[有沙入眼]是咁的，我覺得我住嗰度有啲唔妥: 151選擇

我無視個西面護士，用同等嘅音量對Lucy講：「我今次真係一舖過可以發達呀，咁嘅機會一生人得一次架咋！傾得成的話你同阿婆嘅生活都會過得好好多！」

「先生！」

「等我翻嚟，我地可以還清哂啲債，仲可以幫阿婆轉去私家醫院，做嗰啲咩新型標鈀治療。」我一口氣繼續講落去：「同埋我地可以買私樓，唔駛再質喺嗰間豆腐潤咁細嘅公屋單位！你理性啲諗吓都知我應該去啦！」

「而家我地間屋好失禮你咩？買間大屋得自己一個人孤零零住又有咩用喎！」

「妖你兩個咪撚再嘈呀！都話依度係醫院！」



「我係話買間大屋我地三個一齊住呀！」繼續無視發火嘅護士。

「到你買到嗰陣，阿婆可能已經唔喺度喇！」不愧係兩兄妹，好有默契咁無視咗個護士。

「你都識話係可能啦！可，能，呀！咁佢之後無事都有可能家嘛！」

「咪再嘈呀！！！！！！」我以為係元秋用獅吼功，差啲耳聾。

「黃姑娘，醫院嚟架，唔好大聲嗌呀。」走廊另一邊傳嚟另一個護士嘅警告。



個西面護士啤咗我同Lucy一眼：「如果我過唔撚到實習都係你兩條仆街累架。」然後就行入一間病房。

Lucy靜咗落嚟，但唔關個黃姑娘事。

「之後⋯⋯無事？你真心咁樣覺得？」Lucy嘅眼同鼻都泛紅，緊閉嘅嘴唇代表佢抑制住自己唔喊出聲。

我無答。

「如果你真係⋯⋯咁覺得的話，我無野好講。」



對唔住，錢同親人嘅最後一面，我選擇咗錢。