點解我會不停用依四個字去描述衣櫃同怪手?

咁佢爆堆手出嚟個場景真係好似鋼鍊丫嘛!無錯,似鋼鍊!我記得鋼鍊!

人如果想得到一樣野,就必須要付出同等價值嘅代價。依一個就係煉金術嘅基本原則,等價交換。當時我地兩個,相信依點,就係世界嘅真理。

我揮舞菜刀,令攻過嚟嘅白手卻步,同時拖住流血嘅腳向衣櫃步步進逼。唔知點解,我覺得我應該要去接觸衣櫃入面,先可以成功淨化。

白手睇嚟並唔想我接近佢地嘅核心,佢地一見我有意靠近,就一隻隻狂暴起嚟。



指骨同臂骨「咯咯」作響,兜過我菜刀橫揮嘅軌跡,轉眼間就將我手臂同左小腹嘅肉撕咗出嚟。

「嗚⋯⋯」距離衣櫃仲有一個身位,我仍然用盡僅餘嘅力量揮舞菜刀,令白手無辦法直擊我個頭或者心臟位置。

不過擋唔到嘅地方實在太多,我自覺捱唔到幾耐,因為我全身已經畀怪手撕走咗好多肉。

雖然每個傷口都只係好似仆傷咁,但係血愈流愈多,我開始覺得凍同頭暈。