<測謊眼>唔洗呃我啦，我一眼睇得出你係唔係處女: 36
Vision 036 懷疑「我都係同你同一時間知道佢有呢個諗法，我當時都好驚訝，不過我諗Mönkh係希望我將情報帶返黎，同埋自己去做臥底。」Braco的苦笑表達了他對Mönkh的決定的尊重。「你地有搵到有用既情報？」那時候我只是單獨向Master匯報，所以並不清楚全況。「都算有用既，果日Mönkh其實有係牌局途中一路都有寫字比我睇，因為係蒙古文字所以應該得我睇得明。」現在回想起來，Mönkh那天的食指的確不斷在牌背遊走，如果不是Braco提醒我也以為那只是她習慣的小動作，訓練過的特工果然與眾不同。「咁佢同你講左啲咩？」「Mönkh果日成功從黎飲酒既人當中認出名單上既人，之後睇返佢地未來既軌跡，發現有兩個人將會向三日之後出現係上次果個公園。」「姐係佢地即將會死？」我想起那次Philip描繪的恐怖死狀。「如果佢地既實驗失敗就會比人棄屍，不過Mönkh望到既未來並唔係絕對既。」「佢以前都有試過預測錯軌跡？」「唔可以話預測錯，首先Mönkh見到既只係好多個未來入面比較大可能性既一個，其次佢見到既只係人既軌跡，並預測唔到佢地做緊咩野。不過佢話果兩個人停留左係公園好耐，所以應該係不幸死左，但係都唔代表佢見到既就一定會發生。」「你既意思係未來可以改變？」我想起那些討論不完的時間悖論。 Braco微笑看著我，拿出粉筆走到黑板前。「未來緊係可以改變啦，其實每個人都好似個司機咁，可以為自己既人生既掌舵，不過今次我地就用自己架東改變一下路面狀況，睇下果兩個人既未來可唔可以改變到啦。」他先畫下一條長長的橫線，再在中間畫出很多分叉，然後在每個支流的末端寫上不同的百分比。「雖然我唔係唔想幫果兩個人，但我心入面仲有一個疑問未解決，如果唔問清楚我真係會心不在焉。」Braco點頭示意我繼續說下去。「其實點解我地既行動會比人發現？係唔係Viper一早已經有我地人員既名單？如果一早已經知有危險點解Master唔同我地講清楚？」我一口氣連問三個問題。「其實我都想同你討論呢樣野，我地既成員名單一向保密，今次竟然連樣都流出埋，我只係諗到一種可能性。」「就係我地當中出現左間諜。」Braco冷靜地說出積壓在我心底的懷疑。「我都係咁諗，我想問有咩人會知道果日出勤既安排？我覺得佢地連果日我地派邊個去都知實在太過唔尋常。」如果說他們拿到的只是異瞳會成員的名字，我覺得還算有可能，不過現在竟連誰會去洞窟也知道得一清二楚，便代表那間諜已滲透得十分接近組織核心。我猜說不定有更多的機密已被盜走，這說明事情的嚴重性，同時卻收窄了可疑人物的範圍。「知道當日安排既人一係就係有份參與呢次行動既人，姐係果日係大廳會面既果幾位，一係就係有二級或以上權限既人。」