失戀200天後,我遇上的女孩們: 第六話
「喂,Jack,你好似好耐無返來喎?」
「唔係啊!上個禮拜先來過...」
「唔好講咁多喇,做熱身做體能啊!你十二月打館內賽嘛?」
「打!等我拉埋筋先。」
依度係我打開泰拳既拳館,而同我傾計既係依度既教練阿皓,佢同我同年,但佢已經有間拳館同個女,而我?唔好提。而佢頭先講既館內賽就係兩間分館既會員自願參加,跟住近磅數既就對打,通常都係兩間既對打,有時會邀請第二間拳館俾啲資歷深既打,當係交流賽。而我係度玩左四年,打過三場館內賽。
當我做緊熱身既時候,我見到個好面善既面孔,係Mandy。然而,佢吸引我眼球既唔止個樣,佢而家身穿貼身運動背心,下身一條黑色legging再加條粉紅色泰拳褲,依一身打扮將佢突出既上圍同修長既美腳完全表露無違,唔止男人,甚至女人都會側目...
「望女仔?」依個係拳館女教練,阿Mei。唔好睇佢長頭髮,眼大大,個樣又唔差咁,佢打比賽時真係成個男人咁,所以阿皓成日叫佢做人妖,話佢男性荷爾蒙過多!
「黑色背心個女仔新來嫁?」
「Mandy?唔係,佢以前太子館既,不過佢最近轉左工先過來依度...咩呀!上次館內賽咪打過一次囉!」
「邊有印象啫!」唔怪得咁面善喇!不過我上次掛住熱身都無留意有咩人。
泰拳班有分初階班同拳手班,拳手班故名思意係俾拳手同資歷深既學員上,同分別既初階班係技術同體能訓練比較高,所以我初時上都有啲頂唔順。我見Mandy嬌滴滴咁,都應該頂唔順嫁嘞...
「望女仔望到眼都唔眨!」阿強走過來同我吹水。佢同我都係拳手班既常客,佢二十歲出頭,瘦削既身形,四眼加上滿面暗瘡,又係一個毒男...
「有靚女就望嫁喇!唔係生對眼出來做咩?」我特登細聲啲,驚Mandy聽到,但佢無啦啦行過來,對眼望實我。
「咦?你係唔係叫阿Jack呀?」
「係啊!禁啱呀?你來打泰拳呀?(廢話)」
「係啊!你玩左幾耐?」
「四年左右,你呢?」
「三四年啦,禁你有無打館內賽?」
「打過三場喇!你呢?」
「一場...」
跟住阿皓大嗌:「操拳喇!」於是就結束左我地既一問一答環節。
我偷看Mandy,發現佢唔係我想像中咁,無論打沙包定體能訓練佢都頂得順,唔似一般女學員咁做左少少就話辛苦又話出晒汗,最重要佢既動作好正宗,一啲都唔馬虎。
體能訓練之後就係對打,即係兩個人戴十六安士拳套同護脛係擂台對打,通常我地都係猜下唔握實拳頭以免整傷大家。
「Jack,你同Mandy打!猜下好啦,就住啊!」我打左兩三回合後,阿皓叫我地打。
係拳館男女對打唔出奇,我亦無異議,最多讓下佢。當然要我打佢塊面真係唔忍心,所以我選擇打身體,而當我正面唔小心(或者有意)打到佢個胸時,一陣柔軟既感覺由拳套傳到我手中,果刻有啲衝動想除拳套揸佢個波,然而咸濕係有代價嫁...
之後我起左腳掃,由於要讓佢,連帶速都要減慢,佢就襯機踢我右腳,正常來講應該係踢中我大脾內側,但佢腳踢既方向係由下至上打斜踢中我兩腿之間...
「Sorry啊!」
「唔緊要...打中要害經常有...我地再來...」
其實就唔太應既,我跳幾跳無事就同佢再打。今次我迫到佢去繩角附近差唔多無路走,於是佢起腳撐,雖然我已經成個人縮後,然而角度問題,正正踩中香腸...
「Sorry啊!我無心嫁!」
今次真係痛到出唔到聲,我感覺到佢隻腳踩中條腸再直搗兩粒蛋蛋,就係咁我既戰鬥力又再減半。為左面子,我忍痛再來,而慘劇又再發生。今次中既係啷啷與菊花之間既位置,男讀者應該知道果個位置比細佬更脆弱,試幻想佢隻腳好似鋤頭咁,而腳尖正正端中果個位...
「Sorry啊!我想踢內側嫁,點知...」
我眼淚標埋出來,淨底既戰鬥力都無埋,而側邊啲人...
「起身呀,阿Jack!怯,你就輸一世嫁!」
「你幾十歲人無野輸喇,起身啦!」
「加油啊!少少苦楚等於激勵啊!」
「扮野呀你!起身喇!」
我以前講既佢地完全還返俾我,如果唔係Mandy係度,我真係爆粗!
「阿強,到你喇!我戰鬥力全失啊!」
我坐埋一邊睇住佢地打,奇怪既係佢一個都無中過要害,點解?我望返自己,其實我都唔係好大啫,都唔明佢係要瞄住果度踢...
上完堂,沖完涼,我行出去櫃台打算著鞋走,咁啱Mandy同阿Mei係度傾計。而Mandy都係沖完涼,頭髮微濕,帶點洗頭水既香味。
「點呀你?斷左未呀?」阿Mei望住我好霸氣咁問。
「未...你有傳人嘞,係唔係好開心哩?」講到拆祠堂,阿Mei認第二無人認第一。
「講呢啲!係喎,係又住大埔嫁嘛,佢又係,大家一齊喇!」
「咦?你又係大埔友呀?」我望住Mandy問。
「係呀!你走未呀?不如一齊丫。」
於是我就同Mandy一齊搭車返大埔。係車度,我地都係傾下自己野,原來佢開頭打拳都係為左減肥,佢仲俾我睇佢中學時既相,張相佢係攬住麥兜影,但佢當時既身形加上粗框眼鏡,睇錯仲以為兩隻麥兜一齊影。佢話擺係電話度係用來警惕自己唔好再變返以前咁。到落車時,原來我地住係附近,於是佢就話第時約出來跑步練氣,我當然應承啦,跟住就各自返屋企。
「喂,我收到風,原來Mandy打泰拳嫁,唔怪得佢咁fit嘞!諗起佢著緊身衫,泰拳褲...嘩~真係...」阿明一朝早好似開心大發現咁拉住我係咁講Mandy啲野,但大部分我都知道,費時掃佢興我無出聲。
「唔得!我都要學下泰拳,咁我就可以同女神拉近啲喇!」
「唓!上次我叫你學,你又話辛苦又話唔啱你!」
「點同喱!上次無目標嘛,今次有女神嘛!嗱!假如我...」下刪二百字廢話,主要都係佢既幻想同妄想,當中夾雜四仔劇情...
見到阿明咁樣,假如我同佢講我尋晚摸到Mandy個胸,我諗佢手都斬鬼斷我...