[有沙入眼]是咁的，我覺得我住嗰度有啲唔妥: 98呃人嘅

「見到細個⋯⋯同個男仔一齊玩。我地喺豬肉刀上面刻字，買咗兩個豬面具扮豬。」啱啱完成淨化嘅回憶。

明明係描述緊開心嘅回憶，但Lucy流露住不忍嘅表情。

有時，正正因為回憶太開心，每次諗起先會愈心痛。

「然後呢？」

Lucy摸一摸自己胸口：「然後就覺得，個心好痛，痛到我無力用手抹面上嘅眼淚。」



佢話，之後嘅夢中，佢轉身面對大門，開鎖，咔嚓，離開。

唔知點解，佢覺得自己等緊背後嘅人隻手。

如果嗰陣，對方嘅手捉住佢嘅衣角，或者結局就可以唔帶遺憾咁落幕。

我要將你拯救，逃離人類荒謬。

Lucy哼起一首歌嘅一句，我有印象，有人同我講過好鍾意依首歌。



「呃人嘅。」

我曾經以為嗰個人今生今世都會帶我逃離人類荒謬，但我無諗過佢就係令我嘅世界變得荒謬嘅原因。

喺我最痛苦嘅時候，佢無將我拯救，只係靜靜望住我嘅身影，喺橫街退場。

Lucy冷冷咁講出舊日破滅嘅願望。