「有曱甴呀⋯⋯」雙眼通紅嘅Lucy,睇嚟係記翻起一啲童年回憶,所以頓時明白之前恐怖體驗嘅意義。

雖然而家嘅恐怖體驗係針對我,但既然我之前都可以幫到吳非凡淨化佢嘅體驗,咁Lucy一樣可以幫到我進行淨化。

阿婆喺廚房行出嚟,手中拎住拖鞋:「邊度?唔駛驚。」

「阿婆⋯⋯你仲記唔記得我?」阿婆無視Lucy,喺佢身邊行過。

「邊度有曱甴?」



Lucy望住阿婆,而阿婆就用睜大嘅眼珠左右游移,搜索曱甴嘅蹤影,好似根本睇唔到Lucy嘅存在一樣。

「我好掛住你呀⋯⋯」

「邊度有曱甴呀?」阿婆無回頭睇Lucy,一直處於搵曱甴嘅狀態。佢壓低身子,好似戰場上警戒住敵人嘅士兵咁專心一致。

「邊度有曱甴⋯⋯都已經唔緊要喇⋯⋯」

睇嚟Lucy搵出咗恐怖體驗同細個發生嘅事有咩關聯。



距離淨化,只有一步之遙。

「邊度有⋯⋯曱甴?」

「因為,我會自己拍架喇⋯⋯」

咔。阿婆塊面好似蛋殼咁,裂痕放射式咁由額頭爬到落下巴。

「所以⋯⋯可唔可以⋯⋯」Lucy用力吸一吸鼻水:「我可唔可以⋯⋯食紅豆沙呀?」



阿婆塊面完全爆破,整個空間亦喺爆炸之中回到過去,展示Lucy嘅記憶。