失戀200天後,我遇上的女孩們: 第十九話

「私房菜?」Mandy帶我去到一座工業大廈度。
「依度夜晚就做私房菜,日頭就教人整野食既。仲有聽講依度教人果個係睇唔到野嫁...」
「哦!係唔係前排youtube好hit果個盲女廚師呀?好靚女喎...哎...」佢好大力咁搣我塊面...
「邊個靚女呀?」
「唔夠你靚...」佢終於放手,我塊面當堂紅左一撻。女人既妒忌真係可怕...
雖然今日係星期六,但Tracy卻同我講有事做,於是今日就陪Mandy上烹飪班。
唔知點解,總係覺得Tracy依排收埋好多心事,而且直覺話我知與我有關...
「好,人齊未?人齊就開始上堂嘞!今日就教你地整美式蘋果批,唔係麥記果隻,係美色,係咁多位靚女整既美色蘋果批!」個男助手懶係搞笑咁講左今日整咩同介紹材料跟住就開始幫廚師準備。真心講,佢地幾合襯,見到呢對組合,我諗返起Eric講過佢有個朋友挑戰高難度媾盲女,仲要成功左,脫離左老蘭狩獵生涯...
「喂!」Mandy無啦啦嗌我,「你既!」
佢俾左條粉藍色,上面有隻熊大公仔既圍裙我,而佢自己果條就係粉紅色有兔仔既,加上佢著緊條米白色連身裙,簡直一絕(好明顯佢襯過先出街)。


「望咩呀?英偉哥,整野喇!」佢知道我中文名之後就成日都咁叫我...
成個烹飪班大約有十零人左右,大部份都係情侶...
「啲餡好似唔夠味,蘋果夠唔夠?」係我前面就有一對巨無霸組合,無錯,佢地既身形可以想像到就算佢地加埋食四個巨無霸餐加大都未飽...
「你手腳快啲啦,無食飯呀?你睇人地個批底整得幾靚!」我偷望一下後面,發現個女既全程聲控個男既,而個男既無出聲默默扮演機械人。對於佢,我表示同情,只有四個字可以形容佢--可憐的兵。
「落得太多麵粉喇,搓唔到啊!」
「落左牛油未呀?啲蘋果點?」
「唔夠味呀!俾啲糖我...真係一啲啊...」
三個女人一個墟,未上堂就已經雞啄唔斷咁講,基本上,只要係佢地身邊坐一陣,就已經可以知道佢地啲野,例如邊個參加speed dating呀,邊個媾仔等...
「喂!你試下...」Mandy遞左羹餡俾我試,「點呀?」
「你落錯鹽呀?」


「吓?」Mandy即刻慌張地試味,「唔係啊...玩野呀?」
「俾啲自信自己,唔好咁易俾人動搖先得嫁!」
「下次俾咩你食...」佢個樣嬲嬲地又幾好可愛。
我負責搓批皮,佢負責煮蘋果餡,我地十足兩公婆咁一邊整一邊打情罵俏(閃死側邊啲人,尤其係後面個三個女人),當個批擺係焗爐時,我地就慢慢等待我地既結晶品出世。此時,手機傳來震動,係Belle whatsapp我...
「阿杰今日搵返我,問我可唔可以同返佢一齊?你覺得點?」我覺得點?
「都唔關我事,又唔係我同佢一齊...」
「嗯...」
「咁咪好囉,記住以後要珍惜對你有心既人呀!」
「我知嫁嘞,你都係啊!」之後佢就無上線...
我每打一個字,個心就刺痛一下。仲以為感覺返來一切就會重新返來,但原來我忽略左最重要一樣野--佢根本無愛過我。


「喂!睇咩呀?」Mandy既聲音將我拉回現實...
「無啊,有個fd...女仔來既,有男仔鍾意佢,問我意見...」唔知係唔係上兩個禮拜個惡夢影響,我唔想講大話呃佢,只不過無將事實既全部講出來...
「哦...焗好喇,食野喇!」
我係焗爐度攞出金黃色既蘋果批,真係焗得幾靚...
「嘩...好香呀!」見到個蘋果批,Mandy即刻成個細路女咁,已經急不及待切左一舊準備擺入口...
「好熱呀...呼...」由我個角度睇,佢個豬嘴真係令我有啲衝動嘴落去...
「唔...好似甜左啲啫,係唔係?」佢食左一啖,跟住俾我試下...
「好似係...」依一刻我食野好似無味咁...
我地食剩既Mandy俾左我攞返屋企俾屋企人食,我問佢使唔使留啲俾佢同佢屋企人,佢話唔使,不過講開又講,真係好少聽佢講有關佢屋企既野,淨係知佢有個阿媽同過左身既婆婆。
我送左Mandy返屋企後,突然電話響...
係一個未見過既電話號碼...