[有沙入眼]是咁的，我覺得我住嗰度有啲唔妥: 108接近

阿婆嘅頭好似老舊嘅機械咁僵硬，唔靈活咁擰向我同Lucy。

捉住Lucy嘅手更加用力。

枯黃嘅手指有節奏咁敲打屋前嘅水錶。佢笑緊，但係成個樣毫無笑意。

過嚟吖。

我拖住Lucy，向前踏一步。



「吓？咦？喂喂喂，做咩唔走？」Lucy完全唔明白我點解會向阿婆邁步走過去，佢嘗試掙扎，但係我更加用力拖實佢。

「走啦！一陣佢又變曱甴就死架喇！」我見佢咁用力掙扎，就順佢意陪佢掉頭走。

「呃？」跑咗幾步嘅Lucy停低腳步，發出錯愕嘅單音，手指震哂咁指向同我地更加接近嘅阿婆。

我地啱啱一百八十度調頭，向走廊嘅另一邊跑，理應會遠離阿婆，但結果佢仲喺我地正前方，而且更加接近。

「點解會咁⋯⋯」