[有沙入眼]是咁的，我覺得我住嗰度有啲唔妥: 58我嘅記憶

再咁拖落去唔係辦法，於是我用盡全力大叫一聲，伸直右手向前仆過去，面上一塊肉被撕到半空，血色彩虹於虛空轉瞬即逝。

溫暖而柔軟嘅感覺喺手心傳入靈魂。

我微微張開眼，見到所有準備向我作出致命攻擊嘅白手凝結於半空，時間好似靜止咗一樣。

手掌處，有一團好似海綿嘅物體，輕輕施力向我回握。

視線轉過去，見到白手堆之中，有一隻紅潤嘅手掌靜默咁捉住我隻手。



衣櫃門打開，入面好似有一塊投影螢幕咁，開始播放昔日嘅記憶片段，就好似之前吳非凡屋企部電視咁。

螢幕上面，一個十歲左右嘅男仔同一個年紀差唔多大嘅長髮細路女坐喺梳化床，一齊冚住張薄薄嘅白被睇電視。

「哥哥，佢話PG家長指引喎，我地睇唔睇得架？」

「哎呀定啦，無事嘅。」

另一邊廂，細個版嘅愛德華同艾爾范斯開始人體煉成，煉成陣一片金光燦燦，又有邊個諗得到佢地已經觸犯咗煉金術嘅禁忌？



雖然記憶會模糊、會交錯亦會混亂，但我大概可以從今次嘅恐怖體驗入面察覺到一切現象到底來自我嘅咩記憶。