[有沙入眼]是咁的，我覺得我住嗰度有啲唔妥: 35虛擬實境

原因不明嘅沈默令我坐立不安，但過咗大約分幾鐘嘅時間，當我忍唔住用手掌喺肥佬眼前掃兩掃嗰陣，我竟然見到眼淚喺佢面上滑落。

「做乜鬼？」我完全唔明白發生咩事，因咩事聽完我個名就流眼淚。

下一秒，肥佬重新有翻意識，佢抹一抹自己塊面，有啲驚訝：「咦？」

「做乜無啦啦流眼淚？」

「我都唔知，淨係突然覺得有種好懷念嘅感覺，然後就一堆訊息湧入個腦度，淹沒咗嗰種好似煙咁嘅感動。」



我無理佢流眼淚嘅原因，反而對佢講嗰堆訊息比較有興趣：「有咩湧入你個腦度？」

「呃⋯⋯講出嚟你未必信。」

「你都要講咗我先決定信唔信架嘛！」

「依度唔係現實世界。」

乜話？



「你唔好同我講係夢呀！咁嘅設定淨係三流小說先會用！」

「唔係夢。依度係虛擬實境，即係VR，Virtual Reality嘅世界。」