[有沙入眼]是咁的，我覺得我住嗰度有啲唔妥: 36登出唔到

我呆咗三秒，四眼肥佬嘆咗口氣：「我都話你唔信架啦。」

「咁你無證無據無啦啦咁講我又真係難啲信你囉。」

「證據⋯⋯譬如話係，你記唔記得你幾時搬入嚟？你嘅家人喺邊度？」

「梗係記得啦！我係⋯⋯咦？」我腦入面好清楚記得有個日子搬入嚟，但確實日期係幾年幾月幾日，噏到嘴唇邊就唔記得咗。唔止，相同嘅情況仲有唔知幾時開始聽到鑿牆聲⋯⋯

「但就算我唔記得，正常都應該懷疑自己失憶先啦，點會一跳跳去個世界唔係現實世界嘅結論呀？」



「咁你有無一啲令你心寒，覺得恐怖嘅模糊記憶丫？」肥佬講到依度，我就記起自己周不時會突然有啲驚嘅感覺。驚打電話、驚衣櫃等等，但段記憶好似鋪咗一層紗，睇得唔清唔楚，只係得恐懼嘅感覺最強烈。

我無可否認咁點點頭，開始有啲相信四眼肥佬。

「依度係虛擬實境世界，我地而家存在喺一個叫『恐怖體驗』嘅VR遊戲入面。個遊戲會記錄我地每一次經歷嘅恐怖片段，將影片儲存喺主機嘅記憶體入面。」

阿鬼你都係講翻中文啦。

「我地應該都已經死過好多次，每次死完就會喺唔同嘅空間復活，再次體驗新嘅死亡。」



「你話依個係遊戲？咁點登出？」我話之隻game玩乜丫，我最關心嘅係點走人。如果真係好似肥佬所講，依個係記錄恐怖片段嘅遊戲，咁個主機實會諗方法整死我地。

「我諗我地登出唔到。」

你噏乜spring話？