[有沙入眼]是咁的，我覺得我住嗰度有啲唔妥: 78要保護嘅人

走廊傳入人字拖撞擊地面嘅微響，喺彷如深沈海底咁默靜嘅空間，敲打我同Lucy嘅耳膜。

腳步聲又緩又慢，每次聽到，就能夠感受到狩獵者由心而發嘅自信。

Lucy用力捉實我嘅手臂，生果刀嘅刀尖對住走廊，昏暗嘅光線令肥大嘅屠夫身影若隱若現。

豬頭帶住笑意撞擊視網膜，恐懼令眼球發熱。

「我地⋯⋯點解唔走？」



「因為走唔甩。」我提起菜刀指向緩步踏入舞台嘅豬頭人，只見佢身前嘅圍裙一片鮮紅，血喺圍裙一角聚集，隨佢嘅步伐滴落。

「我啱啱係記翻起之前畀佢殺死嘅痛覺，仲有，記憶中嘅我有走上幾層或者落幾層樓，不過無論點走，都會翻去同一層。」

Lucy嘅牙齒發出「格格格」嘅撞擊聲：「咁⋯⋯咁咁點呀而家？」

「唯有淨化佢。」

豬肉佬望一望後樓梯嘅人類殘骸，然後將視線轉向，望住我同Lucy。



「係咪有人曳曳？」

佢伸手拎出磨刀棒，將豬肉刀架喺上面片咗幾吓，刀刃同粗糙金屬磨擦嘅聲音猶如生鏽齒輪日久失修嘅轉動音。

我下意識踏前一步，用半身護住Lucy。佢望一望我，捉我手臂嘅力度微微增加咗半分。

我應承過，到時我會救你。

就算你已經唔記得，只要我仲記得，無論幾多次，我都會企喺你面前。



哪怕我握實菜刀嘅手心因爲緊張而滲汗，即使我站立嘅雙腳因爲恐懼而顫抖，我仍然會保護自己個妹。

你問我驚唔驚，點可能唔驚？

但依個世界上，總有就算驚，都要保護嘅人。