「你聽日得唔得閒?我放假想約你出來食飯...」
幾日後,我收到Belle電話約我收工食飯,於是我應約。不經不覺,我地已經差唔多成年無見面,甚至無再聯絡大家,雖然大家明白依段關係經已結束,但...係我心裡...總覺得仍未放得低...
係地鐵,望住個路線圖,睇住啲燈一個個站經過,不禁諗返起同佢一齊去過既地方同做過既經歷。仲記得我地有一排成日去九龍灣睇戲,係Mega Box宜家,我地曾幻想過將來個屋企點布置要幾多個衣櫃,鞋櫃要點放等;鰂魚涌,係我地關係開始既地方,當日佢就係果度同我表白(係...係佢向我表白)...回憶一點一滴氾上心頭,心有如千噸重。
「你到左未?」Belle whatsapp我。
「就到...」我有預感佢會遲...
「我仲有野搞,晏少少到...」
同佢一齊三年,無論佢約我定我約佢,我就例早,佢就例遲,我地周不時都因為咁嗌交,或者我地都達唔到對方既期望先有咁多磨擦...
「等左好耐呀?」結果佢遲左半個鐘頭到,「嗱!送俾你!」
「咩來嫁?」我打開個盒,係一隻鋼錶,「你遲就因為買錶呀?」
「揀左好耐,唔平嫁,試下啱唔啱?」


我戴上手,緊左少少,「幾好,啱喇...我都無買野俾你添...」
「唔使喇,去食飯喇!」
今日佢著左件黑白橫間T-shirt加條黑色短裙加黑色絲襪,由於唔係好凍,佢淨係著左件薄既毛毛褸。我最留意係佢既微曲長髮,拍拖果時,佢係短髮既,我有時同佢講佢長頭髮靚啲,但成日話熱同煩唔肯留,結果係第二個叫佢留佢先留...
佢帶左我去打冷鋪食野,原來佢而家兼職做啤酒妹,有時會去大排檔酒樓酒吧賣酒,所以先識去依度食野,比著以前佢一定嫌污糟唔肯去。
我地兩個人嗌左三個餸加白飯,「食野喇!」,我將件雞夾左俾佢,佢低頭食,成餐飯我地都無講野。
埋單之後,我地行去地鐵站。同佢並肩而行,為免尷尬我特登雙手插落褸袋。然而,唔知點解今晚好多人,佢驚走失撓住我隻手,果一刻我卻將佢手放落褸袋並拖實佢,那種感覺回來了,下一刻,佢雙眼缺堤...
「我無事...嗦...我真係無...嗄...」無事?你真係無事?
「我地去公園坐陣抖下先啦...」
「自從同你無聯絡後,同阿權(有老婆個男人)拖左半年,跟住就係酒樓識左而家呢個,果時傾計,我有同佢講過我啲野,跟住佢話可以同佢一齊,所以...」
「咁就離開左個男人?」


「佢話我背叛左佢...」背叛?咁佢對佢老婆唔係背叛咩?
「而且阿杰又對我幾好,雖然佢係有黑社會背景...」
「咁佢又拋低你係佢樓下?」
「其實果日我地嗌左交,跟住係我自己收工走上去,佢都有講佢唔舒服...果日之後,我都有搵過佢但無聽我電話,跟住我同佢就無左聯絡...唉...又係咁,個個男人都係咁...」
依刻我諗唔到咩安慰佢,我知道佢係我之前既男友大部份對佢都係玩玩下既,甚至有啲當佢玩具,認真既又拍唔長...或者因為咁,佢對愛既須求好大,好渴望被愛,渴望到就算自己撞到焦頭爛額,依然勇敢去愛...
我攬實佢,希望俾到佢一啲安慰。然而,當我倆身體靠近,嘴唇漸漸接上,糾纏,激吻,若果唔係佢叫住我,我都唔知會做左咩事出來...
「其實我...」我好想同佢講我有兩個女友,我唔知我愛邊個多啲,我又唔想傷害其中一個,或者...我根本無愛過任何一個人...
最終...我無講出口,或者我唔敢講出口...
「多謝你今晚出來陪我...拜拜...」
同Belle係地鐵分別之後,我帶住混亂既思緒坐車返屋企。


有人話,分左手既情侶就唔應該再見面,因為再見返時就會勾返起以前既回憶,令大家無法放低大家向前行。本來我都唔信,但今晚之後我不得不認同,開頭我以為依段感情已隨著時間已經沖淡,但由夾餸俾佢,拖手,擁抱到錫嘴,原來一直藏係心裡從未變過。
但問題係...而家我既感情世界真係一塌糊塗...
已有 0 人追稿