女神話我考試排名高過佢 就滿足我一個願望: 遲來的完故一週年外傳《突如其來的轉變》

我叫林浩雪，今年五歲，有一個可愛嘅妹妹，亦都有個好幸福嘅家庭，爸爸媽媽都好錫我，我愛死佢地！

我屋企好大㗎，可以裝到好多好多管家同工人姐姐！

下年就會升小學啦，唔知仲會唔會有朋友同我讀同一間學校呢？

好耶！今日嘅茶點係紅豆糕！

喺我食到津津有味嘅時候，屋企部電話響咗。



「穎穎姐姐！電話響咗呀！」穎穎姐姐係最錫我嘅工人姐姐，人又靚又好心地。

穎穎姐姐笑住咁聽電話，但唔夠幾秒塊面就唔同咗樣。

「浩雪，即刻換衫跟我嚟。」穎穎姐姐嚴肅地說，嚇到我極速換好衫。

司機好快就將我地送到嚟一間白色嘅建築物。

「穎穎姐姐，呢棟白雪雪嘅嘢係咩嚟㗎？」我天真地問。



穎穎姐姐小有咁唔答我問題，只係拉住我行。

我地上咗7樓，喺入其中一間房嗰陣，我見到門前貼咗「林明雪」嘅牌。

係爸爸個名？

仿佛預知到嚟緊會發生咩事，我心情開始繃緊。

無端端點解會咁緊張啊……



房入面有一張床，我睇唔到邊個瞓喺上面，因為有好多人圍住咗。

咦嗰啲人好似全部都係我親戚嚟喎。

「晴姨姨，恆伯伯……你地喺到做咩啊？」我輕拍佢地膀頭問。

佢地同穎穎姐姐一樣不發一言，只係將我帶到病床前。

爸……爸爸？

點解爸爸會瞓咗喺床到㗎？仲要包住咁多繃帶嘅？佢呢個時候應該喺公司先啱喎。

「爸爸？」我輕輕力搖爸爸，但係佢完全冇反應。

我聽到身後有一兩個親戚見到呢個畫面之後，開始喺到啜泣。



「爸爸？醒啦！唔好瞓啦！」我都唔知點解開始流出眼淚。

奇怪，好奇怪啊！點解今日個個都咁怪㗎！

「你爸爸撞咗車……宜家重傷」晴姨姨黯然道。

「冇可能㗎，無端端點會撞車㗎！」我不敢置信地大喊。

「會好返㗎，你爸爸唔會咁易死㗎。」恆伯伯說。

呢個時候，隔離有部一直喺到發出「嘟……嘟……」聲嘅機突然變成「嘟……」嘅長響。

恆伯伯嘅面「刷」一聲變白。



我望向穎穎姐姐，佢行咗去角落講電話。

「恆伯伯，你仲咩咁嘅樣呀？爸爸一定會好返！」一無所知嘅我仍然望住爸爸。

「呃……」恆伯伯有口難言。

不消十秒，著住白袍嘅醫生就入咗嚟，仲叫咗我地走，幾分鐘之後搖住頭咁出嚟。

「好對唔住……」醫生講完就走咗。

咩對唔住啊？發生咗咩事？

我愕然地望住其他人。




「你爸爸……去咗一個好遠嘅地方」晴姨姨試圖揾一個藉口去掩飾。

「我係細路仔，但我唔係蠢㗎！」已經知道咩事嘅我已經喊到收唔到聲。

妹妹都喺呢個時間嚟到，佢一見到我就喊住咁攬住我。

媽媽聽到穎穎姐姐打俾佢嘅電話之後亦到過咗嚟。

我第一眼見到佢，我希望佢會同我地一樣，喊到收唔到聲……

但係……佢冇喊。

佢露出咗一個詭異嘅笑容。

就算係我死咗之後，我都覺得嗰個係我見過最令人心寒嘅笑容。



就由嗰一刻開始，我就認定我地之間再無母子之情。

最後喊咗成半個鐘，喊到已經流唔到眼淚嘅時候，一個著住整齊西裝嘅男人攞住份文件袋行嚟我地面前。

「節哀順變，我係林明雪嘅好朋友，亦都係佢委託我寫咗份遺囑。」男人難過地說。

「在我林明雪死後，一切遺產，包括不動產，都將交由長子林浩雪所有，其唯一條件，長子林浩雪與二女林雪彤必須隱藏其林氏家族的身份，不得向他人透露半點財富，直至長子林浩雪升上中學四年班。

公司將交由妻子黃瑩接管，直至長子林浩雪大學畢業。

若長子林浩雪與二女林雪彤違反以上內容，所以資產將捐贈於慈善機構。」男人一字一句地說出遺囑的內容。

媽媽，應該說黃瑩，露出猙獰的表情，就像到手的財富最後化為烏有。

我對遺囑的內容毫不在意，妹妹亦早已因為累透而在我懷裡睡著。


嗰日之後，我生活就有咗一百八十度嘅轉變。

工人同管家全部都走哂，得返穎穎姐姐義務咁照顧我地。但佢都喺我地升上中學嗰陣病死咗。

我地過上咗自力更生嘅日子，黃瑩自己搬咗出去住，好少會見到佢。

因為窮而俾人排擠，因為樣嘅問題而俾人鄙視，呢啲嘢我經歷得太多，反而對佢地有同情心。

我諗爸爸佢定呢份遺囑都係想我明白呢樣嘢。

除咗明白到人性嘅醜惡，亦都體驗咗被排擠嘅感受，一切都係磨煉。

因為爸爸，我先可以有今日嘅成就。

–––––––––––––––––
好吧應該係八月一號更嘅，但係我返到屋企嗰陣宜家八月二號，各位讀者原諒我吧。
作為賠償，我今日更埋補習社嘅第七章

週年外傳應該都會每年一個，直至重修呢本，總之大家記住八月一號係呢故嘅週年紀念日啦！