[真人真事][校園][純愛]緣定·十年前: 第二十八章

過多幾日,
我地就要返學喇
我同呀雪都有個共識,
就係喺學校保持低調,唔公開我地拍拖嘅事
各位巴絲都知喺學校拍拖係好煩,
老師講埋啲求學不應談戀愛嘅廢話,
成班同學又爭住抽水
試過一個男仔(有女朋友)上pe堂睇女,
之後成班同學話嗰個男仔曳喇,
抽佢水話你有女仲去睇女呀咁


點知玩玩下真係傳左去佢女朋友度
佢女朋友發晒爛渣
之後個男仔又跪地又剩咁say sorry
由此可見成班同學抽水個後果係幾咁麻煩
同埋萬一俾班狗公知我同呀雪拍拖就大檸樂喇
我仲唔俾班狗公打死?
所以都係低調啲好

我地喺學校同之前冇分別,
我繼續同呀余佢地食晏晝


而呀雪就同呀婷食,
放左學就照去圖書館溫書
基本上同之前冇分別,
有唔同嘅係我地喺圖書館溫書會喺枱底拖住手,
同埋送佢返屋企嗰陣會有goodbye kiss,
各位巴絲應該都會記得上次係呀雪錫我,
我就硬膠膠企喺度
所以之後嗰次我就醒左

話說有一次我送佢返屋企,


送到門口,
佢企定定喺度,
我就咋唔知咁講:「做乜企定定 」
呀雪:「你好似有啲野未做 」
我:「冇呀仲有咩未做?」
呀雪:「又唔記得 」
跟住我一野咀左落佢塊臉度,
我:「點會唔記得呢 」
呀雪面紅紅講:「衰人又玩人 」
喺陽光底下嘅呀雪更加靚,
而我,就係咁冇左個初吻

同呀雪拍左拖之後,
發覺佢唔係啲典型港女嚟
平時使費AA制不特止,


有時放學真心想請佢食野,
佢都好幫我荷包著想
話下次就佢請,輪住咁話喎,
人又靚,冇得彈(係盲讚架喇,吹呀?)
當然佢都有撒嬌嘅時候,
不過好多時都好易氹,
勁嗡一輪就過關
至於有冇甜野?
就梗係冇啦
一嚟大家當時都未意識呢樣野係乜,
有咩作用,
二嚟我對住佢係冇嗰啲幻想,
唔知各位巴打同唔同意,
你對住最愛嘅人,
係唔會存在性幻想呢樣野


我就係咁喇,
不喜勿小
至於同呀雪拍拖後唯一一樣唔好處,
就係我少左時間打丁
好多時間都用嚟陪佢,
搞到要等到夜一夜,
屋企人瞓晒覺先打得丁,
變左第二朝好多時都好眼瞓

有單野想喺度講一講,
話說有一次我同呀雪行街嗰陣傾傾下計,
無啦啦佢問我:「點解你會鍾意我嘅 」
情侶拍拖必問嘅問題嚟喇
答得唔好隨時死人
如果答:「因為你靚囉.」,


實死梗啦,
萬一佢答:「呀邊個邊個都靚你又唔鍾意?」
又或者答:「遲下我唔靚你咪唔鍾意我?」
呢兩樣我都即時口啞啞
唔答又唔得喎,
所以就將我最內心嘅野講俾佢知,
仲扮埋個認真樣:「鍾意一個人係冇得解,
格硬要解就係因為你係xx雪(佢全名) 」
呀雪笑笑口講:「如果我改左名你咪唔鍾意我 」
我:「唔會,一世都咁鍾意你.」
呀雪:「傻瓜 」
事實上,
我到呢一刻都冇違反我講過嘅野,
呀雪:「咁你有冇諗過將來點呀?」
我:「我地依家先中四咋喎 」


呀雪:「問下姐.」
我:「冇呀,夠食三餐就夠,
冇乜理想 」
呀雪:「認真啦.」
我:「好認真.」
呀雪:「咁啦,
俾個目標你,
不如第時你開間café好冇
咁樣我可以免費去食野飮野 」
我:「邊有錢呀?」
呀雪:「我知你得嘅,信你呀 」
我:「你講到咁我就盡力啦.」
呀雪:「唔好吹水喎.」
我:「唔會呃你 」
呢度對日後有影響所以要喺度講下.