[有沙入眼]是咁的，我覺得我住嗰度有啲唔妥: 77連續體驗

感覺到背後異樣嘅Lucy忍唔住慘叫，但係佢無浪費逃走嘅時間回頭望，淨係一心一意向我伸出手

「捉實我！」我捉住Lucy隻手，然後好似擲鐵餅咁以右腳為軸心，身體旋轉半個圈將Lucy扯入屋。

閂鐵閘！

「啪啪啪噠噠噠噠噠！」

一道昆蟲密集飛行形成嘅海嘯喺鐵閘前橫掃而過。



好彩我地入屋之後，基於空間唔同，令恐怖體驗更改，喺走廊嘅曱甴無九十度轉彎產入嚟。

「你而家信啦？」

驚魂未定嘅Lucy一路抖大氣一路點頭。外面嘅曱甴群飛過之後，一切回復平靜。

但平靜並無維持太長時間，因為電視同電腦自動開機，播放詭異嘅雪花畫面。

「你好999報案中心。」



Lucy嚇到即刻攬實我慘叫，我同時拉開鐵閘帶佢行翻出走廊。

今次就見到走廊盡頭有舊肉色野踎咗喺地吓，我眨眼，房門同鐵閘閂翻埋，我再眨眼，嗰舊肉色野已經踎喺走廊中間。

「點⋯⋯點算呀⋯⋯」Lucy畀接二連三嘅恐怖體驗嚇到腳軟，而我亦完全諗唔到要點樣淨化眼前嘅不明生物。

「唔好眨眼，唔好回頭望，走！」我拉住Lucy轉身向走廊另一個出口逃走，唔可以回頭，因為舊肉色野可能喺回頭嘅瞬間就已經喺面前。

我地兩個手中嘅刀刃隨跑動劃出寒光。



「嗄⋯⋯嗄⋯⋯」跑出走廊之後，兩個人一齊抖大氣。

眼角餘光掃到後樓梯嘅異物，我靜靜轉動僵硬嘅頸部，視線投向發出詭異氣息嘅後樓梯。

一袋滲血嘅垃圾。

透明膠袋入面好似注入咗稀釋蕃茄汁，人類慘白嘅肢體同街市夜晚被棄置嘅豬腳一樣。

又翻咗去豬肉佬嘅恐怖體驗空間。見到個膠袋我就知道，原來各個空間雖然好似平衡世界，但喺時間線上係有連貫性。

嗰袋人類肢體，就係啱啱放過我嘅豬肉佬所棄置嘅垃圾。

「又係頭先啲臭味⋯⋯」Lucy揞住鼻講。

啪。啪。啪。啪⋯⋯