，係雪彤同方野吉嘅大日子。

雖然我一早就知佢地拍緊拖，但係佢地係喺考完DSE之後先同我講拍拖呢件事。

嗰陣時佢係突然走上我屋企同我講，我嘅反應就係：

「死仔包宜家先同我講會唔會遲咗少少？」我笑罵。



「俾個驚喜你嘛~」雪彤說。

「我一早就知啦，你地做得咁明顯。」我說。

「好明顯咩？唔係幾覺呀。」方野吉說。

然後隔咗兩年，佢又走上我屋企宣佈結婚，我嘅反應係：

「你兩個終於結婚啦？」我說。



「係呀，記住封人情封大包啲呀。」雪彤說。

「咁你呢？你幾時有對象呀？」方野吉說。

「對象？一早就有啦，佢唔喺香港啫。」我說。

「隔咗四年你都係未放低佢。」雪彤歎說。

「邊有咁易放得低呀……我諗住等你地兩個結婚之後，就走遍世界各地去試下揾曉琳。」我說。



「咁……祝你好運啦。」方野吉說。

返到嚟宜家，我拖住雪彤隻手，帶佢行到方野吉面前。

今日嘅雪彤，打扮得好靚，本身就已經係女神嘅佢著住婚紗更顯出佢嘅美。

「要好好照顧雪彤呀，如果唔係我閹咗你㗎。」我說。

如果係以前嘅方野吉 ，應該會露出一副驚慌嘅樣，然後話：「我好驚呀！」

但係今日嘅佢，只係以一個堅定嘅眼神望住我，然後話：「我會㗎啦。」

睇嚟你……真係可以照顧我個妹啦……

「請新郎讀出誓詞。」証婚人說。



「我方野吉，娶你，林雪彤，為我嘅妻子，無論富貴定貧窮，健康或疾病，我都會對你不離不棄，直到永遠。」方野吉說。

「請新娘讀出誓詞。」証婚人說。

「我林雪彤，嫁你，方野吉，為我嘅丈夫，無論富貴定貧窮，健康或疾病，我都會對你不離不棄，直到永遠。」雪彤說。

全場一齊拍手。

我拭乾流出嘅眼淚，然後轉身離場。

係時候……出發去揾我嘅摯愛啦……