[有沙入眼]是咁的，我覺得我住嗰度有啲唔妥: 19水錶

「好似壞咗。」大大嘅眼球盯住水錶上面嘅字，阿婆用手掌拍咗個水錶幾吓。

「政府用嚟計你錢嘅野唔會壞架喎。」

阿婆個頭以奇怪嘅角度扭向我，大眼珠映照出我嘅五官。

嘴角彎起，露出阿婆嘅銀色門牙。

枯黃嘅指甲一下一下敲落水錶上面，噠，噠，噠。



「你睇下。」阿婆上半邊面就好似個面具咁，所有肌肉組織連震一震嘅動作都無，所以即使佢嘴角有幾彎，成個表情都唔似笑。

我諗住求其望兩眼之後，是但講啲野敷衍下佢就算，點知一望，我對腳就軟咗一野。

水錶入面表示嘅唔係阿拉伯數字，而係中文字。

「血｜血｜血｜血｜血」