失戀200天後,我遇上的女孩們: 第五話

「喂!聽講counter來左條新女喎!」阿明興奮地講。
「新女?好索嫁?36,24,36?」另一個同事Alan好奇問。
「差唔多喇,聽人講有啲似除子珊,C cup,42吋長腿...」
「有無咁誇呀?真係得閒去counter巡下先!」
在陽盛陰衰既辦公室內,能令同事們熱烈討論既,除左波之外,就係波。此波不同彼波,講足球有時因為兩支既恩怨而意見不合,但講到女時,基本上大家既目標都會一致,況且足球係地球另一邊既事,而新女同事就係自己身邊既事(當然大前題係個女同事要靚啦!)。
「喂,唔好講住,有啲搞笑野聽!」另一個同事阿豪係電腦開左個收音機網,「聽講admin阿Coco打左上去電台喎。」
今日電台有個環節叫「你知道唔知道」,係俾聽眾打電話上去向人表白,道歉,祝生日等。
「喂,請問你叫咩名呀?」主持人問。
「Coco...」近乎走音又有少少嗲既聲音,我肯肯定係我地既Coco...
「你打上來係...」


「同同事人講生日快樂...」
「佢今日生日?點解咁特別要同佢講既?佢係你...」
「普通同事啫,不過佢對我幾好,又有時買野俾我食。」
「哦...咁佢買野俾你食嘞,咁佢可能對你...或者你有無對佢有意思呢?」
「吓?佢對個個都咁個喎,暫時都係當佢同事啫...」
「咦?Coco唔係有仔嘞咩?」我好奇問。
「散左啦!條友都唔係度做咯。」Alan唔耐煩咁答我,好似怪我咩都唔知阻住佢咁。
「咁你今晚會唔會同佢慶祝呀?特登打上電台講生日快樂嘞,應該都計劃好晒,跟住俾個驚喜佢,同佢啊...」主持人想搞下氣氛。
「梗係唔係啦,普通同事咋...」聽佢語氣,話佢地無野真係無人信...
「係你唔認咋?好嘞,咁你想同佢講生日快樂既同事叫做?」


「Kenny!」
「好!我地去首歌,陣間打俾Kenny啊!」
電台播歌既同時,我地亦討論緊Coco。
「Kenny?係唔係貨倉果個Kenny呀?」Alan最先提出疑問。
「應該係...」我唔太肯定咁答。
假如係果個Kenny我有啲印象,佢係個超過200磅既大肥佬,根據佢頭髮既稀疏程度,估計佢有四十歲,點解啲妹妹仔咁鍾意啲又肥又甩頭髮既大叔嫁?聯想到佢龐大既身軀壓落細粒既Coco度,分分鐘變肉醬...
「好嘞,而家要打俾Kenny嘞,唔知佢估唔估到有個把聲好甜既女仔祝佢生日快樂嘞?」好甜?假如個主持聽過Coco真人把聲應該唔會咁講...
「喂!」電腦傳來一把粗豪既男人聲。
「喂!Kenny?我地係電台打俾你,唔係玩電話,亦唔係有重要文件要你攞,哈哈...係有個女仔想祝你生日快樂既,不過問你一個問題,你而家有無拖拍?」
「吓...無呀,唏...邊有咁易拍到拖丫!」明顯聽到Kenny背後有人叫囂...


「點解唔搵下呢?嘩,你身邊都好嘈下喎,你做緊野呀?」
「X!啲同事來啫...」
「嗱!Kenny,雖然聽你把聲應該係啲豪邁人,但都要注意下啲助語詞啊!點解唔留意下啲同事呢?話唔定有個對你有意呢!」
「吓?全部都名花有主喎,應該無嘞!」
「唉...唔同你呦喇,等事主同你講。」
「喂!Kenny...」Coco有啲怕醜咁:「其實你都幾好既,咁...生日快樂!」
「聽唔到!喂?」Coco果邊已經收左線,而電台播Coco點既陳奕方迅隻「重口味」。
「每次殺不死你殺不死你也醫好你~
情願從山埃找到了色香味~
吸收~心痛~接受~別離~
磨練出胸肌~腹肌~心肌~
要治本必須重口味~」
邊個祝人生日會點咁既歌俾人嫁?所以我諗Coco係想玩Kenny吧!
聽完節目後,又到食飯既時候,我就入茶水間攞飯出來叮(窮L帶飯是常識吧!)。突然,阿明無啦啦一個箭步爬我頭走入茶水間,我覺得奇怪因為佢係出街既應該無脅飯嫁,入到去我知點解嘞,因為新女同事係裡面,而當時水機既水樽係無水既!係辦公室,換水可以話係表現男子氣慨既方法之一,阿明當然唔放過依個黃金機會喇!係度描述下我地三個既身高先,我有177cm,新同事矮我半個頭左右,估計165左右,而阿明只係到我膊頭,加上瘦削既身形,所以見佢換水都有啲吃力。
「唔該晒!你好,我新來嫁,叫Mandy,係counter果邊既...」


「啊!你好啊!我叫阿明,依個阿Jack,我地IT嫁,第時部機壞左可以叫我...地整...」阿明搶先回應。
「好啊!我出去先...」
Mandy出去後,我係雪櫃攞飯出來,卻發現微波爐用緊。
「咦?原來佢帶飯嫁,真係健康,抵佢咁fit咁索既!唔似啲孤寒種為左慳錢而帶飯,第時都考慮帶飯先!」
我只係苦笑,諗返Mandy,無可否認佢係靚,樣子係似除子珊,加上微曲既長髮,更加添女人味。但俾我感覺佢係女神型(即係裙下大把兵果隻),總覺得佢係只會收兵而唔會真心談戀愛果類人。不過,話時話,好似係邊度見過佢咁,但又醒唔起係邊度...